[1] Sulat inin amban aku, si Paul duk amban Timoteo, pungtinaꞌiten bi. Amban bayaꞌ Tuhanin kawakilan ku weꞌ Isa Almasi dinaꞌak magmahalayak lapalnen. Pasampayku sulat inin piyu si pagtipunan meꞌ sukuꞌ si Tuhan maluꞌu si puweblo Korintohin sampay si kēmon aꞌa Tuhan si tibuꞌukan lahat Akayahin.
[2] Karayaw luwal kaꞌam ipat Samate bi Tuhanin duk Isa Almasi, Panuhutanten bi. Karayaw isab pasanyangde dem ateybin.
[3] Magsukul kite bi si Tuhan, iye Sama Panuhutanten bi Isa Almasi, peggeꞌ maꞌaseꞌ teꞌed iye duk be-tabang teꞌed iye.
[4] Ine-ine kasusehan kami, asigne kami supaya isab kami taꞌu ngasig meꞌ saweꞌ kamihin bang isab siye dem bayuꞌ-bayuꞌan kasusehan. Katabangan kami siye peggeꞌ bakas talabey kami ne tinabangan weꞌ Tuhanin.
[5] Peggeꞌ hadje sinandalan kamihin kuweꞌ sinandalan Almasihin, hadje du isab panabang Tuhan kamihin sabab Almasi.
[6] Magsandal kami kasusehan supaya kaꞌam taꞌasig kami duk supaya kaꞌam timbul. Tinabangan kami weꞌ Tuhanin supaya isab kaꞌam sinakup tinabangan weꞌ ne. Manjari matuyuꞌ ne kaꞌam magsandal meꞌ kasusehan kuweꞌ kasusehan talabey kamihin.
[7] Manjari gaꞌi duwe-duwehan pikilan kamihin sabab kaꞌam. Kataꞌuhan kami weꞌ peggeꞌ saliꞌ kaꞌam kuweꞌ kamihin magsandal kasusehan, tinabangan du isab kaꞌam weꞌ Tuhanin kuweꞌ panabangne kamihin.
[8] Meꞌ kapungtinaꞌihanku, batang kaꞌam akahan kami sabab kasusehan talabey kami laꞌi si lahat Asiyahin. Asal sigpit teꞌed kami manamal, agen ne gaꞌi tasandal kami. Gaꞌ ne kami ngase-ngase weꞌ ellum kami.
[9] Kannal kami weꞌ iye ne miyaꞌan kamatey kamihin. Saguwaꞌ hangkan miyaꞌan pinatekka si kami supaya kami gaꞌi ngandel si di kamihin, saguwaꞌ supaya kami ngandel dambuwaꞌ-buwaꞌ si Tuhan, iye mamakellum meꞌ pateyin.
[10] Pinaluwas kami weꞌ ne masa miyaꞌan amban kasiya-siyahan arak makamatey kamihin, duk paluwasne du isab kami iyan si pasōngan. Ngandel hadja kami si Tuhan weꞌ paluwasne du kami.
[11] Duk makajari isab kami tabanganbi bang māku-māku kaꞌam si Tuhan para si kami. Bang ekka kaꞌam mamāku-māku si Tuhan para si kamihin bu pangurung Tuhanin pināku-pākubin, manjari ekka magpasalamat si iyehin sabab panabangne kamihin.
[12] Niyaꞌ ne kabantuhan kami, peggeꞌ kataꞌuhan kami dem pikilan kami weꞌ kēmon addat kami si meꞌ aꞌahin, pasōng ne si kaꞌam, hāp du. Bentel teꞌed kawul-piꞌil kamihin peggeꞌ inurungan du kami kataꞌu weꞌ Tuhanin. Dumaꞌin kataꞌu manusiyaꞌ tinuhut kamihin saguwaꞌ iye hininang kamihin ngandel si tabang Tuhanin.
[13] Kēmon sinulat kami si kaꞌamin, tabatsabi duk tahātibi du. Kuweꞌitu gaꞌi pe tahātibi kēmon sabab hinang kamihin, saguwaꞌ ase-aseku weꞌ ujud tahātibi du kēmon, supaya kapagbantu kaꞌam sabab kami kuweꞌ kamihin magbantu du isab sabab kaꞌam bang tekka ellew pabalik Panuhutanten bi Isa Almasi.
[15] Ngase-ngase ku teꞌed weꞌ asal bantubi ku, hangkan hep ku miyaꞌan magsakap piyu nindew kaꞌam minduwe duk kaꞌam makasangka kahāpan minduwe.
[16] Peggeꞌ magsakap hep ku weꞌ meke ku palaꞌus hap Makedoniya pasagid ku dahuꞌ piyu nindew kaꞌam, ubus lengngan moleꞌ pasagid ku balik luꞌu duk ku tatabanganbi si palengngananku hap Yahudiyahin.
[17] Na, peggeꞌ gaꞌ ku lumaꞌus piyu, dumaꞌin hātinen weꞌ gaꞌi tentemanku bissākun. Asal gaꞌ du halin bayaꞌku mapiyuhin. Hatu kannalbi weꞌ sakapkun amban napsukun hadja, magaweꞌ ku dahuꞌ ubus bu maggaꞌi.
[18] Saguwaꞌ bang aku inin, dumaꞌin ku sa iyan. Kuweꞌ Tuhanin kapangandelan, kapangandelan du ku isab. Toꞌo meꞌ bissāku si kaꞌamin. Gaꞌi pagsagetku aweꞌin duk gaꞌihin.
[19] Si Isa Almasi, Anak Tuhanin, kapangandelan teꞌed. Iye minahalayak kami duk disi Silas duk Timoteohin. Si Isa puꞌunnen hangkan Tuhanin magaweꞌ pasal meꞌ sanggupnen,
[20] peggeꞌ Isa Almasi manumanan kēmon pananggup Tuhanin. Duk inin jānnen hangkan sabab Isa Almasi magpaꞌin kite bi “amin”, hātinen, “toꞌo iyan”. Manjari tapudji Tuhanin.
[21] Tuhanin hep manabangan kitehin bi supaya haget teꞌed sandelte pu si Isa Almasihin. Duk Tuhanin du isab mameneꞌ kitehin bi hinangne meꞌ sukuꞌ si iyehin.
[22] Ngahinang indan Tuhanin weꞌ kite bi sukuꞌ si iye. Pinatennaꞌ weꞌ ne Niyawa Sutsihin dem ateyte bi. Sabab Niyawa Tuhanin kabugtuꞌante bi weꞌ tasangkate bi du kēmon pinanyap Tuhan para si kitehin bi.
[23] Tuhanin saksiꞌkun, kataꞌuhanne dem ateykun. Asal toꞌo pinaꞌinku inin weꞌ hangkan ku gaꞌ ne piyu si kaꞌam luꞌu si Korinto peggeꞌ gaꞌi ku bayaꞌ ngamāhan kaꞌam.
[24] Gaꞌi kami mabayaꞌ magmanda si kaꞌam bang ine subey kinahagadbin. Asal du kataꞌuhan kami, teteg ne sandelbin pu si Isa Almasi. Saguwaꞌ mabayaꞌ hadja kami nabangan kaꞌam pasal panuhutbi Isa Almasihin supaya pasōng kēgbin.