[1] Na, pasal bakas tinilewbi si aku dem sulatbin, iye inin sambungku si kaꞌamin. Hāp isab bang lellahin gaꞌi maganda.
[2] Saguwaꞌ peggeꞌ iyuꞌ kuweꞌitu ekka lella duk dende magkahinangan laꞌat, gam pe kaꞌam dangan-dangan magella atawa maganda.
[3] Duk meꞌ maglewlekebinihin subey tuhutde kinabayaꞌan elladen atawa andaden. Gaꞌi hāp bang lellahin gaꞌi paꞌulid si andanen atawa bang andahin gaꞌi bayaꞌ bang ulidan ellanen.
[4] Peggeꞌ dendehin dumaꞌin iye magbayaꞌ si di barannen saguwaꞌ ellanen. Damikkiyan isab lellahin dumaꞌin iye magbayaꞌ si di barannen saguwaꞌ andanen.
[5] Daꞌa taggahanun bi kinabayaꞌan ellabin atawa andabin. Luwal bang asal pagisunanbi weꞌ gaꞌi dahuꞌ kaꞌam magulid supaya kaꞌam kapangampun-ngampun teꞌed. Saguwaꞌ meꞌ piyem bahangi hadja. Ubus magulid ne kaꞌam balik duk kaꞌam gaꞌi sassat seyitanin peggeꞌ kaw gaꞌi tasandalbi bayaꞌbin.
[6] Manjari, paꞌinku weꞌ makajari kaꞌam maganda atawa magella, saguwaꞌ dumaꞌin weꞌ daꞌakte kaꞌam.
[7] Bang siꞌ makajari, kabayaꞌankun hep weꞌ kaꞌam kuweꞌ akuhin gaꞌi maganda. Saguwaꞌ magseddili paggaraꞌ Tuhan si dangan-danganin; gaꞌi magsaliꞌ pinasukuꞌ Tuhan si meꞌ aꞌahin.
[8] Na, kaꞌam meꞌ subulin duk meꞌ budjangin duk meꞌ baluhin, iye inin paꞌinku si kaꞌam. Hāp bang kaꞌam kuweꞌ akuhin gaꞌi maganda atawa magella.
[9] Saguwaꞌ bang gaꞌi tasandalbi bayaꞌbin, maganda kaꞌam atawa magella kaꞌam. Hāp pe kaꞌam maganda amban magtiksaꞌ kaꞌam luꞌu nandalan bayaꞌbin.
[10] Si meꞌ maglewlekebinihin isab niyaꞌ daꞌakku si kaꞌam. Duk dumaꞌin hadja amban aku pangandaꞌakan inin saguwaꞌ amban Panuhutanten bi Isa Almasi. Paꞌinne hep weꞌ dendehin subey gaꞌi ambananne ellanen.
[11] Saguwaꞌ bang niyaꞌ dende bakas ngambanan ellane, subey iye gaꞌi magella si seddili atawa subey iye balik si ellanen duk maghāp duk iye. Lellahin isab subey gaꞌi timananne andanen.
[12] Na, si kaꞌam meꞌ sinduwehin, niyaꞌ isab bissāku si kaꞌam duk bissā inin amban aku hadja, dumaꞌin amban Isa Almasi. Bang upama niyaꞌ luꞌu maglewlekebini, lellahin sandel ne pu si Isa Almasi bu andanen gaꞌi, bang mabayaꞌ du andanen padambuwaꞌ pe si iye, na, daꞌa timananne andanen.
[13] Bang upama dendehin isab masandel pu si Isa Almasihin bu ellanen gaꞌi, bang mabayaꞌ du ellanen padambuwaꞌ pe si iye, na, daꞌa iye makatiman si ellanen.
[14] Peggeꞌ kaꞌam masandel pu si Isa Almasihin, bisan ellabin atawa andabin gaꞌi sandel pu si Isa Almasi, kuweꞌ du siye sukuꞌ si Tuhanin peggeꞌ magdambuwaꞌ du kaꞌam. Duk meꞌ anakbin kuweꞌ du isab sukuꞌ si Tuhanin. Peggeꞌ bang gaꞌi inin toꞌo, na, meꞌ anakbin kuweꞌ anak meꞌ aꞌa manggaꞌi manuhut Tuhanin.
[15] Saguwaꞌ bang upama asal gaꞌi ne mabayaꞌ padambuwaꞌ si kaꞌam ellabi atawa andabi manggaꞌi masandel pu si Isahin, gaꞌ niyaꞌ naggahan kaꞌam. Gaꞌi kaꞌam kapagduse bang magtiman kaꞌam, peggeꞌ dumaꞌin amban bayaꞌbi saguwaꞌ amban bayaꞌde du. Kabayaꞌan Tuhanin weꞌ sanyang hadja kaꞌam duk gaꞌi magsasew.
[16] Duk gaꞌi du kabugtuꞌanbi weꞌ taboꞌo pe sandel pu si Isa Almasi ellanen weꞌ andane masandelin atawa andanen weꞌ ellane masandelin duk iye timbul.
[17] Inin pamiꞌatku si kēmon pagtipunan meꞌ masandel pu si Isa Almasihin. Ine-ine pinasukuꞌ weꞌ Tuhan si kaꞌamin duk bang saꞌingge pagaꞌabin tagnaꞌ panuhutbi Isa Almasihin, daꞌa ne pindahanun bi.
[18] Bang upama aꞌahin andang ne taꞌislam gaꞌ pe iye sandel pu si Isa Almasi, na, gaꞌi subey ānanne tandaꞌ magislamin. Duk bang aꞌahin gaꞌ pe taꞌislam bu sandel ne iye pu Isa Almasi, na, gaꞌi iye subey magislam.
[19] Peggeꞌ bisan kite magislam atawa gaꞌi, gaꞌi inin mahalgaꞌ. Saguwaꞌ iye mamahalgaꞌin bang hinangte meꞌ pangandaꞌakan Tuhanin.
[20] Dumaꞌin iye subey inapasten bi weꞌ pinda pagaꞌaten bi amban pagaꞌate bi tagnaꞌ panuhutte bi Isa Almasihin.
[21] Bang banyagaꞌ kew bu sandel ne kew pu si Isa Almasi, ambat ne bisan kew banyagaꞌ. Saguwaꞌ bang makajari ne kew pinaluwas, hāp isab. Subey ne kew paluwas.
[22] Bang niyaꞌ banyagaꞌ nuhut Isa Almasi, bisan iye banyagaꞌ, iye matoꞌohin aꞌa luhaya iye si pagmatahan Almasi. Damikkiyan bisan bang aꞌahin dumaꞌin banyagaꞌ tagnaꞌ panuhutne Almasihin, kimmatan Almasi iye banyagaꞌne.
[23] Ilekkat kaꞌam weꞌ Tuhanin amban amubi dusehin duk langkew pangalekkatne kaꞌamin. Hangkan daꞌa kaꞌam pabanyagaꞌ si aꞌa saguwaꞌ pabanyagaꞌ kaꞌam si Tuhan.
[24] Hangkan hep meꞌ kapungtinaꞌihanku, saꞌingge-saꞌingge pagaꞌabin tagnaꞌ panuhutbi Isa Almasihin, daꞌa ne pindahanun bi duk pateteg kaꞌam si Tuhan.
[25] Na, bang pasal meꞌ budjangin atawa meꞌ subulin gaꞌ niyaꞌ pamiꞌatku amban Isa Almasi. Saguwaꞌ akahante kaꞌam bang ine tapikilkun sabab ininen. Aku inin bakas kaꞌaseꞌan weꞌ Tuhanin hangkan kapangandelan meꞌ bissākun.
[26] Bang si pikilanku, hāp pe bang aꞌahin gaꞌi magella atawa maganda. Peggeꞌ kuweꞌitu inin ekka ne meꞌ kasusehante bi.
[27] Bang niyaꞌ ne andabi, daꞌa timananun bi andabin. Bang gaꞌ niyaꞌ andabi, na, daꞌa ne kaꞌam batang maganda.
[28] Saguwaꞌ bang kaꞌam maganda, gaꞌi du kaꞌam kapagduse. Duk meꞌ budjangin isab bang magella gaꞌi du siye kapagduse. Hangkan paꞌinku weꞌ pasōng hāp bang gaꞌi kaꞌam maganda atawa magella peggeꞌ kabayaꞌankun gaꞌi ne talabeybi meꞌ kasusehan meꞌ aꞌa taga anda atawa taga ellahin.
[29] Meꞌ kapungtinaꞌihanku, iye hāti pinaꞌinku miyaꞌan, weꞌ gaꞌi du kite bi tiggel tuꞌu si dunya. Hangkan tinagnaꞌan maꞌin, meꞌ taga andahin, iye subey dehellu pinikilden hinangde para si Panuhutanten bi Isa Almasi. Meꞌ hinanganne para pu Almasihin subey kuweꞌ hinangan aꞌa bang gaꞌ niyaꞌ andane.
[30] Damikkiyan isab meꞌ magdukkahin, subey gaꞌi luwal tapikilde pagdukkaden. Meꞌ magkēgin, subey gaꞌi luwal tapikilde pagkēgden. Meꞌ magbelli-bellihin isab, subey gaꞌi kimmatande weꞌ di si siye meꞌ bakas tabellide miyaꞌan.
[31] Duk bisan ine-ine hinangte tuꞌu si dunya, subey kimmatante weꞌ gaꞌi du tantu mahalgaꞌ si kite peggeꞌ kēmon si dunya inin palabey du hadja.
[32] Kabayaꞌankun weꞌ gaꞌ niyaꞌ makaꞌalal kaꞌam maghinang si Tuhan. Lellahin bang gaꞌ niyaꞌ andane, iye tapikilnen hinangne si Panuhutanin Isa Almasi, bang saꞌingge ne duk Almasi kasulutan si hinangnen.
[33] Saguwaꞌ bang niyaꞌ andane, iye tapikilnen kaꞌelluman anak-andanen peggeꞌ kabayaꞌannen weꞌ andanen kasulutan si iye.
[34] Hangkan duwe pinikilnen, bang saꞌingge panulutne Tuhanin duk bang saꞌingge panulutne andanen. Damikkiyan isab dende manggaꞌ niyaꞌ ellanen, iye hadja tapikilnen maghinang si Tuhan duk bang saꞌingge ne duk Tuhanin kasulutan si iye. Pangurungne dinen dambūs-būs si Tuhan. Saguwaꞌ dende taga ellahin, iye tapikilnen meꞌ hinangan si anak-ellanen peggeꞌ kabayaꞌannen weꞌ kasulutan ellanen si iye.
[35] Paꞌinku inin peggeꞌ bayaꞌ kaꞌam tabanganku, dumaꞌin weꞌ bayaꞌ kaꞌam pahunitanku. Kabayaꞌankun weꞌ hinangbi sasuku mapatutin duk maghinang kaꞌam dambūs-būs si Tuhan hadja.
[36] Na, inin pasal budjang sōng laꞌunan. Bang matettoꞌanen paꞌinne weꞌ gaꞌi patut bang gaꞌi iye pinaꞌellahan bu budjangin mabayaꞌ du isab taga ella, na, subey ne iye pinaꞌellahan. Gaꞌ du niyaꞌ duse matettoꞌanen.
[37] Saguwaꞌ bang aꞌahin kabugtuꞌanne dem ateyne weꞌ subey gaꞌi magella anakne budjangin bu gaꞌ du niyaꞌ nganggagahan iye gaꞌi dinaꞌak pinaꞌellahan anaknen saguwaꞌ amban bayaꞌne hadja gaꞌi magella anaknen, na, hāp isab hinanganne miyaꞌan.
[38] Hap bang paꞌellahanne anaknen saguwaꞌ mas pasōng hāp bang gaꞌi paꞌellahanne.
[39] Dendehin gaꞌi makajari magella si lella seddili samantaꞌan ellum ellanen. Saguwaꞌ bang matey ne ellanen makajari iye magella balik si lella kinabayaꞌannen. Saguwaꞌ subey lella miyaꞌan sandel isab pu si Isa Almasi kuweꞌ iyehin.
[40] Saguwaꞌ bang si pikilanku, hāp pe iye gaꞌi magella balik duk kahagadku weꞌ pikilanku inin amban Niyawa Tuhanin.