[1] Na, pasal mangan sinumbaliꞌ bakas sinōngan weꞌ meꞌ aꞌa si meꞌ tuhan-tuhan sinumbaden. Toꞌo bakas pinaꞌinbin weꞌ kataꞌuhante bi du, weꞌ meꞌ tuhan-tuhande inin gaꞌ niyaꞌ balakatde. Saguwaꞌ bayuꞌan kinataꞌuhanbi iyan malangkew ateybi peggeꞌ meꞌ saweꞌbi sinduwehin gaꞌi kataꞌuhande inin. Gaꞌi makatabang saweꞌten bang langkew ateyten saguwaꞌ luwal bang malasa kite si saweꞌten, iye iyan makabasag sandelde si Tuhanin.
[2] Bang pikil aꞌahin ekka ne kataꞌuhanne, hātinen gaꞌi pe kataꞌuhanne teꞌed.
[3] Saguwaꞌ bang aꞌahin asal kalasahanne teꞌed Tuhanin, kimmatan Tuhanin aꞌa miyaꞌan weꞌ sukuꞌ si iye.
[4] Manjari pasal pamangan sinumbaliꞌ bakas sinōngan si meꞌ tuhan-tuhanin, sa bakas pinaꞌinku si kaꞌam dehelluhin, kataꞌuhante bi du weꞌ meꞌ tuhan-tuhande iyan dumaꞌin du Tuhan toꞌo duk kataꞌuhante bi weꞌ dambuwaꞌ-buwaꞌ du hadja Tuhan mabennalin.
[5] Bisan paꞌin aꞌahin weꞌ niyaꞌ tuhan-tuhande diyataꞌ langit duk tuꞌu si dunya duk bisan ekka pagtuhanande sa iyan,
[6] saguwaꞌ bang si kite bi, dambuwaꞌ-buwaꞌ du hadja Tuhanin, iye Samaten bi duk iye magpapanjari kēmon-kēmonin. Iye mangurungan kite umulin supaya tapahadjete iye tiggelante maꞌellumin. Duk dambuwaꞌ du hadja Panuhutanten bi, si Isa Almasi. Kēmon-kēmonin pinapanjari weꞌ Almasi sabab kapatutne amban Tuhanin duk Almasi sababnen hangkan kite bi kaꞌurungan umul.
[7] Saguwaꞌ niyaꞌ meꞌ pagkasite bi masandel pu si Isa Almasihin, gaꞌ pe kataꞌuhande weꞌ gaꞌ niyaꞌ balakat meꞌ tuhan-tuhanin. Peggeꞌ tagam siye matuꞌuhin si meꞌ tuhan-tuhan miyaꞌan, hangkan bang siye kuweꞌitu mangan kinakan bakas sinōngan si meꞌ tuhan-tuhan, kannalde asal sumakup pe siye numba si tuhan-tuhan miyaꞌan. Manjari sasew dem pikilanden; kannalde kapagduse ne siye bang siye makaꞌakan kinakan bakas sinōngan si meꞌ tuhan-tuhan.
[8] Saguwaꞌ dumaꞌin hep kinakanten makaboꞌo kite si Tuhanin. Gaꞌ niyaꞌ kinakan bang gaꞌi kakante makakulang kahāpante si pagmatahan Tuhanin, atawa bang kakante makapasōng kahāpante si pagmatahan Tuhanin.
[9] Saguwaꞌ bisan ne kaꞌam makajari mangan kinakan ine-ine, pahatul-hatul hadja kaꞌam kaw sabab pamanganbin niyaꞌ meꞌ pagkasibi gaꞌi pe basag sandelde si Tuhanin kapagduse sababbi.
[10] Bang upama niyaꞌ dangan saweꞌbi ngite kaꞌam mangan dem lumaꞌ panumbahan meꞌ tuhan-tuhanin. Kataꞌuhanbi weꞌ gaꞌi du toꞌo meꞌ tuhan-tuhan miyaꞌan duk gaꞌi du kaꞌam numba siye, saguwaꞌ awam saweꞌbi miyaꞌan sabab inin. Manjari hatu batukanne kaꞌam duk pī isab iye mangan bisan du paꞌinne weꞌ magduse iye bang hinangne miyaꞌan.
[11] Matey Isa Almasi para si kahāpan pungtinaꞌibi malamma sandelne miyaꞌan. Saguwaꞌ peggeꞌ paꞌinbi weꞌ makajari kaꞌam mangan kinakan miyaꞌan, taboꞌo si kalaꞌatan aꞌa miyaꞌan sababbi peggeꞌ paꞌinbi weꞌ gaꞌi makaꞌine bang kaꞌam mangan kinakan miyaꞌan.
[12] Sabab hininangbi miyaꞌan kapagduse kaꞌam teꞌed pu Isa Almasi, peggeꞌ kapagduse kaꞌam si pungtinaꞌibi malamma sandelne miyaꞌan. Sasew ne iye dem pikilanne peggeꞌ tapikilne weꞌ bakas magduse iye.
[13] Hangkan hep, bang aku jānnen hangkan kapagduse pagkasiku masandel pu si Isahin peggeꞌ mangan ku sinumbaliꞌ, na, gaꞌi ne ku teꞌed mangan sinumbaliꞌ tiggelanku maꞌellumin, basta gaꞌi hadja kapagduse pagkasikun.