[1] Na, gaꞌi kaꞌam subey sulatanku namba sabab panabangbi pinaboꞌohanbi si meꞌ pagkasite bi sukuꞌ si Tuhan malaꞌi si Yahudiyahin.
[2] Kataꞌuhanku weꞌ mabayaꞌ teꞌed kaꞌam nabang duk inin hep pananglitku kaꞌam si meꞌ aꞌa Makedoniyahin. Paꞌinku si siye, “Meꞌ pungtinaꞌite bi malaꞌi si lahat Akayahin, kemuwe tahun dehellu miyaꞌan pe, asal magpanyap ne siye panabangden.” Hangkan pagkalede inin, kaꞌekkahan si siyehin mabayaꞌ isab nabang.
[3] Na, kuweꞌitu tiyaꞌ ne dinaꞌak weꞌ ku meꞌ pungtinaꞌiten bi disi Titus piyu nabangan kaꞌam magtipun meꞌ panabangbin, supaya kataꞌuhan meꞌ aꞌahin du weꞌ asal toꞌo meꞌ pananglitku kaꞌamin duk panyap ne kaꞌam ngurung panabangbin kuweꞌ bakas pinaꞌinkun.
[4] Saguwaꞌ bang piyu ku bu niyaꞌ meꞌ aꞌa bittuꞌu amban Makedoniya nuhut aku, bu kitede weꞌ gaꞌ pe kaꞌam makapagpanyap panabangbin, na, kaꞌiyaꞌ-iyaꞌan ku. Duk pasōng ne kaꞌam kaꞌiyaꞌ-iyaꞌanin peggeꞌ bakas kaꞌam sanglitanku weꞌ panyap ne panabangbin.
[5] Hangkan hep dinaꞌak weꞌ ku meꞌ pungtinaꞌite bi tellungan inin piyu padehellu amban aku nabangan kaꞌam duk pagtekkaku luꞌu andang ne panyap lasa-lasahan pananggupbin. Manjari takite du weꞌ ngurung kaꞌam amban lasabi duk dumaꞌin weꞌ sinegeꞌ kaꞌam weꞌ ku.
[6] Essebun bi teꞌed dalilan inin, pinaꞌin, “Aꞌahin bang imut pagbubudne binihiꞌin, kuweꞌahat du isab pinaganinen. Saguwaꞌ bang ekka binihiꞌ binubudannen, ekka isab pinaganinen.”
[7] Hangkan hep araꞌ-araꞌun bi dangan-dangan kaꞌam bang piye subey pinangurungbin duk iye miyaꞌan subey pinangurungbin. Gaꞌi hāp bang aꞌahin ngurung bisan iye gaꞌi mabayaꞌ atawa peggeꞌ paꞌinne weꞌ sinegeꞌ iye. Peggeꞌ Tuhanin malasa si aꞌahin bang ngurung teꞌed kanaꞌalla.
[8] Tuhanin, makajari kaꞌam urunganne palabi pe amban sukalbin supaya kaꞌam gaꞌi ne teꞌed kakulangan duk supaya isab niyaꞌ talebbi panabangbi si meꞌ saweꞌbi.
[9] Tasulat hep dem kitab sabab aꞌa masayuꞌ mangurungin, pinaꞌin, “Sayuꞌ iye ngurung si meꞌ aꞌa miskin. Hinanganne mahāp inin gaꞌi padeheng salama-lama.”
[10] Tuhanin mangurung binihiꞌ si aꞌa magtanaꞌin duk mangurung kinakanin supaya niyaꞌ kakan manusiyaꞌin. Damikkiyan Tuhanin isab mangurungan kaꞌam kēmon panabangbi meꞌ saweꞌbin. Inin kuweꞌ dalil binihiꞌin, duk Tuhanin pamanjarine duk paꞌekkane kaꞌujudan hinanganbi mahāpin. Inin kuweꞌ dalil pagani hāp.
[11] Luwal du kaꞌam iyan urungan Tuhanin maglabi-labi supaya bisan sumiyan makajari kaꞌam sayuꞌ. Bang boꞌo kami ne panabangbin pī si meꞌ aꞌahin, magsukul teꞌed siye iyan si Tuhan.
[12] Sabab pinangurungbi iyan, dumaꞌin hadja weꞌ tatabang sukal meꞌ aꞌa Tuhanin, saguwaꞌ ekka isab iyan aꞌa magsukul teꞌed si Tuhan.
[13] Manjari, hinangbi mahāp iyan tandaꞌ weꞌ bennal kaꞌam sandel pu si Isa Almasi. Manjari ekka iyan aꞌa mudji Tuhanin peggeꞌ kinahagad duk tinuhut weꞌ bi aka-aka mahāp sabab Almasihin. Magsukul isab teꞌed siye iyan si Tuhan peggeꞌ sayuꞌ kaꞌam ngurung panabangbi siye duk kēmon meꞌ aꞌahin.
[14] Manjari ngampun-ngampun du siye iyan si Tuhan para si kaꞌam duk malasa teꞌed siye si kaꞌam peggeꞌ kataꞌuhande weꞌ hangkan kaꞌam sayuꞌ nabangan siye peggeꞌ pinasayuꞌ kaꞌam weꞌ Tuhanin sabab lasane duk aseꞌnen.
[15] Hangkan hep subey teꞌed kite bi magsukul si Tuhan peggeꞌ lasa-lasahannen gaꞌi takila-kila.