[1] Kamintellu inin ne ku piyu nindew kaꞌam. Bang niyaꞌ luꞌu nuntutan saweꞌne maghinang laꞌat, subey tuhutte bi meꞌ sinulat dem kitabin weꞌ subey niyaꞌ duwangan atawa tellungan naksiꞌ weꞌ toꞌo tuntutne miyaꞌan meke iye pinakale.
[2] Papiyuku kaminduwenen, bakas hep sessaꞌanku meꞌ bakas magduse matuꞌuhin duk kēmon ne kaꞌam maluꞌuhin. Kuweꞌitu sessaꞌante kaꞌam balik pādpād gaꞌ pe ku tekka luꞌu weꞌ pagpiyu ku balik gaꞌi kaꞌaseꞌanku sine-sine gaꞌi ngalebbahan dusenen.
[3] Peggeꞌ kabayaꞌanbin tandaꞌ weꞌ kēmon pinaꞌinku si kaꞌamin amban pangandaꞌakan Almasi, kataꞌuhanbi du iyan bang ne kaꞌam leggaku. Gaꞌi lamma Almasi saguwaꞌ basag iye ine-ine hinangne si kaꞌam.
[4] Peggeꞌ bisan kuweꞌ bantuk gaꞌ niyaꞌ basagne pangalansang iye diyataꞌ olomin, saguwaꞌ ellum du iye balik weꞌ balakat Tuhanin. Damikkiyan kami meꞌ kawakilannen, kuweꞌ bantuk lamma isab kami peggeꞌ magdambuwaꞌ kami duk Almasi. Saguwaꞌ takitebi du iyan weꞌ ellum du isab kami weꞌ balakat Tuhanin duk niyaꞌ du basag kami ngahatul kaꞌam.
[5] Pikilun bi teꞌed duk payamanun bi bang bennal ke kaꞌam sandel pu Isa Almasi atawa gaꞌi. Gaꞌi ke kataꞌuhanbi weꞌ luꞌu Isa Almasi patennaꞌ dem ateybi? Bang gaꞌ iye luꞌu, hātinen gaꞌi toꞌo weꞌ sandel kaꞌam si iye.
[6] Ngase-ngase ku weꞌ kataꞌuhanbi du iyan weꞌ kami asal bennal kawakilan weꞌ Almasi.
[7] Iye pināku-pāku kami si Tuhanin weꞌ hinangbi hadja sasuku mapatutin supaya kaꞌam gaꞌi subey legga kami. Gaꞌi ne makaꞌine bisan gaꞌi tapakite kami si kaꞌam weꞌ bennal kaꞌurungan kapatut kami weꞌ Almasi ngalegga kaꞌam, basta maghinangan hāp hadja kaꞌam.
[8] Gaꞌi kami makajari maghinang ine-ine naggaꞌ mabennalin saguwaꞌ luwal kami magpasōng mabennalin.
[9] Sinna kami bisan kami kimmatan meꞌ aꞌahin lamma basta basag hadja sandelbi pu si Isa Almasihin. Duk pāku-pāku kami teꞌed si Tuhan weꞌ kawul-piꞌilbin pasōng ne paꞌin ngahāp.
[10] Hangkan kaꞌam sulatanku sabab inin pādpād gaꞌ pe ku tapiyu luꞌu, supaya pahāpbi ne hinanganbin duk pagtekkaku luꞌu, gaꞌi ne subey pakitehanku kapatutkun ngalegga kaꞌam. Inurungan ku kapatut weꞌ Almasi, dumaꞌin supaya tapakaꞌatanku sandelbin saguwaꞌ duk kaꞌam tatabanganku supaya ngabasag sandelbin.
[11] Na, meꞌ kapungtinaꞌihanku, taman inin ne hadja. Iye apasun bi mahāp kawul-piꞌilbin; tuhutun bi teꞌed meꞌ sessaꞌku si kaꞌamin; magsulut-sulut kaꞌam supaya kaꞌam dem kasanyangan. Manjari luꞌu du si kaꞌam Tuhanin, iye poꞌon lasahin duk kasanyanganin.
[12] Bang kaꞌam magtipun, magsalam-sinalam kaꞌam, tandaꞌ weꞌ maglasa-ilasa kaꞌam.
[13] Kēmon meꞌ masandel pu si Isa matuꞌuhin maboꞌo bissā weꞌ essebde kaꞌam.
[14] Karayaw luwal kaꞌam ipat Isa Almasi, Panuhutanten bi duk karayaw luwal pakitehan Tuhanin lasanen si kaꞌam. Karayaw isab magdambuwaꞌ atey kaꞌam kēmon peggeꞌ luꞌu Niyawa Tuhanin dem ateybi. Wassalam