[1] Kaw paꞌinbi weꞌ pahadje kami ne isab di kamihin supaya kami tinayimaꞌ weꞌ bi. Dumaꞌin kami kuweꞌ meꞌ aꞌa sinduwehin. Gaꞌi kami subey moꞌo sulat weꞌ asal guru kami bang kami pī nindew kaꞌam atawa māku sulat amban kaꞌam bang kami pī si lahat seddili.
[2] Saguwaꞌ gaꞌi ku subey moꞌo-moꞌo sulat kuweꞌ miyaꞌan, peggeꞌ kaꞌam ne sulat sinulat dem atey kamihin. Takite kaꞌam weꞌ meꞌ aꞌahin duk magtawus bawag si siye weꞌ hāp kawul-piꞌilbin, duk sabab inin kataꞌuhande weꞌ niyaꞌ kapatut kami.
[3] Pastiꞌ weꞌ Almasi manulat sulat inin duk kami hadja ginunanen panulat iyehin. Panulat inin dumaꞌin duk ing saguwaꞌ sinulat duk Niyawa Tuhan maꞌellumin. Duk dumaꞌin isab panulatan sulat inin diyataꞌ batu papan kuweꞌ sulat si Musahin saguwaꞌ sinulat inin dem atey aꞌa.
[4] Iye puꞌunnen hangkan makatawakkal kami missā inin sabab sandel kami si Tuhan. Duk sandel kami si Tuhanin sabab Almasihin.
[5] Gaꞌi kami magpaꞌin weꞌ niyaꞌ di kapandeyan kami ngahinang hinang kamihin. Saguwaꞌ amban Tuhanin kapandeyan kamihin.
[6] Iye mangurungan kami kapandeyanin supaya tapalengngan kami janjiꞌne mabaꞌahuhin. Pinangurung Tuhan si manusiyaꞌin kuweꞌitu, dumaꞌin saraꞌ sinulat saguwaꞌ Niyawanen. Saraꞌ sinulatin moꞌo kamatey peggeꞌ gaꞌi tatuhut manusiyaꞌin. Saguwaꞌ Niyawa Tuhanin moꞌo umul gaꞌ tamananne.
[7] Janjiꞌ inēnan saraꞌ tagnaꞌin sinulat diyataꞌ batu papan duk takite teꞌed sahaya Tuhanin sasang pinangurung saraꞌ miyaꞌan. Sahaya inin takite sampay si luwe si Musa hangkan gaꞌi kadendengan meꞌ aꞌa Israꞌilin luwenen hawal sahayanen bu sahayane miyaꞌan palabey du hadja. Bang saraꞌ tagnaꞌin, iye mamoꞌo kamateyin, pinapitu patuhutan sahaya Tuhanin, tandaꞌ weꞌ langkew miyaꞌan,
[8] mas pasōng pe janjiꞌ baꞌahu amban Niyawa Tuhanin asal langkew manamal.
[9] Bang langkew saraꞌin bu iye puꞌunnen hangkan manusiyaꞌin hinukum pinadem narkaꞌ, pasōng pe langkew janjiꞌ baꞌahuhin peggeꞌ iye puꞌunnen hangkan manusiyaꞌin kinimmatan bentel.
[10] Iye matoꞌohin weꞌ bisan saraꞌ tagnaꞌin langkew, kuweꞌitu kuweꞌ katalungan ne weꞌ janjiꞌ baꞌahuhin.
[11] Bang langkew saraꞌ Tuhan tagnaꞌin bu palabey du hadja, pasōng ne teꞌed langkew janjiꞌ Tuhan baꞌahu manggaꞌi magtamananin.
[12] Peggeꞌ kabugtuꞌan kami weꞌ asal gaꞌ tamanan janjiꞌ Tuhan inin hangkan hep bahani kami magusihat.
[13] Gaꞌ du niyaꞌ tinapukan weꞌ kami. Dumaꞌin kami kuweꞌ si Musa ley. Magbennes hep iye duk gaꞌi kite meꞌ aꞌa Israꞌilin paluggaꞌ sahaya Tuhan si luwenen duk ujud lanyap.
[14] Masa miyaꞌan gaꞌi makahāti meꞌ aꞌa Israꞌilin, kuweꞌ dinebbunan pikilanden. Duk bisan ngeregseꞌ kuweꞌitu gaꞌi du siye makahāti bang binatsa kitab panulatan janjiꞌ Tuhan tagnaꞌin. Meke taꞌānan debbun pikilanden bang sandel ne siye pu si Isa Almasi, ubus bu makahāti ne siye.
[15] Bisan ngeregseꞌ kuweꞌitu kahabaꞌ binatsa si meꞌ aꞌa Israꞌilin amban dem kitab saraꞌ si Musahin, kuweꞌ niyaꞌ debbun pikilanden duk gaꞌi tahātide.
[16] Saguwaꞌ bang niyaꞌ aꞌa pinda pikilannen duk kahagad ne si Panuhutanten bi, taꞌānan ne debbun pikilannen duk tahātine ne.
[17] Panuhutante bi pinaꞌinku miyaꞌan, iye Niyawa Tuhanin. Bang laꞌi si aꞌa Niyawa Tuhanin, luhaya ne iye nuhut Tuhanin.
[18] Manjari, kēmon kite bi meꞌ masandel pu si Isa Almasihin, gaꞌi dinebbunan luweten bi. Kuweꞌ dalil sāmin kite bi magpakite sahaya duk balakat Tuhanin. Magimut-imut pininda kite bi weꞌ Panuhutanten bi sampay kuweꞌ iyehin ne kite bi. Panuhutante bi mamindahan kitehin bi, iye Niyawa Tuhanin.