[1] Aku inin, si Paul, ngajunjung ku si kaꞌam. Niyaꞌ meꞌ aꞌa magpaꞌin weꞌ damagan koꞌ ku ngamāhan kaꞌam bang luꞌu ku si pagharapanbi, saguwaꞌ bahani koꞌ ku hadja ngamā bang si sulat. Kuweꞌitu junjungku hadja si kaꞌam peggeꞌ addat Almasihin subey tinuhutten, diyawaꞌ ateynen duk maꞌaseꞌ iye.
[2] Junjungku si kaꞌam, pahāpun bi ne be hatulanbin duk ne kaꞌam gaꞌi subey amāhanku bang luꞌu ku si pagharapanbi. Peggeꞌ asal gaꞌi ku talew ngamāhan meꞌ aꞌa ngalimutan kamihin weꞌ kami iye koꞌ tinuhut kamihin napsu kamihin kuweꞌ meꞌ aꞌa manggaꞌi manuhut Tuhanin.
[3] Toꞌo weꞌ manusiyaꞌ hadja kami inin, saguwaꞌ dumaꞌin kapandeyan manusiyaꞌ ginuna kamihin panaggaꞌ kami toloꞌ manggaꞌi mabennalin.
[4] Iye ginuna kamihin kapandeyan amban Tuhan duk kapandeyan pangurung si kamihin balakatan, hangkan tadaꞌag weꞌ kami bisan ine-ine managgaꞌ toloꞌ mabennalin.
[5] Tadaꞌag weꞌ kami pagsuꞌal meꞌ aꞌa manuhut toloꞌ manggaꞌi mabennalin duk meꞌ pagabbu meꞌ aꞌa manggaꞌi manuhut toloꞌ mabennal sabab Tuhanin. Hangkan meꞌ pikilande manguntarahan toloꞌ Tuhanin pinda ne paꞌin duk taboꞌo ne paꞌin nuhut Almasi.
[6] Na, bang tuhutbi ne teꞌed meꞌ pangandaꞌakan Almasihin, bu niyaꞌ pe luꞌu gaꞌi nuhut pangandaꞌakan Almasihin, asal legga kami iye.
[7] Kaꞌam, iye hadja pinayamanbin si luwasan aꞌahin dumaꞌin bang ine dem ateynen. Niyaꞌ luꞌu si kaꞌam meꞌ aꞌa magpaꞌin weꞌ siye koꞌ hadja meꞌ daraꞌakan Almasihin. Na, subey pikil-pikilde weꞌ kami inin daraꞌakan Almasi du isab kuweꞌ siyehin.
[8] Hatu lumanduꞌ ne pagbantukun sabab kapatut pangurung Tuhan si kamihin saguwaꞌ gaꞌi du ku iyaꞌ sabab inin. Peggeꞌ kapatut kami inin gaꞌi makapagkaꞌat sandelbin saguwaꞌ makabasag sandelbin.
[9] Paꞌinku inin supaya gaꞌi paꞌinbi weꞌ mabayaꞌ ku makitalew kaꞌam si meꞌ sulatkun.
[10] Niyaꞌ ne luꞌu magpaꞌin, “Bang si Paul nulat, asal basag teꞌed pinaꞌinnen duk taꞌu iye magsuꞌal saguwaꞌ bang si pagharapante bi ne, gaꞌ du niyaꞌ basagne duk gaꞌi iye taꞌu missā.”
[11] Subey pikil-pikil meꞌ aꞌa kuweꞌ iyanin weꞌ ine-ine paꞌin kami dem sulat sābu kami gaꞌ luꞌu, iye du isab iyan hinang kami bang luꞌu kami si pagharapanbi.
[12] Gaꞌi kami makaꞌaraꞌ-araꞌ masaliꞌ di kamihin si meꞌ aꞌa mamahadje dine iyan. Kannalde weꞌ siye mataꞌuhin bang ine mahāpin. Babbal du teꞌed siye. Peggeꞌ meꞌ aꞌa iyan hinangde di-addatden pangalekkatan. Hangkan bisan ine-ine hinangde, hāp ke atawa laꞌat, bang si siye hāp hadja.
[13] Saguwaꞌ kami, gaꞌi kami palanduꞌ magbantu sabab hinangan kamihin. Niyaꞌ gantaꞌan pagbantu kamihin. Magbantu hadja kami taman hinang pinasukuꞌ Tuhan si kamihin. Duk sakup ne meꞌ hininang kami luꞌu si kaꞌamin.
[14] Manjari, peggeꞌ sumakup du kaꞌam dem hinang pinasukuꞌ Tuhan si kamihin, gaꞌ kami palabi amban pinasukuꞌ Tuhan si kamihin sakaliꞌ kami piyu noloꞌan kaꞌam aka-aka mahāp sabab Almasihin.
[15] Gaꞌi bantu kami di kamihin sabab hinang meꞌ aꞌa sinduwehin, meꞌ hinang manggaꞌ pinasukuꞌ Tuhan si kamihin. Saguwaꞌ kabayaꞌan kamihin weꞌ ngabasag ne sandelbin supaya tapasōng kami hinang kamihin luꞌu si lahatbi, basta gaꞌi hadja kami palabi amban pinasukuꞌ Tuhan si kamihin.
[16] Manjari pagbasag ne sandelbin, makajari ne kami pī si meꞌ kalahatan si dambiyaꞌanbi lu isab magmahalayak aka-aka mahāp sabab Almasihin. Peggeꞌ mabayaꞌ kami magbantu hadja sabab hinang pinasukuꞌ si kamihin, dumaꞌin sabab meꞌ hinangan aꞌa sinduwehin.
[17] Paꞌin kitabin hep, “Sasuku mabayaꞌ magbantuhin, subey iye magbantu hadja sabab meꞌ bakas tahinang Tuhanin.”
[18] Peggeꞌ dumaꞌin aꞌahin tinayimaꞌ weꞌ Tuhanin bang pudjine dinen saguwaꞌ bang Tuhanin mamudji iyehin.