[1] Bang du siꞌ kaꞌam gaꞌi jumuꞌ pakale si aku bisan sabab bissākun kuweꞌ ku bantuk dupang. Duhulanun bi ne ku dahuꞌ.
[2] Ellegte kaꞌam manamal kuweꞌ pangelleg Tuhanin. Dalilnen kuweꞌ kaꞌam budjang gaꞌ niyaꞌ tamak-tamakne duk bakas kaꞌam pinatunang weꞌ ku si dambuwaꞌ lella, iye Almasi.
[3] Suse ku si kaꞌam kaw pamikilbin taboꞌo pasapeꞌ amban Almasi, manjari gaꞌi ne dambūs-būs lasabi si iyehin. Kaw kaꞌam kaꞌakkalan kuweꞌ Sitti Hawa awwalley. Kaꞌakkalan hep iye weꞌ kapandeyan sawe magdustaꞌin.
[4] Peggeꞌ bang niyaꞌ piyu ngusihatan kaꞌam, sinna pe kaꞌam bisan usihatde sabab si Isahin seddili amban usihat kamihin; duk niyaꞌ tasangkabi bu dumaꞌin Niyawa Sutsihin, duk meꞌ panoloꞌden dumaꞌin aka-aka mahāp panoloꞌ kami si kaꞌamin.
[5] Bang si aku, gaꞌi ku kalindihan weꞌ meꞌ gurubi iyan bisan paꞌinde weꞌ siye meꞌ kawakilan Almasi tamanan malangkewin.
[6] Hatu gaꞌi ku pandey missā-missā, saguwaꞌ kataꞌuhanku teꞌed kēmon toloꞌ mabennalin. Duk luwal inin pinapastiꞌ weꞌ ku si kaꞌam sabab panoloꞌkun kēmon.
[7] Tiggelanku magusihat aka-aka mahāpin luꞌu si kaꞌam, gaꞌ ku bakas māku tangdan si kaꞌam bisan dambuwaꞌ sīn, saguwaꞌ magusaha ku. Magpadiyawaꞌ ku para si kahāpanbi du. Laꞌat ke hininangku miyaꞌan?
[8] Kaluꞌuku magusihat si kaꞌamin, iye ngagastuhan akuhin meꞌ pagtipunan masandel pu si Isa Almasi si meꞌ lahat seddilihin. Kuweꞌ du ku nangkewan siye supaya kaꞌam tatabangku.
[9] Kaluꞌuku si kaꞌamin, bang ne ku kasukalan, gaꞌ ku māku si kaꞌam peggeꞌ tinabang du sukalkun weꞌ meꞌ pungtinaꞌite bi amban Makedoniyahin. Amban matuꞌuhin sampay si pasōngan gaꞌi ku teꞌed māku ine-ine si kaꞌam.
[10] Pagbantuku inin gaꞌi teꞌed tapadeheng weꞌ sine-sine luꞌu si tibuꞌukan lahat Akaya, peggeꞌ asal gaꞌi ku māku pilak amban kaꞌam. Toꞌo pinaꞌinku inin peggeꞌ tiyaꞌ Almasi dem ateyku.
[11] Kannalbi ke weꞌ gaꞌi kaꞌam kalasahanku hangkan gaꞌi tayimaꞌku tabangbin? Kataꞌuhan Tuhanin du weꞌ asal kalasahante kaꞌam.
[12] Asal gaꞌi ku teꞌed māku tangdan amban kaꞌam bisan sumiyan supaya gaꞌi kapagabbu meꞌ guru maluꞌu si kaꞌamin weꞌ magsaliꞌ du hinangan kamihin.
[13] Meꞌ aꞌa iyan gaꞌi toꞌo weꞌ bakas kawakilan siye weꞌ Almasi. Ngakkal hadja siye duk magmā-mā siye weꞌ bennal siye meꞌ aꞌa bakas kawakilan weꞌ Almasi.
[14] Gaꞌi makaꞌulaliꞌ hinangande inin, peggeꞌ bisan nakuraꞌ seyitanin magpasalingu du kuweꞌ bantuk malaꞌikat.
[15] Hangkan gaꞌi makaꞌulaliꞌ bang meꞌ aꞌa daraꞌakan nakuraꞌ seyitanin magmā-mā weꞌ meꞌ aꞌa maghinangan bentel siye. Saguwaꞌ kaꞌujudannen ilegga du siye pataꞌ si meꞌ hinangande malaꞌatin.
[16] Ambat tabalikku bakas pinaꞌinku tagnaꞌin, daꞌa pikilun bi weꞌ dupang ku sabab meꞌ bissākun. Saguwaꞌ bang iye iyan pikilanbin, na, ambat ne basta pakale hadja kaꞌam si meꞌ pagabbukun kuweꞌahat.
[17] Meꞌ bissāku inin dumaꞌin amban pangandaꞌakan Almasi; kuweꞌ ku aꞌa dupang magabbu.
[18] Saguwaꞌ peggeꞌ ekka du magabbu sabab meꞌ hinangande tuꞌu si dunyahin, na, hatu makajari ku isab magabbu bisan kuweꞌahat sabab dikun.
[19] Peggeꞌ taꞌu teꞌed kaꞌam mikil, gaꞌi kaꞌam jumuꞌ pakale si bissā meꞌ madupangin!
[20] Pagsabalanbi du hadja bisan kaꞌam pagmandahan aꞌa. Bisan ubusde alataꞌbin atawa padupangde kaꞌam, gaꞌi hinangbi ine. Bisan pe kaꞌam diyawaꞌande atawa sampakde, hāp hadja si kaꞌam.
[21] Magsabennal ku weꞌ toꞌo dumaꞌin kami kuweꞌ meꞌ aꞌa iyan peggeꞌ damagan kami ngahinang laꞌat si kaꞌam. Saguwaꞌ bang makatawakkal siye magabbu, makatawakkal du ku isab. Essebun bi, bissāku inin kuweꞌ ku aꞌa dupang.
[22] Bang magabbu siye weꞌ bangsa Hibrani siye, bangsa Hibrani du ku isab. Bang magabbu siye weꞌ tubuꞌ Israꞌil siye, tubuꞌ Israꞌil du ku isab. Bang magabbu siye weꞌ papuꞌde Ibrahim, papuꞌku du isab Ibrahim.
[23] Bang magabbu siye weꞌ daraꞌakan Almasi siye, daraꞌakan Almasi du ku isab saguwaꞌ mas hāp pe ku amban siye. Kataꞌuhanku weꞌ missā ku kuweꞌ aꞌa dupang, mahadje diku. Mas pasōng ku basag maghinang amban siye. Mimpiye ku takalabusu sabab paghinangku pu Almasihin? Pasōng pe amban siye. Mimpiye ku kalubakan? Pasōng pe amban siye. Duk daran ku sōng matey.
[24] Minlime ku kalagutan weꞌ meꞌ pagkasiku Yahudihin duk kahabaꞌ ku ilagutan mintellumpūꞌ duk siyam pinateppat lalagutin si baranku.
[25] Mintellu ku makalabey kinakal weꞌ meꞌ bangsa Romahin. Duk mintedde ku pinagtibagan duk batu weꞌ meꞌ aꞌahin. Mintellu magkaꞌat kappal pasakeyankun. Duk bakas ku maggampalan si tengngaꞌ sellang kekkohapan duk kellawan pagkaꞌat kappal pasakeyankun.
[26] Ekka kasiya-siyahan talabeyku si meꞌ luwal paglengngankun. Bakas ku siya-siya weꞌ dunuk duk meꞌ mundu. Siya-siya ku weꞌ meꞌ pagkasiku Yahudihin duk meꞌ aꞌa dumaꞌin Yahudihin. Siya-siya ku dem puweblo, siya-siya ku dem lahat makagindew-gindew, siya-siya ku si tengngaꞌ sellang, duk siya-siya ku weꞌ meꞌ aꞌa magmā-mā weꞌ sandel siye pu si Almasi.
[27] Bohat hinangkun duk luwal ku lubagan. Daran ku gaꞌi kapatuli sangem. Magsandal ku inusan duk lekkakan. Daran kulang kinakankun. Magsandal ku haggutan peggeꞌ kulang semmekkun.
[28] Kēmon talabeyku miyaꞌan hunit. Saguwaꞌ niyaꞌ pe meꞌ kasusehanku seddili. Suse ku isab sabab meꞌ pagtipunan masandel pu si Isa Almasihin.
[29] Bang niyaꞌ ngalamma sandelne pu si Isa Almasihin, maꞌaseꞌ ku si iye. Bang niyaꞌ taboꞌo magduse, dukka teꞌed dem ateykun.
[30] Gaꞌi ku mabayaꞌ magabbu, saguwaꞌ bang subey ku magabbu, magabbu ku hadja sabab meꞌ katiksaꞌan talabeykun supaya kataꞌuhanbi weꞌ gaꞌ niyaꞌ basagku.
[31] Kēmon pinaꞌinku si kaꞌamin toꞌo. Gaꞌi ku magdustaꞌ. Kataꞌuhan Tuhanin du inin Sama Panuhutanten bi Isa Almasi. Pataꞌ iye pinudji salama-lama.
[32] Matuꞌuhin palaꞌiku si puweblo Damaskusin, niyaꞌ gubnul pinatingkoloꞌ laꞌi weꞌ Sultan Aretas. Ngandaꞌak gubnul miyaꞌan meꞌ sundalu nungguꞌan tarangka puweblo miyaꞌan duk bang ku paluwas billaꞌi tasiggewde ku.
[33] Saguwaꞌ niyaꞌ meꞌ aꞌa nabangan aku. Tinuntunan ku weꞌ de dem bakaꞌ pī padiyawaꞌ amban tendewan laꞌi si birang batu mapaliput si puweblo miyaꞌan. Manjari lumahi ku amban iye.