[1] Manjari, pikilankun gaꞌi ne ku piyu duk kaꞌam gaꞌi suse weꞌ ku balik.
[2] Peggeꞌ bang ku makasuse kaꞌam, sine ne makakēg akuhin? Kaꞌam hep hadja makakēg akuhin.
[3] Kataꞌuhanku, bang ku sinna, sinna du isab kaꞌam. Gaꞌi ku bayaꞌ piyu bang suse ku hadja sabab meꞌ hinanganbi manggaꞌi mahāpin. Bu kaꞌam hep subey makēg akuhin. Iye hep inin sababnen hangkan kaꞌam sulatanku hadja masa miyaꞌan.
[4] Panulatku si kaꞌamin, suse ku teꞌed dem ateykun duk tumangis ku. Saguwaꞌ dumaꞌin hangkan kaꞌam sulatanku weꞌ supaya kaꞌam suse, saguwaꞌ supaya kataꞌuhanbi bang saꞌingge hadje lasaku si kaꞌamin kēmon.
[5] Na, pasal aꞌa maluꞌu si kaꞌam bakas kapagdusehin, dumaꞌin hep aku hadja pinasusenen, saguwaꞌ pasōng pe kaꞌam luꞌu suse weꞌ ne. Atawa bang dumaꞌin kaꞌam kēmon, bugtuꞌ meꞌ sinduwehin kaꞌam suse. Gaꞌi ku isab bayaꞌ ngandiyawaꞌan iye palanduꞌ.
[6] Maꞌekkahin kaꞌam ngalegga iye ne duk sarang ne pangaleggabi iye miyaꞌan.
[7] Kuweꞌitu subey iye ampunbi duk subey asigbi ateynen. Kaw iye lumanduꞌ magsuse duk kuweꞌ aꞌa lambo ne iye.
[8] Hangkan junjungku si kaꞌam, pakitehanun bi balik lasabi si iyehin.
[9] Iye hep inin isab sababnen hangkan kaꞌam sulatanku, panuleyanku kaꞌam bang asal tuhutbi du pangandaꞌakanku si kaꞌamin.
[10] Bang niyaꞌ pagkasibi luꞌu ampunbi, aku ampunku du isab iye. Bang upama niyaꞌ subey ampunku, ampunku du para si kahāpanbi kēmon si pagmatahan Almasi.
[11] Hangkan subey ampunte saweꞌte kapagdusehin supaya kite bi gaꞌi tapadupang weꞌ nakuraꞌ seyitanin peggeꞌ kataꞌuhante bi du bang ine meꞌ kabayaꞌannen.
[12] Manjari pagtekka ku si puweblo Toroas magmahalayak aka-aka mahāp sabab Isa Almasihin, takiteku weꞌ andang ne pinanyap weꞌ Tuhanin lānin supaya ku kapaghinang si iye laꞌi.
[13] Saguwaꞌ suse ku manamal peggeꞌ gaꞌ takasuwaꞌku laꞌi si Titus, pungtinaꞌiten bi. Hangkan nabiyaꞌ ne ku si meꞌ aꞌa Toroasin duk palanjal ku hap Makedoniya.
[14] Saguwaꞌ asal magsukul kami teꞌed si Tuhan, peggeꞌ magdambuwaꞌ kami duk Almasi duk luwal kami tahinang tandaꞌ weꞌ Tuhanin, tandaꞌ weꞌ Almasihin mangandaꞌagin duk kami kuweꞌ meꞌ pilisunen. Duk ginuna kami inin weꞌ ne magpalatag si kēmon lahat aka-aka sabab Almasihin. Inin kuweꞌ dalil bengngi kamanyan manyug.
[15] Kuweꞌ ne kami inin kamanyan tinugtug weꞌ Almasi si Tuhan. Aka-aka inusihat kamihin kuweꞌ bengngi manyug pī si kēmon aꞌahin, meꞌ aꞌa matimbulin duk meꞌ aꞌa manggaꞌi matimbulin.
[16] Si meꞌ manggaꞌi matimbulin inusihat kamihin kuweꞌ dalil bewwan makamatey siye. Saguwaꞌ bang si meꞌ matimbulin, usihat kamihin kuweꞌ dalil bengngi ngurungan siye umul. Asal hunit hep teꞌed hinang inin. Agen gaꞌi tahinang weꞌ manusiyaꞌ.
[17] Dumaꞌin ku inin kuweꞌ meꞌ aꞌa sinduwehin magusihat lapal Tuhanin duk hadja siye makasangka sīn. Kuweꞌ hinangde dagangan lapal Tuhanin. Saguwaꞌ peggeꞌ asal Tuhanin mangandaꞌak kamihin, iye puꞌunnen hangkan magusihat kami dambūs-būs atey kamihin si matahan Tuhan. Iye hep patut si kami meꞌ daraꞌakan Almasihin.