[1] Gaꞌi kite bi padeheng maghinang si Tuhan peggeꞌ kataꞌuhante bi weꞌ bisan larak ne payad-payadte bi inin, hātinen bisan matey ne barante bi inin, niyaꞌ du patennaꞌante bi si surgaꞌ hininang weꞌ Tuhanin, duk layun inin salama-lama. Meꞌ patennaꞌante bi si surgaꞌ inin, meꞌ barante bi mabaꞌahuhin gaꞌi ne matey-matey.
[2] Kuweꞌitu kabohatan kite hawal bayaꞌte bi mapaꞌasek dem baran pataꞌ si surgaꞌin.
[3] Hangkan kabayaꞌante baran sa miyaꞌanin supaya bang kite matey gaꞌi du niyawaten kuweꞌ aꞌa magtantang.
[4] Samantaꞌan ellum pe barante si dunya inin, ngandahing kite bi peggeꞌ kabohatan kite bi. Dumaꞌin weꞌ mabayaꞌ ne kite bi mura matey, saguwaꞌ iye kinabayaꞌanten bi weꞌ kuweꞌitu inin inurungan ne kite bi baran baꞌahu supaya barante mamatey inin ginantiꞌan duk baran gaꞌi matey.
[5] Tuhanin mamanyap kitehin bi supaya tasangkate bi baran baꞌahuhin. Duk pinatennaꞌ weꞌ ne diyalem ateyte bi Niyawanen supaya kabugtuꞌante bi weꞌ asal tasangkate bi kēmon pinanyapne para si kitehin bi.
[6] Hangkan hep luwal asig ateyten bi. Kataꞌuhante bi weꞌ samantaꞌan ellum pe kite bi tuꞌu si dunya, gaꞌ pe kite bi laꞌi si palaꞌihan Panuhutanten bi.
[7] Ine-ine hinangte bi, iye tinuhutten bi si Isa Almasi peggeꞌ sandel kite bi si iye bisan iye gaꞌi takitete bi.
[8] Asal asig ateyten bi. Peneꞌte bi pe matey supaya kite bi laꞌi si palaꞌihan Panuhutanten bi, amban ellum kite bi tuꞌu si dunya inin.
[9] Saguwaꞌ tuꞌu ke si dunya atawa laꞌi si surgaꞌ, masi inangutte bi teꞌedin weꞌ kasulutan du iye si kite bi.
[10] Peggeꞌ kēmon kite bi asal subey du paguwaꞌ pī si iye duk hukumne kite bi supaya tasangkate bi dangan-dangan tumbas pataꞌ si kitehin bi. Tumbasten bi matalep du si meꞌ hinangante tuꞌu si dunyahin, hāp ke atawa laꞌat.
[11] Peggeꞌ kataꞌuhan kami weꞌ hukuman Tuhanin asal makatalew, hangkan luwal segeꞌ kami meꞌ aꞌahin dinaꞌak sandel pu Almasi. Kataꞌuhan Tuhanin du bang ine teꞌed dem atey kamihin weꞌ asal bentel kami. Duk ngandel ku weꞌ dem ateybi kataꞌuhanbi du isab inin.
[12] Daꞌa pikilun bi weꞌ pahadje kami ne isab di kamihin. Dumaꞌin! Saguwaꞌ missā kami kuweꞌ inin supaya kaꞌam gaꞌi iyaꞌ sabab kami duk supaya niyaꞌ panambungbi meꞌ aꞌa magabbu sabab pagaꞌaden, dumaꞌin sabab addatden.
[13] Niyaꞌ luꞌu magpaꞌin weꞌ lepas ne pangannal kamihin bang kami magusihat; na, ambat ne, basta luwal hadja tapudji Tuhanin. Bang paꞌinde weꞌ hāp pamikil kamihin, na, moleꞌ iyan si kahāpanbi du.
[14] Kēmon hinangan kamihin iye puꞌunnen lasa Almasi si kitehin bi. Kataꞌuhan kami weꞌ dambuwaꞌ aꞌa bakas matey gantiꞌ meꞌ aꞌahin kēmon, hangkan kēmon aꞌahin kuweꞌ ubus ne matey isab.
[15] Almasihin matey gantiꞌ meꞌ aꞌahin kēmon supaya kite bi meꞌ maꞌellumin, gaꞌi ne tuhutte bi kinabayaꞌanten bi, saguwaꞌ iye tinuhutten bi kinabayaꞌan dambuwaꞌ bakas mamatey gantiꞌten bi duk ellum iye balik para si kahāpante bi.
[16] Manjari, seddili ne kuweꞌitu pamikil kami sabab meꞌ aꞌahin, dumaꞌin ne bang saꞌingge pagaꞌaden. Gaꞌi ne kimmatan kami bang niyaꞌ si siye atawa gaꞌ niyaꞌ. Tagnaꞌ gaꞌ pagaddatan kami si Isa Almasi. Saguwaꞌ kuweꞌitu pinda ne pamikil kamihin.
[17] Bang aꞌahin magdambuwaꞌ ne duk Almasi, kuweꞌ ne iye baꞌahu pinapanjari. Kēmon addatne duk hinanganne malaꞌat matuꞌuhin magtamanan ne, duk kuweꞌitu baꞌahu ne teꞌed iye.
[18] Kēmon inin hinangan Tuhanin. Bisan kite bi bakas banta Tuhanin saguwaꞌ sabab bakas tahinang Isa Almasihin, hināp kite bi weꞌ Tuhanin duk kuweꞌitu bagay Tuhanin ne kite bi. Duk kami inin pinasukuꞌan hinang weꞌ ne, dinaꞌak kami magaka-aka si meꞌ aꞌa bang inumeyde duk isab siye maghāp duk Tuhanin.
[19] Iye inin dinaꞌak Tuhan inaka si kamihin, weꞌ makajari ne meꞌ aꞌahin kēmon maghāp duk Tuhanin sabab kamatey Almasihin. Gaꞌi ne siye legga Tuhanin duk gaꞌi ne kimmatanne duseden.
[20] Kami inin kawakilan weꞌ Almasi dinaꞌak missā lapalnen. Hangkan hep bang kami missā si kaꞌam, kuweꞌ Tuhanin mamissāhin muyuꞌ-muyuꞌ kaꞌam. Gantiꞌ Almasi ngajunjung kami si kaꞌam, maghāp ne be kaꞌam duk Tuhanin.
[21] Almasi gaꞌ teꞌed niyaꞌ duse-dusene. Saguwaꞌ para si kahāpante bi pinatanggung si iye weꞌ Tuhanin duseten bi, supaya bang ne kite bi magdambuwaꞌ duk Almasi, kinimmatan kite bi bentel weꞌ Tuhanin, kuweꞌ Tuhanin du bentel.