[1] Na, meꞌ bagayku kinalasahankun, kēmon meꞌ sanggup Tuhan inin para si kite bi hep. Hangkan subey ne lebbahante bi ine-ine makasabul, bang hinangan laꞌat ke atawa pikilan laꞌat. Subey teꞌed kite bi talew si Tuhan supaya kite bi asal tattap ne teꞌed hāp.
[2] Subey ne kaꞌam pasōng malasa si kami. Gaꞌ kami bakas maghinang laꞌat si kaꞌam bisan dambuwaꞌ, atawa moꞌo kaꞌam maghinang laꞌat. Gaꞌ niyaꞌ kaꞌam bakas taliba kami.
[3] Dumaꞌin hangkan inin paꞌinku weꞌ amāhante kaꞌam. Peggeꞌ tabalikku pinaꞌinku tagnaꞌin, kalasahante kaꞌam teꞌed. Bisan kite bi ellum atawa matey, masi ku malasa si kaꞌam.
[4] Ngandel ku teꞌed si kaꞌam, duk luwal kaꞌam pahadjeku si meꞌ aꞌa. Bisan ekka katiksaꞌan kami, gaꞌi ku suse saguwaꞌ asig ne ku teꞌed. Sinna ku teꞌed.
[5] Bisan katekka kami si Makedoniyahin, masi du kami gaꞌi humali peggeꞌ ekka kasasewan kami. Niyaꞌ ne nganjawab kami duk nasaꞌan kami. Duk suse isab kami.
[6] Saguwaꞌ Tuhanin taꞌu ngasig masusehin duk pinakēg kami weꞌ ne sakaliꞌ si Titus tekka si kami.
[7] Dumaꞌin hadja katekkanen makakēg kamihin, saguwaꞌ meꞌ inaka-akane isab si kamihin. Paꞌinne weꞌ asig koꞌ teꞌed ateynen sababbi. Paꞌinne isab weꞌ bayaꞌ koꞌ teꞌed kaꞌam magkite duk aku. Hadje koꞌ pagsusunanbi sabab maꞌumantag si kaꞌamin duk sinna ne koꞌ kaꞌam mēbbegan aku. Hangkan hep asal pasōng ne ku kēgan kuweꞌitu.
[8] Peggeꞌ bisan kaꞌam suse sabab sulatku si kaꞌam miyaꞌan, gaꞌi ku magsusun weꞌ tapaboꞌohante kaꞌam sulat miyaꞌan. Toꞌo tagnaꞌ magsusun ku, sakaliꞌ kataꞌuhanku weꞌ suse kaꞌam bisan daddaliꞌ hadja sabab sulat miyaꞌan.
[9] Saguwaꞌ kuweꞌitu kēgan ku. Dumaꞌin hangkan ku kēgan peggeꞌ bakas suse kaꞌam, saguwaꞌ puꞌunku kēgan peggeꞌ hawal susebin pinindahan ne weꞌ bi meꞌ hinanganbin. Susebi miyaꞌan amban Tuhan supaya kaꞌam magsusun. Hangkan hep paꞌinku weꞌ sulatku miyaꞌan moleꞌ si kahāpanbi.
[10] Peggeꞌ bang pagsuse aꞌahin amban Tuhan, makajari miyaꞌan puꞌunnen hangkan pagsusunanne dusenen duk pindahanne ne ateynen. Duk gaꞌi ne inin laꞌat peggeꞌ kaꞌujudannen ellum iye salama-lama. Saguwaꞌ pagsuse meꞌ aꞌa manggaꞌi manuhut Tuhanin, gaꞌi makapinda ateyde duk makaboꞌo siye pe matey.
[11] Payamanun bi bang ine kaꞌujudan pagsusebi miyaꞌan, peggeꞌ susebin amban Tuhan. Kuweꞌitu paggeꞌesanbi ne pinabentel meꞌ hinanganbin. Bayaꞌ ne teꞌed kaꞌam magaka si aku weꞌ gaꞌ du kaꞌam lumamud si hinangan aꞌa miyaꞌan. Duk kabunsihanbi ne teꞌed hinangan aꞌa makaꞌiyaꞌ-iyaꞌ miyaꞌan. Tinalew isab kaꞌam. Kuweꞌitu bayaꞌ ne kaꞌam weꞌ magkite kite bi balik duk mabayaꞌ kaꞌam weꞌ kasulutan ku si kaꞌam. Magtawus isab ilegga weꞌ bi aꞌa bakas magdusehin. Sabab kēmon inin pinapastiꞌ weꞌ bi si aku weꞌ gaꞌ niyaꞌ lamudbi si dusene miyaꞌan.
[12] Dumaꞌin hep hadja para si kahāpan aꞌa kapagdusehin atawa para si kahāpan aꞌa pagdusehannen hangkan ku nulat si kaꞌam. Saguwaꞌ puꞌunku nulat supaya tapapastiꞌku si kaꞌam weꞌ hadje du lasabi si kamihin. Duk inin kataꞌuhan Tuhanin.
[13] Hangkan hep asig teꞌed atey kamihin. Duk dumaꞌin hadja asig atey kamihin saguwaꞌ kēgan isab kami sakaliꞌ takite kami weꞌ kēgan si Titus. Puꞌunne kēgan peggeꞌ pinasanyang weꞌ bi dem ateynen.
[14] Bakas sanglitante kaꞌam pagbissā kami duk si Titusin masa gaꞌ pe iye tapiyu si kaꞌam. Sinna ku isab peggeꞌ sakaliꞌ ne iye tapiyu gaꞌ du ku iyaꞌ si bissāku miyaꞌan peggeꞌ takitene weꞌ asal toꞌo meꞌ pananglitku kaꞌamin. Kēmon hep meꞌ bakas pinaꞌinku si kaꞌamin toꞌo. Duk takite ne weꞌ toꞌo isab meꞌ pinaꞌinku pu si Titusin.
[15] Hangkan hep magkasōng lasane si kaꞌamin bang taꞌessebne weꞌ tinuhut teꞌed weꞌ bi meꞌ pangandaꞌakannen duk weꞌ tinalew kaꞌam kaw iye gaꞌi kasulutan si kaꞌam.
[16] Hangkan sinna ku peggeꞌ kataꞌuhanku weꞌ asal kapangandelan ne kaꞌam.