[1] Sulat inin amban si Paul pinasampay piyu si kaꞌam meꞌ masandel pu si Isa Almasi maluꞌu si meꞌ kalahatan Galatiyahin. Kawakilan ku dinaꞌak magmahalayak saguwaꞌ kapatutkun dumaꞌin amban manusiyaꞌ duk dumaꞌin aꞌa mangawakilan akuhin. Kawakilan ku weꞌ Isa Almasi duk weꞌ Samaten bi Tuhanin, iye mamakellum Isa Almasi amban kamateynen.
[2] Aku inin duk kēmon meꞌ kapungtinaꞌihante bi matuꞌuhin maboꞌo bissā piyu si kaꞌam meꞌ pagtipunan masandel pu si Isa Almasi maluꞌuhin weꞌ inesseb kaꞌam weꞌ kami.
[3] Karayaw kaꞌam luwal ipat Samaten bi Tuhanin duk Isa Almasi, Panuhutanten bi. Karayaw isab weꞌ urungande kaꞌam kasanyangan dem ateybi.
[4] Si Isa Almasi, pinaglillaꞌ hep weꞌ ne umulnen supaya kapuwasan meꞌ duseten bi duk supaya kite bi gaꞌi ne nuhut meꞌ aꞌa maghinangan malaꞌat tuꞌu si dunya kuweꞌitu inin. Hininang inin weꞌ Isa Almasi peggeꞌ asal inin kinabayaꞌan Samaten bi Tuhanin.
[5] Pudjite bi Tuhanin salama-lama. Amin.
[6] Asal ulaliꞌ ku teꞌed si kaꞌam bang weꞌey kaꞌam mura-mura nayikutan Tuhanin bu tapeneꞌ kaꞌam weꞌ ne sabab lasa duk aseꞌ Almasi si kaꞌamin. Duk iye tinuhutbin kuweꞌitu, usihat seddili sabab bang saꞌingge panimbul Tuhan kitehin bi.
[7] Saguwaꞌ iye matoꞌohin, gaꞌ niyaꞌ toloꞌ seddili bang pasal panimbul Tuhan kitehin bi. Saguwaꞌ niyaꞌ hadja meꞌ aꞌa batang sasewde pikilanbin duk batang pindahande aka-aka hāp sabab Isa Almasihin.
[8] Saguwaꞌ bang niyaꞌ aꞌa atawa bisan pe kami atawa bisan pe malaꞌikat amban surgaꞌ bu magmahalayak iye aka-aka hāp seddili amban toloꞌ mabennal bakas minahalayak kami si kaꞌamin, asal tapī iye si narkaꞌ.
[9] Bakas tapaꞌin kami ne inin matuꞌuhin duk tabalikku kuweꞌitu weꞌ bang niyaꞌ magmahalayak, bahasane aka-aka hāp bu seddili amban toloꞌ mabennal bakas minahalayak kami si kaꞌamin, asal tapī iye si narkaꞌ.
[10] Daꞌa pikilun bi weꞌ iye inapaskun sanglitan aꞌa ku. Peggeꞌ asal inapaskun weꞌ sanglitan Tuhanin ku. Daꞌa pikilun bi weꞌ iye inapaskun weꞌ kasulutan meꞌ aꞌahin si aku. Peggeꞌ bang inin inapaskun gaꞌi siꞌ ku maghinang pu si Isa Almasi.
[11] Meꞌ kapungtinaꞌihanku masandel pu si Isa Almasihin, batang kaꞌam paꞌessebanku weꞌ aka-aka hāp minahalayakku si kaꞌamin dumaꞌin amban pikilan aꞌa paguwaꞌannen.
[12] Gaꞌ tasangkaku toloꞌ inin amban manusiyaꞌ. Gaꞌ ku kaꞌusihatan weꞌ sine-sine sabab inin. Saguwaꞌ tasangkaku inin amban Isa Almasi. Pinakataꞌu inin weꞌ ne si aku.
[13] Bugtuꞌ bakas takalebi sabab meꞌ hinanganku matuꞌuhin masa patuhut pe ku teꞌed si āgama Yahudi. Bininasa hep teꞌed weꞌ ku meꞌ masandel pu si Isahin duk maggeꞌes ku supaya hadja magkaꞌat sandelden duk gaꞌ niyaꞌ talebbi nuhut si Isa.
[14] Meꞌ pagkasiku Yahudi saliꞌ umul kamihin, gaꞌi siye makaꞌatu si aku magāgama. Asal inelleg teꞌed weꞌ ku meꞌ biꞌat-biꞌatan meꞌ kapapuꞌan kamihin.
[15] Saguwaꞌ bisan ku kuweꞌ miyaꞌan, kinalasahan ku duk kaꞌaseꞌan ku weꞌ Tuhanin. Gaꞌ pe ku inanakan, andang ne ku tapeneꞌ weꞌ ne duk hininang ku weꞌ ne daraꞌakanne.
[16] Pagtapikil Tuhanin weꞌ pakitehanne si aku Anaknen supaya tamahalayakku aka-aka mahāp sabab Anaknen si meꞌ kabangsahan dumaꞌin Yahudi, gaꞌ ku pī pu sine-sine pakitoloꞌ sabab inin.
[17] Gaꞌ ku bisan pī si Awrusalam si meꞌ aꞌa kawakilan dehellu amban akuhin. Saguwaꞌ magtawus ku hap pī si lahat Arab ubus bu balik ku pī hap Damaskus.
[18] Puwas tellun tahun bahu pī ku hap Awrusalam mayaman si Petros duk laꞌi ku si iye duwe simana.
[19] Gaꞌ niyaꞌ seddili meꞌ bakas kawakilanin takiteku luwal si Yakub, sali Panuhutanten bi.
[20] Meꞌ sinulatku inin asal toꞌo. Tiyaꞌ Tuhanin mayam-mayam, asal gaꞌi ku magdustaꞌ.
[21] Puwas miyaꞌan hap pī ku si meꞌ kalahatan laꞌi si Siriya duk laꞌi si Kilikiya.
[22] Masa miyaꞌan gaꞌ pe ku bakas takite weꞌ meꞌ masandel pu si Isa Almasi laꞌi si lahat Yahudiyahin.
[23] Bakas kaꞌakahan hadja siye weꞌ aku aꞌa bakas maminasa siye matuꞌuhin supaya gaꞌi ne siye sandel pu si Isa Almasi. Bu kuweꞌitu koꞌ magmahalayak ne ku weꞌ subey meꞌ aꞌahin sandel pu si Isa Almasi.
[24] Duk pinudji weꞌ de Tuhanin peggeꞌ sandel ne ku pu si Isa Almasi.