[1] Peggeꞌ magtabang kami duk Tuhanin maghinang hangkan buyuꞌ-buyuꞌ kami kaꞌam, peggeꞌ bakas tayimaꞌbi ne lasa duk aseꞌ Tuhanin, daꞌa ne tayikutanun bi.
[2] Pakalehun bi pinaꞌin Tuhanin, “Pagtekka ellew pangeddewkun, pinakale kew weꞌ ku. Pagtekka ellew panimbulku kaꞌuhin, tinabang kew weꞌ ku.” Hangkan paꞌinku si kaꞌam: Pakale kaꞌam! Ellew inin ne ellew pangeddew Tuhanin pamakitene lasanen. Ellew inin ne ellew panimbulne kaꞌam amban hukuman dusebin.
[3] Gaꞌi kami mabayaꞌ weꞌ niyaꞌ nallaꞌ hinangan kamihin, hangkan pahatul-hatul teꞌed kami, supaya gaꞌ niyaꞌ jānne hangkan aꞌahin gaꞌi nuhut Isa Almasi.
[4] Asal ine-ine hinang kami, pakitehan kami weꞌ kami asal bennal meꞌ daraꞌakan Tuhanin, sabab matuyuꞌ kami magsandal kabinasahan duk kasigpitan.
[5] Talabey kami ne ilagutanin duk kinalabusuhin. Bang patekka pī meꞌ aꞌahin nganjabu kami. Daran kami lubagan maghinang. Bang patekka gaꞌi kami tumuli duk gaꞌi kami mangan.
[6] Pakitehan kami isab weꞌ bennal kami daraꞌakan Tuhanin sabab addat kami mahāpin. Petten kami, kataꞌuhan kami meꞌ toloꞌ mabennalin, gaꞌi kami mura astel, duk maꞌaseꞌ kami. Pastiꞌ weꞌ tuꞌu si kami Niyawa Tuhanin, duk toꞌo lasa kami si pagkasi kamihin.
[7] Meꞌ panoloꞌ kamihin toloꞌ mabennalin, duk pastiꞌ weꞌ tuꞌu si kami balakat Tuhanin. Kawul-piꞌil kami mabentelin kuweꞌ dalil panyap sundalu pamonoꞌ bantanen duk pagelligne.
[8] Bang patekka pinahadje kami saguwaꞌ bang patekka isab diniyawaꞌan kami. Bang patekka pinudji kami saguwaꞌ bang patekka isab binissāhan laꞌat kami. Paꞌinde magdustaꞌ kami bu paꞌin bennal kēmon pinaꞌin kamihin.
[9] Kuweꞌ gaꞌi kami bantu, bu iye matoꞌohin, kēmon aꞌahin ngataꞌuhan kami. Daran kami sōng matey saguwaꞌ ellum pe du kami sampay maꞌin. Bisan kami pinapeddiꞌan, gaꞌ du kami mula.
[10] Bisan kami suse, saguwaꞌ luwal du kami kēgan. Bisan kami miskin, saguwaꞌ sabab panoloꞌ kamihin ekka aꞌa makasangka alataꞌ mabennalin. Gaꞌ niyaꞌ alataꞌ kami tuꞌu si dunya, saguwaꞌ asal kēmon sukuꞌ si kami du.
[11] Meꞌ bagay kami luꞌu si Korintohin, inaka weꞌ kami si kaꞌam kēmon dem atey kamihin. Hadje lasa kami si kaꞌamin.
[12] Dumaꞌin kulang lasa kami si kaꞌamin, saguwaꞌ kulang lasabi si kamihin.
[13] Missā ku si kaꞌam kuweꞌ meꞌ anakte kaꞌam lasiyaꞌ. Pāku kami si kaꞌam, kalasahanun bi be kami isab kuweꞌ pangalasa kami kaꞌamin.
[14] Daꞌa kaꞌam nuhut-nuhut meꞌ aꞌa manggaꞌi manuhut Isa Almasihin, peggeꞌ gaꞌi makajari pinagsaget mahāpin duk malaꞌatin. Kuweꞌ dantaꞌin isab gaꞌi kapagsaget duk lindemin.
[15] Gaꞌi magdambuwaꞌ isun Isa Almasi duk nakuraꞌ seyitanin hangkan gaꞌi kapagdambuwaꞌ atey aꞌa masandel pu si Isa Almasihin duk aꞌa manggaꞌi masandel si iyehin.
[16] Gaꞌi makajari sinumba tuhan-tuhanin dem lumaꞌ Tuhanin. Kite bi meꞌ masandel pu si Isahin, kuweꞌ kite dalil lumaꞌ Tuhanin peggeꞌ Tuhan maꞌellumin patennaꞌ diyalemte bi. Paꞌin Tuhanin hep, “Laꞌi ku maglahat si meꞌ aꞌa sukuꞌ si akuhin duk patennaꞌankun laꞌi si siye. Aku iye pagtuhananden duk siye ne meꞌ aꞌakun.”
[17] Peggeꞌ kuweꞌ inin kabayaꞌan Tuhanin, paꞌinne isab, “Paluwas kaꞌam amban diyaleman meꞌ aꞌa manggaꞌi manuhut akuhin duk pasapeꞌ kaꞌam amban siye. Daꞌa kaꞌam ngantan ine-ine haram ubus bu tayimaꞌte du kaꞌam.
[18] Manjari, aku Samabi ne duk kaꞌam meꞌ anakku ne. Inin paꞌin Panuhutanten bi Tuhan Mabalakatanin.”