[1] Manjari meꞌ kapungtinaꞌihanku, batang kaꞌam akahan kami bang saꞌingge panabang Tuhan meꞌ pagtipunan meꞌ masandel pu si Isa Almasi malaꞌi si lahat Makedoniyahin.
[2] Bisan siye kasigpitan manamal sabab meꞌ kasusehan matekka si siyehin, saguwaꞌ kēgan pe teꞌed siye. Hawal kēgden bisan siye miskin manamal, sayuꞌ siye ngurung panabangde meꞌ pagkaside kasukalanin.
[3] Kapanaksiꞌ ku weꞌ ngurung siye tamanan takoleꞌden duk sampay palabi pe amban takoleꞌden. Amban bayaꞌde hadja hangkan siye ngurung.
[4] Pabuyuꞌ-buyuꞌ pe siye si kami weꞌ pasakup isab siye nabang sukal meꞌ sukuꞌ si Tuhan malaꞌi si lahat Yahudiyahin.
[5] Pinangurungden palabi teꞌed amban inase-ase kami amban siyehin. Peggeꞌ pinangurung dahuꞌ weꞌ de diden si Tuhan, iye Panuhutanten bi, ubus bu paglillaꞌde isab diden nuhut kami peggeꞌ iyan kabayaꞌan Tuhanin.
[6] Manjari, peggeꞌ si Titus iye nagnaꞌ magtipun panabangbin, dinaꞌak iye weꞌ kami piyu nabangan kaꞌam balik magtipun meꞌ panabangbin supaya tapangurungbi ne kēmon tabangbin.
[7] Bang pasal kēmon mahāpin gaꞌi kaꞌam taꞌamban. Basag sandelbin, pandey kaꞌam magusihat sabab si Isa, lalem kataꞌubin, matuyuꞌ kaꞌam nabangan meꞌ saweꞌbin duk hadje lasabi si kamihin. Hangkan kabayaꞌan kamihin weꞌ gaꞌi isab kaꞌam taꞌamban bang kaꞌam nabang sukal saweꞌbin.
[8] Dumaꞌin hangkan inin paꞌinku weꞌ daꞌakte kaꞌam saguwaꞌ bayaꞌ hadja pagintaꞌuku si kaꞌam bang saꞌingge bayaꞌ meꞌ sinduwehin nabang supaya isab kaꞌam ngalekkat siye. Sabab iyan tapakitebi weꞌ bennal isab kaꞌam malasa si saweꞌbi.
[9] Kataꞌuhanbi du bang saꞌingge hadje lasa duk aseꞌ Panuhutanten bi Isa Almasi si kitehin bi. Hawal aseꞌne si kaꞌamin, bisan iye dayahan laꞌi si surgaꞌ, magpamiskin iye peggeꞌ maglillaꞌ iye manjari manusiyaꞌ supaya kaꞌam ngandayahan sabab iye.
[10] Kaꞌam hep dehellu-dehellu mabayaꞌ manabangin duk nagnaꞌ ne kaꞌam ngurung tahun dehellu miyaꞌan. Na, iye inin pikilankun, hāp bang ubusanbi ne iyan.
[11] Hangkan hinangun bi ne duk ubusun bi ne panabangbin. Sinna teꞌed kaꞌam panagnaꞌbi inin hangkan subey isab kaꞌam sinna ngubusanne, piye-piye ne takoleꞌbin dangan-dangan.
[12] Peggeꞌ bang sinna kaꞌam ngurung duk ngurung kaꞌam takoleꞌbin, tayimaꞌ Tuhanin pinangurungbin peggeꞌ gaꞌi kaꞌam daꞌakne ngurung manggaꞌi takoleꞌbin.
[13] Gaꞌi ku mabayaꞌ weꞌ subey kaꞌam magtiksaꞌ sabab panabangbi saweꞌbin.
[14] Saguwaꞌ kabayaꞌankun, peggeꞌ kuweꞌitu niyaꞌ du si kaꞌam ekka-ekka, subey dahuꞌ tabangbi meꞌ pagkasibi magtiksaꞌ kuweꞌituhin. Manjari, si pasōngan kaw isab kaꞌam kasigpitanin bu siye maniyaꞌin, na, tatabangde isab kaꞌam. Bang sa inin hinangbin, magtabang-tinabang kaꞌam duk saliꞌ-saliꞌ kaꞌam niyaꞌ.
[15] Sa pinaꞌin dem kitabin, “Aꞌa makatipun kinakan maꞌekkahin, gaꞌ maglabi-labi si iyehin. Duk makatipun kuweꞌahatin, gaꞌ isab iye kakulangan.”
[16] Magsukul teꞌed kami si Tuhan peggeꞌ pinapikilan weꞌ ne si Titus hangkan sinna iye nabangan kaꞌam kuweꞌ kamihin isab.
[17] Pagtilew kami si Titus bang makajari iye piyu si kaꞌam, magtawus iye magaweꞌ. Amban kabayaꞌanne sinna iye piyu nabangan kaꞌam.
[18] Patuhut kami isab si iye dambuwaꞌ pungtinaꞌite bi tuꞌu. Aꞌa inin pinagaddatan teꞌed weꞌ meꞌ masandel pu si Isa Almasi si kēmon meꞌ pagtipunanin peggeꞌ basag iye magmahalayak aka-aka mahāp sabab Isa Almasihin.
[19] Duk dumaꞌin hadja iyan. Saguwaꞌ iye isab tapeneꞌ weꞌ meꞌ pagtipunan meꞌ masandel pu si Isa Almasihin dinaꞌak nuhutan kami bang turanan kami ne lasa-lasahanin pī si meꞌ kapungtinaꞌihante bi kasukalanin. Hinang kami inin supaya tapudji Tuhanin duk supaya isab tapakite kami weꞌ sinna kite bi nabang.
[20] Kamayaꞌ-mayaꞌ du kami si sīn maꞌekka iyan supaya gaꞌ niyaꞌ jānne panallaꞌan kami.
[21] Peggeꞌ kabayaꞌan kamihin weꞌ bentel hinangan kamihin, dumaꞌin hadja si pagmatahan Tuhan saguwaꞌ sampay si pagmatahan manusiyaꞌ isab.
[22] Niyaꞌ pe isab dambuwaꞌ pungtinaꞌite bi patuhut kami pu disi Titus. Daran pandogahan kami aꞌa inin hangkan kataꞌuhan kami weꞌ pages iye duk matuyuꞌ iye ine-ine hinangne. Pasōng ne kuweꞌitu. Mabayaꞌ teꞌed iye piyu si kaꞌam peggeꞌ ngandel teꞌed iye si kaꞌam.
[23] Na, si Titus inin saweꞌku maghinang nabangan kaꞌam. Meꞌ pungtinaꞌite bi saweꞌne inin, dinaꞌak siye nuhut weꞌ meꞌ pagtipunan masandel pu si Isa Almasihin. Tapudji Almasi sabab hinanganden.
[24] Pagtekka siye luꞌu, pakitehanun bi siye lasabin, supaya kēmon meꞌ pagtipunan masandel pu si Isa Almasi sinduwehin, kabugtuꞌande du weꞌ bennal kaꞌam malasa duk kataꞌuhande weꞌ bennal kēmon pananglit kami kaꞌamin.