[1] Hawal aseꞌ Tuhan si kamihin, pinasukuꞌ weꞌ ne si kami hinang inin, magusihat sabab janjiꞌ baꞌahuhin. Hangkan gaꞌi kami lamma maghinang.
[2] Gaꞌi teꞌed hinang kami sasuku hinangan tinapuk, meꞌ hinangan makaꞌiyaꞌ-iyaꞌ. Gaꞌi kami ngakkalan aꞌa duk gaꞌi sagetan kami meꞌ toloꞌ gaꞌi bennal usihat kamihin. Saguwaꞌ pinapastiꞌ teꞌed weꞌ kami toloꞌ mabennalin supaya kasulutan meꞌ aꞌahin si hinangan kamihin duk gaꞌ niyaꞌ panallaꞌande kami. Kēmon hinangan kamihin hinang kami si matahan Tuhan du.
[3] Bang niyaꞌ meꞌ aꞌa gaꞌi makahāti aka-aka mahāp inusihat kamihin, siye iyan meꞌ aꞌa tudju narkaꞌin.
[4] Gaꞌi kahagadde aka-aka mahāp inin peggeꞌ pinababbal siye weꞌ nakuraꞌ seyitanin, iye pagtuhanan weꞌ meꞌ aꞌa si dunya inin. Pinababbal siye weꞌ ne supaya gaꞌi tahātide aka-aka mahāp sabab Almasihin, weꞌ Almasi inin asal pinalangkew teꞌed duk lekkup iye neppu Tuhanin.
[5] Peggeꞌ dumaꞌin minahalayak kamihin sabab di kamihin saguwaꞌ iye minahalayak kamihin sabab Isa Almasi weꞌ iye asal Panuhutanin, bu kami inin kuweꞌ du daraꞌakanbi peggeꞌ magusihat kami si kaꞌam hawal lasa kami pu si Isahin.
[6] Tagnaꞌ dunya inin pinapanjari, missā Tuhanin duk pinadantaꞌ ne weꞌ ne dem lindemin. Kuweꞌ miyaꞌan du isab hininangne si kamihin. Peggeꞌ tagnaꞌ kuweꞌ dalil lindem teꞌed dem pikilan kamihin peggeꞌ gaꞌ kataꞌuhan kami sabab Almasi. Saguwaꞌ pinadantaꞌ ne weꞌ ne dem pikilan kamihin supaya tahāti kami balakatnen duk sahayanen laꞌi pu si Almasi.
[7] Kuweꞌ kami inin dalil paliyuk gaꞌi mahalgaꞌ peggeꞌ bisan gaꞌ niyaꞌ basag kami, saguwaꞌ pinangandel si kami weꞌ Tuhanin meꞌ lapalne mamahalgaꞌin, dinaꞌak inusihat supaya kataꞌuhan meꞌ aꞌahin weꞌ Tuhanin dapuꞌ balakat mahadjehin, dumaꞌin kami.
[8] Daran kami katekkahan kasusehan, saguwaꞌ gaꞌi kami taboꞌo. Bang patekka gaꞌi kami magkataꞌu-taꞌu bang ine subey hininang kamihin, saguwaꞌ gaꞌi tadaꞌag pamikil kamihin.
[9] Luwal kami bininasa weꞌ aꞌa, saguwaꞌ gaꞌi du kami pasagadan Tuhanin. Hebbaꞌ ne kami weꞌ banta kamihin, saguwaꞌ gaꞌi kami mula.
[10] Luwal talessa kami si baran kami meꞌ talabey si Isahin, sampay agen kami matey kuweꞌ kamateynen. Saguwaꞌ tinabangan kami weꞌ si Isa Almasi supaya pagkite meꞌ aꞌahin kami, kataꞌuhande du weꞌ bennal ellum si Isa.
[11] Tiggelan kami ellum, luwal kami siya-siya pinapatey sabab si Isa tinuhut kamihin, supaya sabab baran kami sukuꞌ mamatey inin, takite meꞌ aꞌahin du weꞌ ellum si Isa.
[12] Manjari, magsandal kami kabinasahan sampay agen kami matey sabab pagusihat kamihin supaya inin moleꞌ si kahāpanbi, peggeꞌ kaꞌujudannen ellum kaꞌam salama-lama.
[13] Niyaꞌ tasulat dem kitab, pinaꞌin, “Ngandel ku si Tuhan weꞌ tabanganne du ku, hangkan akaku inin si meꞌ pagkasikun.” Na, kami, ngandel isab kami si Tuhan duk aka kami inin si meꞌ aꞌahin,
[14] peggeꞌ kataꞌuhan kami weꞌ pinakellum weꞌ Tuhanin Panuhutanten bi si Isa, duk pakellumne du isab kami peggeꞌ sukuꞌ pu si Isa kami. Sampay kaꞌam pakellumne du isab duk boꞌone kite bi pī si palaꞌihannen si pasōngan.
[15] Kēmon meꞌ kabinasahan matekka si kamihin moleꞌ si kahāpanbi du. Duk bang magkatamba ne teꞌed meꞌ aꞌa masandel pu si Isa Almasihin sabab tabang Tuhan si siyehin, na, ekka teꞌed aꞌa iyan magpasalamat si Tuhan, hangkan tapudji teꞌed iye.
[16] Hangkan hep matuyuꞌ kami, gaꞌi kami padeheng magusihat. Bisan baran kamihin ngalamma duk ngabahiꞌ kami, saguwaꞌ sandel kamihin ngabasag ne paꞌin kahabaꞌ ellew.
[17] Gaꞌi du kuweꞌ ingge meꞌ kasusehan kamihin duk palabey du hadja, bang tapikil kami weꞌ kaꞌujudannen pinasukuhan kami kahāpan maglabi-labi duk layun salama-lama.
[18] Peggeꞌ dumaꞌin inapas kamihin meꞌ bayuꞌ-bayuꞌan takite tuꞌu si dunyahin, peggeꞌ gaꞌi du layun. Saguwaꞌ iye inapas kamihin meꞌ kahāpan manggaꞌi takitehin, peggeꞌ meꞌ kahāpan inin layun salama-lama.