[1] Paglabey sampūꞌ duk ampat tahun, hap pī ku balik si Awrusalam magtuhut duk Barnabas. Binoꞌo isab weꞌ ku si Titus.
[2] Hap pī ku miyaꞌan peggeꞌ pinakataꞌu si aku weꞌ Tuhanin weꞌ subey ku pī. Pagtekka kami laꞌi, magmiting kami duk meꞌ nakuraꞌ meꞌ masandel pu si Isa Almasihin, kami-kami hadja. Pinahātihan weꞌ ku si siye bang ine aka-aka mahāp minahalayakku si meꞌ aꞌa dumaꞌin Yahudihin. Hangkan siye pinahātihan weꞌ ku peggeꞌ kaw siye gaꞌi kasulutan duk kaw paꞌinde weꞌ gaꞌ niyaꞌ kasuddahan meꞌ bakas tahinangkun atawa meꞌ hininangku masa miyaꞌan.
[3] Saguwaꞌ kasulutan du siye si meꞌ hinangkun. Peggeꞌ si Titus, saweꞌkun, bisan iye bangsa Girik, gaꞌ du iye segeꞌde dinaꞌak magislam.
[4] Saguwaꞌ niyaꞌ laꞌi meꞌ aꞌa pasakup si pagmitingan kami miyaꞌan magmā-mā weꞌ siye meꞌ pungtinaꞌite bi sandel pu si Isa Almasi. Kabayaꞌanden weꞌ si Titus subey magislam. Hap pī hadja siye magispay bang kite bi meꞌ masandel pu si Isa Almasihin nuhut meꞌ pangandaꞌakan saraꞌ tasulat si Musahin ke atawa gaꞌi. Peggeꞌ kabayaꞌanden weꞌ pabanyagaꞌ ne paꞌin kite bi nuhut saraꞌin bisan du kite bi bakas pinaluwas ne weꞌ Isa Almasi amban pamanyagaꞌan kitehin bi duk gaꞌ ne niyaꞌ kaput saraꞌin si kite bi.
[5] Saguwaꞌ gaꞌ teꞌed tuhut kami kinabayaꞌanden peggeꞌ gaꞌi kami bayaꞌ weꞌ toloꞌ mabennalin, hātinen aka-aka hāp sabab Isa Almasihin, kasagetan weꞌ toloꞌ gaꞌi bennal.
[6] Meꞌ nakuraꞌ meꞌ masandel pu si Isa Almasihin, pagkalede meꞌ panoloꞌkun, gaꞌ niyaꞌ panallaꞌde duk gaꞌ isab niyaꞌ panambade. Bisan siye kinimmatan meꞌ aꞌa langkew, gaꞌi du makaꞌine si aku, peggeꞌ bang si Tuhan saliꞌ-saliꞌ du meꞌ aꞌahin kēmon.
[7] Tasabutde ne masa miyaꞌan weꞌ hinang pinangandel si aku weꞌ Tuhanin, magmahalayak aka-aka hāp sabab Isa Almasihin pī si meꞌ kabangsahan dumaꞌin Yahudi, kuweꞌ si Petrosin isab iye hinang pinangandel si iyehin, magmahalayak pī si meꞌ Yahudi.
[8] Tuhanin, kawakilan weꞌ ne si Petros dinaꞌak magmahalayak si meꞌ Yahudihin. Damikkiyan isab kawakilan ku weꞌ ne dinaꞌak magmahalayak si meꞌ dumaꞌin Yahudihin.
[9] Manjari disi Yakub duk si Petros duk Yahiya, siye meꞌ kinimmatan nakuraꞌ malaꞌihin, sakaliꞌ tahātide weꞌ kawakilan ku weꞌ Tuhanin, sinalam kami duk Barnabas weꞌ de, tandaꞌ weꞌ magdambuwaꞌ hinang kami kēmon. Isun kamihin weꞌ kami duk Barnabas magmahalayak si meꞌ kabangsahan dumaꞌin Yahudi bu siye isab magmahalayak si meꞌ Yahudi.
[10] Pākude hadja weꞌ subey tabang kami meꞌ mamiskin laꞌi si Awrusalamin, meꞌ masandel pu si Isa Almasihin. Duk iye du isab miyaꞌan luwal kabayaꞌanku hininangin.
[11] Gaꞌ tiggel puwas miyaꞌan hap pī si Petros si kami laꞌi si puweblo Antiyok. Dambuwaꞌ ellew sinabit iye weꞌ ku peggeꞌ niyaꞌ hinanganne gaꞌi tewwaꞌ.
[12] Tagnaꞌne tekka laꞌi, patuhut iye mangan si meꞌ aꞌa dumaꞌin Yahudi masandel pu si Isa Almasihin. Saguwaꞌ sakaliꞌ niyaꞌ tekka pī meꞌ Yahudi sandel pu si Isa Almasi dinaꞌak pī weꞌ si Yakub, na, si Petros inin gaꞌi ne asipne meꞌ dumaꞌin Yahudihin duk gaꞌi ne iye mangan magtuhut duk siye. Talew si Petros kaw iye sallaꞌ meꞌ Yahudi mamēbbegan saraꞌ pagislamin.
[13] Meꞌ Yahudi sinduwe masandel pu si Isa Almasi laꞌi si Antiyokin, batukande isab si Petros duk kēmon siye gaꞌi ne mangan magtuhut duk meꞌ dumaꞌin Yahudihin. Sampay si Barnabas katimboꞌohan isab.
[14] Pagkiteku weꞌ hininangde miyaꞌan kuntara si meꞌ toloꞌ mabennal panoloꞌ aka-aka mahāp sabab Isa Almasihin, paꞌinku pu si Petros si pagharapande kēmon, “Kaꞌu hatiꞌ, Yahudi kew, saguwaꞌ gaꞌi du tuhutnu addatte bi meꞌ Yahudihin. Iye tinuhutnun addat meꞌ aꞌa dumaꞌin Yahudihin. Na, weꞌey pe segeꞌnu meꞌ aꞌa dumaꞌin Yahudihin nuhut addat meꞌ Yahudihin?” Iye miyaꞌan bissāku pu si Petrosin.
[15] Yahudi kami peggeꞌ meꞌ matettoꞌa kamihin Yahudi. Dumaꞌin kami kuweꞌ meꞌ bangsa seddilihin, meꞌ manggaꞌi manuhut saraꞌin.
[16] Saguwaꞌ bisan kami, kataꞌuhan kami weꞌ aꞌahin inampun duk kinimmatan bentel weꞌ Tuhanin sabab sandelne pu si Isa Almasihin hadja, dumaꞌin weꞌ sabab panuhutne meꞌ pangandaꞌakan saraꞌ si Musahin. Hangkan hep bisan kami, sandel ne kami pu si Isa Almasi supaya kami inampun duk kinimmatan bentel weꞌ Tuhanin sabab sandel kami pu si Almasihin duk dumaꞌin sabab panuhut kami saraꞌin. Peggeꞌ gaꞌ teꞌed niyaꞌ aꞌa inampun duk kinimmatan bentel weꞌ Tuhanin sabab panuhutne meꞌ pangandaꞌakan saraꞌin.
[17] Bang iye kinabayaꞌanten weꞌ kimmatan Tuhanin kite bentel, subey kite sandel pu si Isa Almasi duk dumaꞌin saraꞌin subey pangandelanten. Hangkan hep bang Almasi pangandelan kamihin, tasabut kami ne weꞌ dusehan kami sa meꞌ aꞌa dumaꞌin Yahudihin. Bang kuweꞌ iyan, tapaꞌinte ke weꞌ Almasi jānnen hangkan kami dusehan? Asal gaꞌi!
[18] Saguwaꞌ bang ku balik nuhut saraꞌ bakas tinayikutankun duk paꞌinku weꞌ saraꞌin subey tinuhut, na, pastiꞌ weꞌ dusehan ku peggeꞌ kalanggalanku saraꞌin.
[19] Tasabutku ne weꞌ gaꞌi du ku kinimmatan bentel weꞌ Tuhanin sabab panuhutku saraꞌin peggeꞌ asal gaꞌi du tatuhutku. Hangkan tayikutanku ne saraꞌin supaya Tuhanin ne asal tinuhutkun. Sabab sandelku pu si Isa Almasihin, kuweꞌ ku dalil tumuhut si iye ilansang diyataꞌ olom.
[20] Kuweꞌ ku dalil matey saguwaꞌ ellum ku peggeꞌ tiyaꞌ Almasi patennaꞌ dem ateyku. Duk tiggelanku ellum si dunya inin, sandel ne ku paꞌin si Anak Tuhanin. Malasa iye si aku duk maglillaꞌ iye matey sababku.
[21] Asal gaꞌi tayikutanku lasa duk aseꞌ Tuhan pinakitehanne si aku kamatey Almasi diyataꞌ olomin. Peggeꞌ bang siꞌ kinimmatan kite bentel weꞌ Tuhanin sabab panuhutte saraꞌin, na, hātinen gaꞌ niyaꞌ guna kamatey Almasihin.