[1] Wa daahu Allah gaal : «Chiifu, ana nigawwim adu misil riih mudammire didd Baabil wa didd guluub udwaani.
[2] Wa nirassil didd Baabil ajaanib yikharbuluuha. Fi yoom fasaalitha, yaju leeha min kulli jiihe wa yidammuru ardaha.»
[3] Adurbu ayyi waahid min al-adu al-indah nuchchaab wa laabis dirʼah. Ma tikhallu al-askar al-chabaab wa laakin dammuru kulla askar Baabil.
[4] Khalli yagaʼo mutaʼʼaniin fi l-chawaariʼ wa yidaffugu maytiin fi balad Baabil.
[5] Achaan Allah al-Ilaah al-Gaadir kaan maʼa Bani Israaʼiil wa Bani Yahuuza hatta kan humman malo baladhum be charr didd Khudduus Israaʼiil kula.
[6] Arrudu min balad Baabil wa khalli ayyi waahid yinajji nafsah. Ma tumuutu be sabab zanibha achaan da wakit Allah yichiil taarah wa yijaaziiha hasab al-waajib leeha.
[7] Baabil awwal hi misil kaas hana dahab fi iid Allah, hi sakkarat kulla l-ard. Wa l-umam chirbo min khamarha wa fi chaan da bas, ruuseehum waddaro.
[8] Wa be khafla, Baabil wagaʼat wa alkassarat. Abku leeha wa fattuchu dawa wa amsahooh fi uwaarha, // akuun tilʼaalaj.
[9] «Aniina dawwarna niʼaaluju Baabil wa laakin hi ma addaawat leena. Yalla nikhalluuha ! Ayyi waahid yamchi le baladah achaan ikhaabha lihig lahaddi l-sama wa anrafaʼ lahaddi l-sahaab.
[10] Allah bayyan adaalitna wa khalaas, taʼaalu nigabbulu. Nikhabburu fi jabal Sahyuun be kheer Allah Ilaahna.»
[11] Tarrugu nachaachiibku wa amlo kalootaatku. Allah harrach muluuk Maadi didd Baabil achaan hu kharrar yidammir Baabil. Yichiil foogha al-taar wa da taar beetah al-mukhaddas al-dammarooh.
[12] Arfaʼo raayit al-hujuum // didd durdur Baabil wa chaddudu al-muraakhaba. Khuttu hurraas wa khuttu naas le yarbutu kamiin. Achaan al-cheyy al-kharrarah Allah, hu yisawwiih wa da kharaarah didd sukkaan Baabil.
[13] Inti ya Baabil al-jamb al-buhuur, khunaaki katiire. Nihaayitki jaat hasab tamaʼki.
[14] Allah al-Gaadir halaf be nafsah wa gaal : «Ana namlaaki be rujaal katiiriin // misil al-jaraad wa yikooruku fi lubbiki // korooraak al-nasur.»
[15] Allah khalag al-ard be gudurtah wa sabbat al-aalam be hikmatah wa falla al-samaawaat be ilmah.
[16] Wa wakit yaamur, al-almi yilimm bakaan waahid fi l-sama wa l-sahaab yatlaʼ min aakhir al-ard wa l-barraaga tachlaʼ wa l-matar yanzil wa makhaazin al-riih yinfathu.
[17] Wa ayyi naadum mukhaffal ma indah maʼrafa. Wa ayyi sayyaakhi hana sanam, al-eeb yakurbah achaan timsaalah da khachch, ma indah ruuh.
[18] Al-asnaam zaayliin wa humman amal al-yijiib al-chamaate. Wa wakit al-ikhaab yaji, humman yiddammaro.
[19] Wa Ilaah Yaakhuub ma misilhum achaan hu bas khalag kulla cheyy. Hu azal gabiila waahide le yabgo chaʼabah al-misil warasatah wa usmah Allah al-Gaadir.
[20] Wa Allah gaal : «Inti, ya Baabil ! Bigiiti leyi misil asaati al-nihaarib beeha. Beeki inti, ana darabt al-umam wa kharabt al-mamaalik.
[21] Wa beeki inti, ana darabt al-kheel wa rukkaabhum wa arabaat al-harib wa siyaadhum.
[22] Wa beeki inti, ana darabt al-rujaal wa l-awiin wa l-kubaar wa l-dugaag wa l-subyaan wa l-banaat.
[23] Wa beeki inti, ana darabt al-ruʼyaan wa khanamhum wa l-harraatiin wa tiiraanhum wa l-hukkaam wa masaaʼiilhum.»
[24] «Wa laakin hassaʼ, chiifu ya Bani Israaʼiil ! Ana nijaazi Baabil wa kulla sukkaanha hasab kulla l-fasaala al-sawwooha fi Sahyuun. Wa da kalaam Allah.
[25] Wa akiid ana nugumm diddiki inti, ya Baabil al-misil jabal al-kharaab, inti al-kharabti kulla l-ard. Ana nimidd iidi le nadrubki wa nidardigki min ruuse al-jibaal wa nahrigki be naar. Wa da kalaam Allah.
[26] Wa battaan ma yamurgu minki wa la hajar zaawiye wa la hajar asaas achaan tukuuni kharaab ila l-abad.» Wa da kalaam Allah.
[27] Arfaʼo raayit al-hujuum fi l-balad wa adurbu al-buug fi ust al-umam. Khassusu umam didd Baabil wa harruchu diddaha mamaalik Araraat wa Minni wa Achkanaaz. Kallufu khaayid diddaha wa gawwumu diddaha kheel // misil al-jaraad al-saayir.
[28] Wa khassusu al-umam didd Baabil wa rassulu diddaha muluuk Maadi wa hukkaamhum // wa kulla masaaʼiilhum wa kulla l-buldaan al-humman yahkumuuhum.
[29] Al-ard anhazzat wa rajafat wakit kharaar Allah didd Baabil alhaggag. Wa balad Baabil takhrab wa tabga faadiye min sukkaanha.
[30] Wa l-askar al-furraas hana Baabil abo ma yihaarubu wa allabbado fi bakaanaathum al-gawiyiin. Wa fahaaliiyithum kula waddarat wa humman bigo misil awiin. Wa buyuut Baabil antachcho wa biibaanha alkassaro.
[31] Wa yajri mursaal baʼad mursaal wa rasuul wara rasuul le yikhabburu malik Baabil kadar madiintah chaalooha min tarafha le tarafha.
[32] Wa ayyi maʼada, al-adu saddaah wa tibin al-ruhuud tachchooh wa l-rujaal al-muhaaribiin anbahato.
[33] Wa daahu Allah al-Gaadir Ilaah Bani Israaʼiil gaal : «Baabil al-misil bineeye tabga yaabse karr misil nagaʼat al-madagg al-jahhazooha. Wa baʼad chiyya, wakt al-gatiʼ yaji.»
[34] «Nabuukhadnasar malik Baabil barjalaana wa akalaana wa hu sawwaana misil maaʼuun faadi. Wa zarataana misil al-khuul wa mala batnah be mukhkhina wa taradaana.
[35] Wa khalli al-unuf al-sawwooh leena yukuun fi Baabil !» Wa da kalaam sukkaan Sahyuun. «Wa khalli dimmitna tagaʼ fi raas sukkaan Baabil !» Wa da kalaam naas Madiinat al-Khudus.
[36] Wa fi chaan da, daahu Allah gaal : «Ana nidaafiʼ leeku misil muhaami wa nichiil leeku al-taar. Wa niyabbis bahar Baabil wa nijaffif uyuun almiiha.
[37] Wa Baabil tabga koom hana turaab wa margad hana baʼaachiim wa bakaan kharaab wa bahiite wa tabga faadiye min sukkaanha.
[38] Wa naas Baabil yikirru misil al-diidaan al-subyaan wa yaharju misil iyaal al-duud.
[39] Wa wakit jihmo, ana nijahhiz leehum aazuuma wa nisakkirhum lahaddi yafraho. Wa laakin yunuumu noom ila l-abad wa battaan ma yugummu. Wa da kalaam Allah.
[40] Wa ana niwaddiihum misil al-khurfaan le l-juzur wa misil al-kubaach wa l-tuyuus.»
[41] Chiifu ! Baabil anchaalat wa l-maʼruufa fi kulla l-ard anhazamat ! Ajab, Baabil khirbat fi ust al-umam !
[42] Al-bahar chaal Baabil wa be moojah al-katiir, khattaaha.
[43] Mudunha khirbo wa hi bigat ard jafaaf wa kadaade. Wa di l-balad al-ma fi naadum yaskun foogha wa la insaan yiʼaddi beeha.
[44] Wa Allah gaal : «Ana nugumm didd sanam Biil fi Baabil wa namrug al-lugma min khachmah. Wa battaan al-umam ma yamchu leyah wa durdur Baabil yagaʼ.
[45] Ya chaʼabi ! Amurgu min usut Baabil wa khalli ayyi waahid yinajji nafsah, wa yibaʼʼid min al-khadab al-muhrig hanaayi Allah.
[46] Wa khalli achamku ma yingatiʼ wa ma takhaafo min al-khabar al-gaaʼidiin tasmaʼooh fi l-balad. Achaan al-sana di, tasmaʼo khabar wa fi l-sana al-baʼadha kula, // tasmaʼo khabar aakhar. Wa yuguulu yaji unuf fi l-balad wa malik yugumm didd malik.
[47] Wa fi chaan da, yaji yoom waahid al-foogah ana niʼaakhib asnaam Baabil. Wa kulla baladha, al-eeb yakrubha wa janaazaat maytiinha yagaʼo fi lubbaha.
[48] Al-sama wa l-ard yizakhrutu wa kulla l-fiihum yiragrig min al-farah fi chaan damaar Baabil. Achaan min munchaakh al-mukharrib yaji leeha.» Wa da kalaam Allah.
[49] Ya maytiin Bani Israaʼiil ! Baabil kula waajib tagaʼ. Achaan beeha hi wagaʼo naas maytiin fi ayyi bakaan fi l-ard.
[50] Yalla, intu al-nijiitu min al-moot ! Arrudu ! Ma tagiifu ! Fi l-khurba, azzakkaro Allah wa khuttu Madiinat al-Khudus fi guluubku.
[51] Wa Bani Israaʼiil gaalo : «Aniina al-eeb karabaana wakit simiʼna al-muʼyaar wa l-khajla dallat ruuseena. Achaan al-ajaanib dakhalo fi l-bakaanaat hana beet Allah.»
[52] Wa daahu kalaam Allah : «Wa fi chaan da, yaji yoom waahid al-foogah niʼaakhib asnaam Baabil wa fi kulla baladha al-majruuhiin yaguntu.
[53] Hatta kan Baabil tabga aaliye // lahaddi l-sama wa tigawwi bakaanaatha al-aaliyiin kula, ana nijiib foogha mukharribiin.» Wa da kalaam Allah.
[54] Wa siraakh yinsamiʼ min Baabil wa damaar kabiir yukuun // fi balad al-Baabiliyiin.
[55] Achaan Allah yakhrib Baabil wa yisakkit harakatha. Wa l-adu yajiiha misil al-mooj al-chadiid wa harakatah tinsamiʼ.
[56] Aywa ! Kulla l-mukharribiin jo didd Baabil. Askarha al-furraas ankarabo wa nubbaalhum alkassar. Achaan Allah hu al-Ilaah al-yijaazi wa yikaafi ayyi naadum ale hasab al-waajib leyah.
[57] «Ana nisakkir masaaʼiilha wa hakiimiinha wa hukkaamha wa kubaaraatha wa askarha al-furraas. Wa humman yunuumu ila l-abad wa battaan ma yugummu.» Wa da kalaam al-malik wa hu Allah al-Gaadir.
[58] Wa daahu Allah al-Gaadir gaal : «Daraadir Baabil al-tukhaan yilhaddamo. Wa biibaanha al-tuwaal, al-naar taakulhum. Al-chuʼuub yiʼayyu nufuushum saakit wa l-umam yatʼabo le l-taakulah al-naar.»
[59] Al-nabi Irmiya kallam le Saraaya wileed Nariiya wileed Mahsiiya wakit hu maachi Baabil maʼa Sidkhiiya malik Yahuuza fi l-sana al-raabʼe hana hukum Sidkhiiya. Wa Saraaya da, hu masʼuul min gasir al-malik.
[60] Wa Irmiya katab fi kitaab malfuuf kulla l-fasaala al-taji le Baabil wa da kulla l-kalaam al-maktuub al-bukhuss Baabil.
[61] Wa Irmiya gaal le Saraaya : «Wakit tiwassil fi Baabil, fakkir wa agri be hiss aali kulla l-kalaam da.
[62] Wa guul : ‹Ya Allah ! Inta bas kharrart wa gult al-bakaan da yiddammar. Wa ma fi naadum yaskun foogah wa la insaan wa la bahaayim. Wa laakin hu yabga kharaab ila l-abad.›
[63] Wakit tikammil min giraayit al-kitaab da, arbut foogah hajar wa armiih fi lubb bahar al-Furaat.
[64] Wa baʼad da, guul : ‹Baabil kula takhrag misil da wa abadan ma tugumm baʼad al-fasaala al-nijiibha foogha.›» «Al-naas yagaʼo.» Wa daahu nihaayat kalaam Irmiya.