[1] Dumaꞌin ne kite bi kuweꞌ banyagaꞌ subey nuhut pangandaꞌakan saraꞌ sinulat si Musahin peggeꞌ bakas pinaluhaya ne kite bi weꞌ Almasi. Hangkan daꞌa teꞌed kaꞌam ngatu binanyagaꞌ balik saguwaꞌ pateteg kaꞌam duk kaꞌam luhaya.
[2] Tentemanun bi pinaꞌinku inin. Bang paꞌinbi weꞌ subey kaꞌam magislam supaya kaꞌam kinimmatan bentel weꞌ Tuhanin, papitu Almasihin gaꞌ niyaꞌ gunane si kaꞌam.
[3] Asal sessaꞌante kaꞌam balik weꞌ sasuku magislam sa pangandaꞌakan saraꞌin, subey tuhutde kēmon pangandaꞌakan saraꞌin.
[4] Sasuku kaꞌam magpaꞌin weꞌ inampun duk kinimmatan kaꞌam bentel weꞌ Tuhanin sabab panuhutbi saraꞌin, tinayikutan ne weꞌ bi Almasi. Sumapeꞌ ne kaꞌam amban lasa duk aseꞌ Tuhanin.
[5] Saguwaꞌ kite bi, iye inase-aseten bi, weꞌ ampun Tuhanin kite bi duk kimmatanne kite bi bentel sabab balakat Niyawanen duk peggeꞌ sandel kite bi pu Almasi.
[6] Peggeꞌ bang ne kite bi sandel pu si Isa Almasi, saliꞌ-saliꞌ ne kite bi si pagmatahan Tuhanin bisan kite bi bakas magislam atawa gaꞌ. Iye mamahalgaꞌ si Tuhanin bang takite sandelten bi si lasate si pagkasiten bi.
[7] Matuꞌuhin tinuhut teꞌed weꞌ bi toloꞌ mabennal sabab si Isa Almasihin. Saguwaꞌ kuweꞌitu sine mamages kaꞌamin hangkan gaꞌi ne tuhutbi?
[8] Dumaꞌin Tuhanin mamages kaꞌamin, peggeꞌ iye manawag kaꞌamin duk kaꞌam nuhut Isa Almasi.
[9] Meꞌ toloꞌ manggaꞌi mabennalin palatag sa pinaꞌin eliꞌanin, “Bisan da puddut pasulig makapasulig tibuꞌukan addunin.”
[10] Saguwaꞌ bisan ne kuweꞌ miyaꞌan, peggeꞌ magpungtinaꞌi kite bi sabab sandelte bi si Panuhutanten bi Isa Almasi, kabugtuꞌanku weꞌ gaꞌi du tuhutbi panoloꞌ seddili amban meꞌ bakas panoloꞌku si kaꞌamin. Duk aꞌa manasew pikilanbin sabab meꞌ toloꞌne manggaꞌi mabennalin, asal legga Tuhanin du iye bisan sine.
[11] Meꞌ kapungtinaꞌihanku masandel pu si Isa Almasihin, niyaꞌ meꞌ aꞌa magpaꞌin weꞌ magtoloꞌ pe koꞌ ku weꞌ subey kite bi magislam supaya kinimmatan kite bi bentel weꞌ Tuhanin. Bang toꞌo inin weꞌey pe ku bininasa weꞌ meꞌ Yahudihin? Bang siꞌ ku magtoloꞌ weꞌ subey aꞌahin magislam, gaꞌi ne siꞌ ku kaꞌastelande bisan ne ku magtoloꞌ isab sabab kamatey Isa Almasi diyataꞌ olomin.
[12] Bang du siꞌ meꞌ aꞌa manasew kaꞌam iyan dumaꞌin hadja magislam saguwaꞌ ngapun dide ne manalus.
[13] Manjari kaꞌam, meꞌ kapungtinaꞌihanku, tapeneꞌ kaꞌam weꞌ Tuhanin supaya kaꞌam tapaluhayane hangkan gaꞌi ne subey tuhutbi saraꞌin. Saguwaꞌ dumaꞌin hātine inin weꞌ peggeꞌ luhaya ne kaꞌam, makajari ne ūtanbi meꞌ napsu baranbin. Gaꞌi. Saguwaꞌ subey kaꞌam magtabang-tinabang peggeꞌ maglasa-ilasa kaꞌam.
[14] Peggeꞌ kēmon pangandaꞌakan saraꞌ tasulat si Musahin tatuhutte ne bang tuhutte dambuwaꞌ daꞌakan inin: “Kalasahanun saweꞌnun kuweꞌ pangalasanu dinun.”
[15] Saguwaꞌ bang iye bahanbin magkekkeb duk magsasaꞌ kuweꞌ asu, na pahatul kaꞌam peggeꞌ ujud magkaꞌat iyan pagdambuwaꞌ ateybin.
[16] Inin pinaꞌinku si kaꞌamin: tuhutun bi pangandaꞌakan Niyawa Sutsihin, manjari gaꞌi iyan ūtanbi napsubin.
[17] Peggeꞌ kinabayaꞌan napsuten bi duk kinabayaꞌan Niyawa Tuhanin gaꞌi maguyun. Magkuntara duwe inin hangkan hep gaꞌi tahinangte meꞌ hinangan kinabayaꞌante hininangin.
[18] Bang iye tinuhutbin kinabayaꞌan Niyawa Tuhanin, gaꞌ ne niyaꞌ kaput saraꞌin si kaꞌam.
[19] Bang napsuden iye tinuhut meꞌ aꞌahin mura kataꞌuhan peggeꞌ inin meꞌ hinanganden: magjina siye, baꞌisan siye, duk gaꞌi siye iyaꞌ magkadupangan.
[20] Pahadjede meꞌ tuhan-tuhanin. Hininang-hinang weꞌ de saweꞌden duk magbahasa siye. Magkuntara siye duk magsasaꞌ. Magkimbū siye duk magkaꞌastel. Iye luwal pinikilden kinabayaꞌanden hadja, gaꞌi tapikilde saweꞌden. Magpaꞌil-paꞌil siye.
[21] Pagnapsuhande panyap saweꞌden. Maglangohan siye duk bang magtipun siye maglami-lami, luwal siye maginuman duk magkadupangan. Niyaꞌ pe meꞌ hinangande seddili kuweꞌ inin. Ambat tabalikku bakas pinaꞌinku si kaꞌam matuꞌuhin, weꞌ meꞌ aꞌa maghinang meꞌ hinangan malaꞌat inin asal gaꞌi teꞌed sinakup dem pagbayaꞌan Tuhanin.
[22] Saguwaꞌ aꞌahin bang pinagbayaꞌan iye weꞌ Niyawa Tuhanin, iye inin meꞌ hinangannen: malasa iye si pagkasine, kēgan dem ateynen, duk hāp pamikilnen. Taꞌu iye magpasensiya si saweꞌne duk hāp addatnen si pagkasinen. Be-tabang iye duk kapangandelan iye.
[23] Diyawaꞌ pagateynen duk gaꞌi ūtanne napsunen. Sabennal gaꞌ niyaꞌ saraꞌ kuntara si meꞌ hinangan inin.
[24] Duk kēmon meꞌ aꞌa sukuꞌ pu si Isa Almasihin, kimmatande ne weꞌ napsuden kuweꞌ dalil bakas matey magtuhut duk si Isa pangalansang iye diyataꞌ olomin. Hātinen, gaꞌi ne tuhutde napsuden duk sasuku kinabayaꞌan baranden.
[25] Peggeꞌ kaꞌurungan ne kite bi umul baꞌahu weꞌ Niyawa Tuhanin, subey ne kite bi ngatu pagbayaꞌanne.
[26] Subey kite bi gaꞌi abbuhan. Daꞌa kite bi maꞌastel saweꞌte bi duk daꞌa kite bi ngimbūhan saweꞌte bi.