[1] Pinaꞌinku miyaꞌan makajari isab inupamahan kuweꞌ inin. Upama niyaꞌ nakanak, anak dambuwaꞌ-buwaꞌ, bu matey samanen. Iye ne dapuꞌ meꞌ alataꞌ taꞌamban samanen. Saguwaꞌ samantaꞌan nakanak pe iye kuweꞌ du hadja iye banyagaꞌ.
[2] Peggeꞌ pinagbayaꞌan pe iye duk meꞌ alataꞌnen weꞌ meꞌ aꞌa mangipat iyehin. Saguwaꞌ bang tekka ne ellew panessaꞌ samanen, niyaꞌ ne kapatutne magbayaꞌ si meꞌ alataꞌnen.
[3] Damikkiyan kite bi isab matuꞌuhin, masa kuweꞌ mākanak pe kite bi, hātinen gaꞌ pe kite bi sandel pu si Isa Almasi, kuweꞌ kite bi dalil meꞌ banyagaꞌ patuhut ne hadja si meꞌ kaꞌaddat-addatan kapapuꞌanten bi duk meꞌ biꞌat-biꞌatan meꞌ aꞌa si dunya inin.
[4] Saguwaꞌ pagtekka ellew pangeddew Tuhanin, pinapitu weꞌ ne si dunya Anaknen. Inanakan iye weꞌ manusiyaꞌ. Yahudi iye duk tinuhut weꞌ ne saraꞌ tasulat si Musahin,
[5] supaya tapaluwasne meꞌ aꞌa si antanan saraꞌin duk supaya kite bi hinang Tuhanin meꞌ anakne.
[6] Kabugtuꞌanbi weꞌ kaꞌam meꞌ anakne ne peggeꞌ pinapitu weꞌ Tuhanin dem ateyte bi Niyawa Sutsihin, iye malaꞌi si Anaknen, Isa Almasi. Sabab Niyawa Sutsi dem ateyten bi makajari ne ēnante bi Tuhanin Samate bi.
[7] Hangkan hep kuweꞌitu dumaꞌin ne kaꞌam kuweꞌ banyagaꞌ saguwaꞌ anakne ne kaꞌam. Duk peggeꞌ anakne kaꞌam, pangurung Tuhanin du si kaꞌam kēmon meꞌ kahāpan sukuꞌ si meꞌ anaknen.
[8] Matuꞌuhin masa gaꞌ pe kataꞌuhanbi Tuhanin, kuweꞌ kaꞌam meꞌ banyagaꞌ meꞌ tuhan-tuhan tinuhutbin.
[9] Saguwaꞌ kuweꞌitu kataꞌuhanbi ne Tuhanin, - pasōng pe, kataꞌuhan Tuhanin ne kaꞌam, - na, weꞌey ne isab batang tuhutbi balik meꞌ kaꞌaddatan duk meꞌ biꞌat-biꞌatan masahin bu gaꞌ du niyaꞌ kagunahande? Weꞌ bayaꞌ ne isab kaꞌam binanyagaꞌ weꞌ de balik?
[10] Tuhutbi ne balik meꞌ kaꞌaddatan meꞌ aꞌahin, kuweꞌ pamahadjebi ellew liꞌihin duk meꞌ kādjaꞌanbi bulan-bulanin atawa musim-musimin.
[11] Suse ku si kaꞌam, kaw gaꞌ niyaꞌ kaꞌujudan paghinangku maluꞌu si kaꞌamin.
[12] Meꞌ kapungtinaꞌihanku masandel pu si Isa Almasihin, pākuku si kaꞌam, subey ne kaꞌam kuweꞌ akuhin peggeꞌ kemuwe ku sandel pu si Isa, gaꞌ ne ku ngandel si saraꞌ āgama Yahudihin. Saguwaꞌ kuweꞌ ne ku kaꞌam meꞌ dumaꞌin Yahudihin. Duk gaꞌ du niyaꞌ dusebi si aku saguwaꞌ hāp pangahatulbi akuhin matuꞌuhin.
[13] Kataꞌuhanbi du weꞌ puꞌunku hep kapagmahalayak aka-aka mahāpin si kaꞌam matuꞌuhin, peggeꞌ taꞌabut saki ku luꞌu si kaꞌam. Iye miyaꞌan tagnaꞌ pagmahalayakku si kaꞌamin.
[14] Bisan kaꞌam kasigpitan manamal sabab sakikun, gaꞌ du ku tayikutanbi atawa kalemmiꞌanbi saguwaꞌ hinatul ku weꞌ bi. Pangaddatbi akuhin kuweꞌ pangaddatbi malaꞌikat amban surgaꞌ bang upama niyaꞌ tapiyu si kaꞌam. Inaddatan ku weꞌ bi kuweꞌ pangaddatbi Isa Almasi bang upama tapiyu iye si kaꞌam.
[15] Kēgan teꞌed kaꞌam masa miyaꞌan peggeꞌ luꞌu ku si kaꞌam. Asal tapaꞌinku weꞌ bang makajari hadja, ugitanbi bisan matabin duk pangurungbi aku, pamakitebi bang saꞌingge pangimmatbi akuhin. Saguwaꞌ weꞌey kuweꞌitu pinda ne pangimmatbi akuhin?
[16] Hatu kannalbi weꞌ kuntarahante kaꞌam peggeꞌ akahante kaꞌam mabennalin.
[17] Meꞌ aꞌa maluꞌu magtoloꞌ si kaꞌam meꞌ toloꞌ manggaꞌi mabennalin, kuweꞌ bantuk gagal siye si kaꞌam saguwaꞌ dumaꞌin tapikilden kahāpanbin. Kabayaꞌanden hadja weꞌ tayikutanbi ku supaya siye hadja tinuhutbin.
[18] Asal hāp bang aꞌahin gagal si saweꞌnen basta hāp hadja sababnen bang weꞌey siye gagal. Duk subey kaꞌam maggagal bang luꞌu ku si kaꞌam atawa bang gaꞌ ku luꞌu.
[19] Kimmatante kaꞌam kuweꞌ meꞌ anakku kinalasahankun; hangkan, kuweꞌ dende kahunitan bang iye sōng nganak, kahunitan ku mikil sabab kaꞌam samantaꞌan gaꞌi pe kaꞌam dambūs-būs nuhut Isa Almasi duk iye ne asal magbayaꞌ dem ateybin.
[20] Bang siꞌ ku luꞌu si kaꞌam kuweꞌitu. Taboꞌote siꞌ kaꞌam magbissā magharap peggeꞌ suse ku teꞌed si kaꞌam.
[21] Kaꞌam meꞌ mabayaꞌ manuhut saraꞌ sinulat si Musa dem kitabin, gaꞌi ke kataꞌuhanbi bang ine pinaꞌin kitabin?
[22] Paꞌin kitabin hep weꞌ Ibrahim duwe anakne lellahin. Dambuwaꞌ anaknen amban andane banyagaꞌin duk dambuwaꞌin amban andane dumaꞌin banyagaꞌin.
[23] Anakne amban banyagaꞌin inanakan sa hinangan si dunyahin. Saguwaꞌ anakne amban andane dumaꞌin banyagaꞌin inanakan panuman Tuhan janjiꞌne pu si Ibrahimin.
[24] Inin pangandalilanten: dende duwangan inin dalil janjiꞌ Tuhan duwehin. Si Hagar, dende banyagaꞌin, dalil janjiꞌ Tuhan tagnaꞌin, iye saraꞌ pinangurungne pu si Musa laꞌi diyataꞌ punu Turusinahin. Duk meꞌ manuhut saraꞌin kuweꞌ meꞌ banyagaꞌ.
[25] Manjari si Hagar dalil punu Turusinahin laꞌi si lahat Arab duk dalil meꞌ bangsa Yahudihin isab. Banyagaꞌ si Hagar duk meꞌ anaknen. Damikkiyan isab kēmon meꞌ Yahudi kuweꞌitu manuhut saraꞌ sinulat si Musahin kuweꞌ pabanyagaꞌ si saraꞌin.
[26] Saguwaꞌ si Sara, anda Ibrahim dumaꞌin banyagaꞌin, iye dalil kēmon kite bi meꞌ masandel pu si Isahin peggeꞌ gaꞌ kite bi pabanyagaꞌ si saraꞌ sinulat si Musahin.
[27] Tasulat hep dem kitab, pinaꞌin, “Magkēg kew, dende, bisan kew gaꞌ bakas nganak. Magellang-ellang kew weꞌ kēgnun bisan kew gaꞌ bakas makalessa peddiꞌ. Peggeꞌ meꞌ tubuꞌ dende bakas inambanan weꞌ ellanen ekka pe manamal amban meꞌ tubuꞌ dende maniyaꞌ ellanen.”
[28] Meꞌ kapungtinaꞌihanku, kite bi inin meꞌ anak Tuhanin sabab tinumanan weꞌ ne janjiꞌnen. Kite bi kuweꞌ si Isahakin inanakan weꞌ si Sara panuman Tuhan janjiꞌne pu Ibrahimin.
[29] Masa miyaꞌan isab, nakanak inanakan sa hinangan si dunyahin, si Ismaꞌel, pinahunitan weꞌ ne nakanak inanakan sabab balakat Niyawa Tuhanin. Damikkiyan kite bi kuweꞌitu pinahunitan teꞌed weꞌ meꞌ mapabanyagaꞌ si saraꞌ tasulat si Musahin.
[30] Saguwaꞌ ine teꞌ paꞌin kitabin? Paꞌin kitabin, “Patahalaꞌun dende banyagaꞌin duk anaknen peggeꞌ gaꞌ niyaꞌ pusakaꞌ pangurung si anak banyagaꞌin. Kēmon pusakaꞌin sukuꞌ si anak dende dumaꞌin banyagaꞌin.”
[31] Hangkan meꞌ kapungtinaꞌihanku masandel pu si Isa Almasihin, dumaꞌin kite bi kuweꞌ anak dende banyagaꞌin saguwaꞌ kuweꞌ kite bi anak dende dumaꞌin banyagaꞌin.