[1] Kaꞌam meꞌ aꞌa Galatiyahin, babbal pahāp kaꞌam iyan! Weꞌey pakalebi meꞌ aꞌa mangandaꞌak kaꞌam nuhut saraꞌ tasulat si Musahin? Weꞌ gaꞌi pastiꞌ panoloꞌku si kaꞌamin weꞌ matey Isa Almasi diyataꞌ olom supaya dusebin tapuwasan?
[2] Akahanun bi ku. Saꞌingge panayimaꞌbi Niyawa Tuhanin? Tatayimaꞌbi ke Niyawa Tuhanin peggeꞌ tuhutbi saraꞌin? Dumaꞌin! Saguwaꞌ kataꞌuhanbi du weꞌ pangurung Tuhanin hadja Niyawanen si kaꞌam peggeꞌ takalebi duk kinahagad weꞌ bi aka-aka mahāp sabab si Isa Almasihin.
[3] Babbal pahāp kaꞌam iyan! Tagnaꞌbi nuhut Isa Almasi, Niyawa Tuhanin pangandelanbin nabangan kaꞌam. Saguwaꞌ kuweꞌitu iye pangandelanbin basagbi nuhut saraꞌ tasulat si Musahin supaya kaꞌam kinimmatan bentel weꞌ Tuhanin.
[4] Kēmon meꞌ talabeybin sabab sandelbi pu si Isahin, gaꞌ ke miyaꞌan niyaꞌ gunane si kaꞌam? Bugtuꞌ niyaꞌ.
[5] Tuhanin, pinangurung weꞌ ne si kaꞌam Niyawa Sutsihin duk maghinang iye hinangan balakatan diyalemanbi, dumaꞌin peggeꞌ tuhutbi meꞌ pangandaꞌakan saraꞌin saguwaꞌ peggeꞌ pakalebi duk kinahagad weꞌ bi aka-aka mahāp sabab si Isa Almasihin.
[6] Pikilun bi Ibrahim awwalley. Tasulat dem kitab, pinaꞌin, “Kinahagad weꞌ Ibrahim sanggup Tuhan si iyehin. Sabab pakahagadne miyaꞌan, kinimmatan iye bentel weꞌ Tuhanin.”
[7] Hangkan hep subey tasabutbi weꞌ meꞌ aꞌa asal masandel si Tuhanin, siye tubuꞌ Ibrahim teꞌedin.
[8] Paꞌin Tuhanin matuꞌuhin dem kitab weꞌ bisan meꞌ aꞌa dumaꞌin Yahudihin kimmatanne du bentel bang sandel siye si iye. Pinahātihan weꞌ ne pu Ibrahim matuꞌuhin aka-aka mahāp inin. Paꞌinne pu si Ibrahim, “Sababnu urunganku kahāpan kēmon manusiyaꞌ si dunyahin.”
[9] Kinahagad weꞌ Ibrahim sanggup Tuhanin duk sabab miyaꞌan inurungan iye kahāpan weꞌ Tuhanin. Damikkiyan kēmon makahagad si bissā Tuhanin, inurungan kahāpan isab siye.
[10] Saguwaꞌ kēmon magpaꞌin weꞌ kinimmatan siye bentel weꞌ Tuhanin sabab panuhutde saraꞌin, pagmulkaꞌan Tuhanin du siye. Peggeꞌ tasulat dem kitab, pinaꞌin, “Sasuku gaꞌi makatuhut kēmon pangandaꞌakan tasulat dem saraꞌin, asal pagmulkaꞌan Tuhanin siye.”
[11] Manjari, pastiꞌ teꞌed weꞌ gaꞌ niyaꞌ aꞌa kinimmatan bentel weꞌ Tuhanin sabab panuhutne saraꞌin. Peggeꞌ paꞌin kitabin isab, “Sine-sine masandel si Tuhanin, kimmatan Tuhanin iye bentel duk ellum iye salama-lama.”
[12] Bang niyaꞌ siꞌ aꞌa makatuhut kēmon pangandaꞌakan dem saraꞌin, gaꞌi iye subey sandel pu si Isa Almasi. Peggeꞌ niyaꞌ isab tasulat dem kitab, pinaꞌin, “Aꞌa makatuhut kēmon pangandaꞌakan dem saraꞌin, ellum iye salama-lama.”
[13] Saguwaꞌ gaꞌ niyaꞌ bisan dambuwaꞌ makatuhut kēmon pangandaꞌakan dem saraꞌin hangkan kēmon pagmulkaꞌan Tuhanin. Saguwaꞌ si Almasi ilegga gantiꞌte bi duk pinaluwas kite bi weꞌ ne amban pangalegga Tuhan si kitehin bi. Pangalegga iyehin pinapatey diyataꞌ olom. Peggeꞌ tasulat hep dem kitab, pinaꞌin, “Bang aꞌahin pinapatey binowet diyataꞌ olom, hātinen weꞌ tewwaꞌ mulkaꞌ Tuhanin iye.”
[14] Si Almasi maglillaꞌ pinapatey kuweꞌ miyaꞌan supaya sabab iye meꞌ kahāpan pananggup Tuhan pu si Ibrahimin awwalley tapangurung du isab si meꞌ aꞌa dumaꞌin Yahudihin, duk supaya sabab sandelte bi pu si Isa Almasihin papitu Tuhanin du si kite bi Niyawa Sutsi pananggupnen.
[15] Meꞌ kapungtinaꞌihanku masandel pu si Isa Almasihin, urungante kaꞌam upama. Bang niyaꞌ duwangan magjanjiꞌ bu tapilmahande katas pagjanjiꞌande miyaꞌan, gaꞌ niyaꞌ bisan sine makajari mindahanne atawa nambahanne.
[16] Manjari Tuhanin, niyaꞌ meꞌ janjiꞌne pu Ibrahim duk si tubuꞌnen. Gaꞌ paꞌin kitabin, “si meꞌ tubuꞌnen,” hātinen ekka siye. Saguwaꞌ paꞌin kitabin si dambuwaꞌ hadja tubuꞌnen duk inin si Almasi.
[17] Iye batang pinahātiku si kaꞌamin, inin: Tuhanin bakas ngajanjiꞌ pu Ibrahim duk nanggup iye weꞌ asal tumananne janjiꞌne miyaꞌan. Paglabey ampat hatus duk tellumpūꞌ tahun puwas miyaꞌan, pinangurung weꞌ Tuhanin saraꞌin pu si Musa para si meꞌ Yahudihin. Saguwaꞌ gaꞌi makajari pinaꞌin weꞌ gaꞌi ne binali janjiꞌ Tuhan tagnaꞌin peggeꞌ niyaꞌ ne saraꞌ. Haget pe janjiꞌ Tuhan miyaꞌan duk subey du tumananne.
[18] Peggeꞌ bang upama meꞌ kahāpan amban Tuhanin tepe si kite bi bang tuhutte bi meꞌ pangandaꞌakan saraꞌ tasulat si Musahin, na, gaꞌ ne niyaꞌ guna janjiꞌne miyaꞌan. Saguwaꞌ peggeꞌ bakas Tuhanin ngajanjiꞌ weꞌ ngurung iye kahāpan hangkan miyaꞌan pangurungne pu si Ibrahim.
[19] Manjari, bang kuweꞌ iyan, ine guna saraꞌin? Akahante kaꞌam, saraꞌin pinatamba hadja weꞌ Tuhanin supaya kataꞌuhan meꞌ aꞌahin bang ine duseden. Duk kabayaꞌan Tuhanin weꞌ saraꞌ inin tinuhut tiggelan gaꞌi pe tekka pitu tubuꞌ Ibrahim miyaꞌan, si Isa Almasi. Iye hep inin pinaꞌin Tuhan si janjiꞌnen. Saraꞌin pinangurung weꞌ Tuhanin si meꞌ malaꞌikat dinaꞌak pangurung pu si Musa. Ubus pinangurung isab weꞌ si Musa si meꞌ Yahudihin.
[20] Saguwaꞌ pangajanjiꞌ Tuhan pu Ibrahimin, gaꞌ iye ngandaꞌak sine-sine. Asal iye teꞌed dihananne mamissā pu Ibrahimin. Hangkan kataꞌuhante weꞌ pasōng langkew janjiꞌ Tuhanin amban saraꞌin.
[21] Hatu kannalbi weꞌ gaꞌi maguyun saraꞌin duk janjiꞌ Tuhanin. Saguwaꞌ maguyun du siye. Peggeꞌ bang siꞌ miyaꞌan niyaꞌ saraꞌ makaꞌurungan kite bi umul gaꞌ niyaꞌ tamananne, na, bentel ne siꞌ kite bi si matahan Tuhan bang tuhutte saraꞌ miyaꞌan.
[22] Saguwaꞌ paꞌin kitabin weꞌ kēmon manusiyaꞌin dusehan duk kuweꞌ dalil pagbayaꞌan siye weꞌ dusehin. Hangkan hep sabab sandelte pu si Isahin hadja, tasangkate kahāpan pananggup Tuhanin. Kaꞌurungan kite bi umul gaꞌ niyaꞌ tamananne bang sandel kite bi pu si Isa Almasi.
[23] Matuꞌuhin gaꞌ pe kite bi sandel pu si Isa, kuweꞌ kite bi dalil kinalabusu weꞌ saraꞌin duk gaꞌi kite bi lumuwas samantaꞌan gaꞌi pe kataꞌuhante weꞌ sandelten makatimbul kitehin.
[24] Saraꞌin mamanoloꞌan kitehin bi tiggelan gaꞌ pe tekka Almasi, supaya pagtekka ne Almasi makajari ne kite inampun duk kinimmatan bentel weꞌ Tuhanin sabab sandelte pu Almasihin.
[25] Kuweꞌitu peggeꞌ tekka ne si Isa Almasi duk iye ne pangandelanten, gaꞌi ne kite subey pinanoloꞌan weꞌ saraꞌ sinulat si Musahin.
[26] Kēmon kaꞌam meꞌ anak Tuhanin ne peggeꞌ sandel ne kaꞌam pu si Isa Almasi.
[27] Peggeꞌ kēmon kaꞌam sandel ne pu si Isa Almasi duk bakas ne kaꞌam pinandi, tandaꞌ weꞌ nuhut ne kaꞌam iye, hangkan ilekkat ne weꞌ bi addatnen.
[28] Manjari, gaꞌ ne niyaꞌ pagbiddaꞌan Yahudihin duk meꞌ aꞌa dumaꞌin Yahudihin. Gaꞌ niyaꞌ pagbiddaꞌan banyagaꞌin duk dumaꞌin banyagaꞌin. Gaꞌ niyaꞌ pagbiddaꞌan lellahin duk dendehin. Peggeꞌ kēmon kaꞌam magdambuwaꞌ dem atey ne sabab sandelbi pu si Isa Almasihin.
[29] Peggeꞌ kaꞌam sukuꞌ pu si Isa Almasi, hangkan meꞌ tubuꞌ Ibrahim isab kaꞌam duk tepe si kaꞌam du pananggup Tuhan pu Ibrahimin.