[1] Meꞌ kapungtinaꞌihanku, bang niyaꞌ dambuwaꞌ pagkasibi masandel pu si Isa Almasihin tasaꞌut maghinangan laꞌat, kaꞌam meꞌ pinagbayaꞌan weꞌ Niyawa Tuhanin subey iye sagdabi supaya iye taboꞌobi balik nuhut kinabayaꞌan Tuhanin. Saguwaꞌ subey pahāp-hāpbi panoloꞌbi iyehin. Duk pahatul-hatul kaꞌam kaw kaꞌam isab tasassat weꞌ seyitanin duk kapagduse kaꞌam.
[2] Magtabang-tinabang kaꞌam peggeꞌ bang hinangbi inin, tuhutbi pangandaꞌakan Isa Almasihin.
[3] Bang niyaꞌ aꞌa magpikil weꞌ hāp ne teꞌed iye, bu gaꞌi du, aꞌa iyan madupang dine hadja.
[4] Subey kaꞌam dangan-dangan pandogahanbi pahāp-hāp di hinanganbin. Bang asal hāp hinanganbin makajari kaꞌam sinna si dibin. Daꞌa iye pagsinnahanbin weꞌ hāp hinanganbin amban hinangan saweꞌbin.
[5] Peggeꞌ kite bi dangan-dangan subey kuwiraw si di hinanganten bi.
[6] Duk kaꞌam meꞌ inusihatan lapal Tuhanin, subey tabangbi sukal aꞌa magusihat si kaꞌamin.
[7] Daꞌa kaꞌam salaꞌ si pamikilbin. Gaꞌi tapadupang Tuhanin. Ine-ine tanem aꞌahin, iye du isab bayuꞌan miyaꞌan taꞌeddoꞌnen. Hātinen ine-ine hinang aꞌahin, tinumbasan iye sa hininangnen.
[8] Bang iye tinuhutnen napsunen, iye panumbas iyehin matey du iye duk tapī si narkaꞌ. Bang iye tinuhutnen kinabayaꞌan Niyawa Tuhanin, panumbas iyehin umul gaꞌ niyaꞌ tamananne si surgaꞌ.
[9] Hangkan, subey kite bi gaꞌi jumuꞌ maghinangan hāp. Peggeꞌ bang maghinangan hāp ne paꞌin kite, niyaꞌ waktu si pasōngan, urungan Tuhanin kite bi kahāpan.
[10] Hangkan kahabaꞌ niyaꞌ lugalte bi subey kite bi maghinangan hāp si kēmon aꞌa, lagiꞌ ne si meꞌ pungtinaꞌite bi masandel pu si Isa Almasihin.
[11] Payamanun bi meꞌ sulatan mahadje inin. Aku manulat inin tuꞌu si panambusan sulatkun.
[12] Meꞌ aꞌa luwal manegeꞌ-negeꞌ kaꞌam dinaꞌak magislamin, iye inapasden weꞌ sanglitan meꞌ Yahudihin siye. Tinalew siye si meꞌ pagkaside Yahudihin kaw siye bininasa sabab sandelde pu si Isa Almasi mamatey diyataꞌ olomin.
[13] Bisan du siye magtoloꞌ weꞌ subey kaꞌam magislam sa pangandaꞌakan saraꞌ tasulat weꞌ si Musahin, gaꞌi du tuhutde kēmon pangandaꞌakan dem saraꞌin. Segeꞌde kaꞌam magislam supaya hadja siye kapagabbu weꞌ siye makahumatan kaꞌamin hangkan kaꞌam magislam.
[14] Saguwaꞌ aku, gaꞌ niyaꞌ seddili pagabbuhanku luwal hadja sabab kamatey Panuhutanten bi, Isa Almasi sababku. Peggeꞌ matey iye ilansang diyataꞌ olom supaya ku tapaluwasne amban dusekun. Duk sabab kamateynen gaꞌi ne ku taboꞌo-boꞌo weꞌ meꞌ napsu malaꞌat si dunya inin duk gaꞌ ne niyaꞌ bayaꞌku si meꞌ hinangan malaꞌat si dunya inin.
[15] Gaꞌ niyaꞌ kagunahanne bisan aꞌahin magislam atawa gaꞌi. Iye mamahalgaꞌin weꞌ bakas binaꞌahuhan ne kite weꞌ Tuhanin.
[16] Kēmon manuhut meꞌ pinaꞌinku inin, karayaw siye kaꞌaseꞌan Tuhanin duk karayaw pasanyangne dem ateyden, duk dumaꞌin hadja siye, saguwaꞌ kēmon isab meꞌ aꞌa Tuhanin, Yahudi ke atawa dumaꞌin Yahudi.
[17] Tinagnaꞌan maꞌin kabayaꞌankun gaꞌ ne niyaꞌ nasew aku pasal kapatutku magmahalayak sabab si Isa Almasihin. Sabab meꞌ paliꞌ si baranku inin pastiꞌ weꞌ daraꞌakan Isa Almasi ku.
[18] Meꞌ kapungtinaꞌihanku, karayaw du kaꞌam luwal ipat Isa Almasi, Panuhutanten bi. Amin. Wassalam