[1] Manjari, pasal sīn panabangbi meꞌ pagkasibi sukuꞌ si Tuhan laꞌi si Yahudiyahin, hinangun bi isab sa pangandaꞌakanku meꞌ pagkasibi masandel pu si Isa malaꞌi si meꞌ kalahatan si Galatiyahin.
[2] Kahabaꞌ Ahad dangan-dangan kaꞌam subey ne paseddilibi andang sīn panabangbi siyehin. Bistahun bi ne taꞌusahabin simana mapalabeyin. Bang ekka taꞌusahabin subey isab ekka pangurungbin; bang kulang, na, kulang isab. Duk pagtipunun bi kēmon sīnin supaya bang ku tekka piyu, andang ne panyap panabangbin.
[3] Manjari bang ne ku luꞌu, daꞌakku pī meꞌ aꞌa tapeneꞌbin moꞌo panabangbin hap Awrusalam. Paboꞌohanku siye sulat supaya kataꞌuhande laꞌi bang ine aka meꞌ aꞌa mamoꞌo sīn iyan.
[4] Bang araꞌ-araꞌ subey ku isab pī si Awrusalam, na, makajari kami magtuhut.
[5] Piyu ku si kaꞌam saguwaꞌ pasagid ku dahuꞌ si Makedoniya nindew meꞌ kalanggalan malaꞌihin kuweꞌ bakas sinakapkun.
[6] Hatu patennaꞌ ku luꞌu si kaꞌam tiggel-tiggel. Hatu agadku ne bang puwas tempo baliyuhin, meke ku palanjal billuꞌu duk du ku tatabangbi si palengnganankun, tungan-tungan papīhankun.
[7] Gaꞌi ku bayaꞌ piyu bang daddaliꞌ ku hadja luꞌu. Kabayaꞌankun tiggel-tiggel ku luꞌu bang amban bayaꞌ Tuhan du.
[8] Saguwaꞌ gaꞌi ku dahuꞌ usaꞌ bittuꞌu amban Epesus samantaꞌan gaꞌi pe puwas kādjaꞌan Pentekostesin.
[9] Peggeꞌ ekka pe aꞌa tuꞌu mabayaꞌ pakale si lapal Tuhanin duk subey ku magmahalayak si siye bisan ne ekka nguntarahan aku.
[10] Bang piyu Timoteo luꞌu, amey-amey hatulun bi iye peggeꞌ maghinang isab iye si Tuhan kuweꞌ akuhin.
[11] Daꞌa iye diyawaꞌanun bi. Duk bang ne iye palanjal si palengnganannen, tabanganun bi iye duk hāp palumengngannen duk supaya iye tabalik pitu si aku. Peggeꞌ ase-aseku tekka iye pitu duk meꞌ pungtinaꞌite bi sinduwehin.
[12] Na, pasal pungtinaꞌiten bi si Apollos, sinegeꞌ teꞌed iye weꞌ ku dinaꞌak piyu nuhut sinduwe meꞌ kapungtinaꞌihanten bi nindew kaꞌam, saguwaꞌ gaꞌi pe koꞌ iye bayaꞌ piyu kuweꞌitu. Paꞌinne piyu du iye bang iye sumaluꞌ.
[13] Papateng-pateng kaꞌam. Patetegun bi sandelbi pu si Isa Almasihin. Subey kaꞌam magtawakkal, duk subey kaꞌam basag.
[14] Tuyuꞌanun bi lasabi si pagkasibin bisan ine-ine hinangbi.
[15] Na, meꞌ kapungtinaꞌihanku, kataꞌuhanbi du disi Estepanus duk meꞌ saweꞌne magtewtey-anakin. Siye hep dehellu-dehellu masandel pu si Isa Almasi luꞌu si lahat Akayahin. Duk iye bahanden luwal nabangan meꞌ pagkaside sukuꞌ si Tuhanin.
[16] Junjungku si kaꞌam, tuhutun bi ine-ine paꞌin meꞌ aꞌa kuweꞌ si Estepanus iyan duk sasuku saweꞌde manabangan siye maghinang si Tuhanin.
[17] Kēgan ku teꞌed sakaliꞌ tekka tuꞌu disi Estepanus duk Portunatus duk si Akaikus. Bisan kaꞌam gaꞌi tapitu kēmon, tasandalku ne pangessebkun sabab meꞌ aꞌa tellungan inin,
[18] peggeꞌ asig ateykun weꞌ de, kuweꞌ pangasigde isab ateybin. Pataꞌ pagaddatanbi meꞌ aꞌa kuweꞌ siye inin.
[19] Kēmon masandel pu si Isa Almasi tuꞌu si meꞌ kalahat-lahatan si Asiyahin maboꞌo bissā weꞌ taꞌessebde kaꞌam. Si Akila duk andanen Pirisila duk sampay meꞌ aꞌa masandel pu si Isa Almasi magtipun si lumaꞌden maboꞌo bissā du isab weꞌ daran kaꞌam essebde peggeꞌ sukuꞌ pu si Isa Almasi kaꞌam.
[20] Kēmon isab meꞌ kapungtinaꞌihante bi matuꞌuhin maboꞌo bissā weꞌ essebde kaꞌam. Duk kaꞌam isab maluꞌuhin, subey kaꞌam magsalam-sinalam, tandaꞌ weꞌ maglasa-ilasa kaꞌam.
[21] Kuweꞌitu aku, si Paul, manulat inin. Essebte kaꞌam kēmon.
[22] Bang niyaꞌ luꞌu gaꞌi malasa pu si Isa Almasi, Panuhutanten bi, legga Tuhanin du iye. Marana tha, hātinen, “O, Panuhutan kamihin, pitu ne kew.”
[23] Karayaw kaꞌam luwal ipat Panuhutanten bi Isa Almasi.
[24] Kalasahante kaꞌam kēmon meꞌ sukuꞌ pu si Isa Almasihin. Wassalam