[1] Wa daahu kalaam Allah al-gaalah le Irmiya :
[2] «Daahu Allah Ilaah Bani Israaʼiil gaal : ‹Ya Irmiya, aktib fi kitaab kulla l-kalaam al-ana gultah leek.
[3] Wa yaji yoom waahid, ana nigabbil chaʼabi Bani Israaʼiil wa Bani Yahuuza min al-khurba.›» Wa da kalaam Allah. Wa Allah gaal battaan : «Ana nijiib chaʼabi fi l-balad al-ana anteetha le juduudhum wa yagoodu fi ard warasathum.»
[4] Wa daahu kalaam Allah al-bukhuss Bani Israaʼiil wa Bani Yahuuza.
[5] Daahu Allah gaal : «Korooraak al-khoof ansamaʼ wa ma fi salaam illa l-ruʼub.
[6] Asʼalo wa fakkuru ! Hal al-dukuur yaldo walla ? Wa maala ayyi raajil yukhutt iidah fi batnah misil al-mara al-gaaʼide titaalig ? Wa maala kulla wujuuhhum bigo dulum ?
[7] Al-azaab ! Al-yoom da, yoom ajiib wa yoom mislah kula ma fiih. Wa da wakit diigit zurriiyit Yaakhuub wa laakin yanjo minha.»
[8] Wa daahu kalaam Allah al-Gaadir : «Fi l-yoom da, ana nikassir al-daami wa ninazzilah min kataafeehum wa nigattiʼ guyuudhum. Wa humman battaan ma yabgo abiid le l-ajaanib
[9] wa laakin yaʼabuduuni ana Allah Ilaahhum. Wa yakhdumu le malik min zurriiyit Dawuud al-nisabbitah fooghum.»
[10] «Wa intu, ya zurriiyit abdi Yaakhuub, ma takhaafo wa ma tinbahtu, ya Bani Israaʼiil ! Akiid ana ninajjiiku min al-balad al-baʼiide wa nijiib zurriiyitku min balad al-khurba. Zurriiyit Yaakhuub yaju wa yagoodu be raaha wa amaan wa akiid ma fi naadum yibachtinhum. Wa da kalaam Allah.
[11] Ana zaati daayman nukuun maʼaaku le ninajjiiku. Wa ana nidammir marra waahid kulla l-umam al-ana chattattuku fi lubbuhum. Wa laakin intu, ma nidammirku marra waahid. Akiid ma najʼalku bariyiin wa laakin niʼaddibku be miiz.» Wa da kalaam Allah.
[12] Daahu Allah gaal : «Ya Madiinat al-Khudus, kasirki ma yirrakkab wa jiraahki ma yilʼaalaj.
[13] Ma fi naadum al-yidaafiʼ leeki fi l-chariiʼa wa ma fi dawa al-yidaawi uwaarki.
[14] Kulla sudgaanki yansooki, humman ma yihimmu beeki. Ana darabtiki darbit adu wa aakhabtiki bala rahma. Wa da, fi chaan khataaki al-katiir wa zanibki al-ma indah hadd.
[15] Wa maalki tikooriki min wajaʼ kasirki wa min wajaʼki al-ma yilʼaalaj ? Ana bas sawweet leeki al-cheyy da. Wa da, fi chaan khataaki al-katiir wa zanibki al-ma indah hadd.
[16] Wa be da khalaas, al-akalooki yinʼaklu wa kulla udwaanki yiwadduuhum abiid. Wa l-kasabooki yabgo kasiibe wa l-nahabooki nisallimhum le l-nahib.
[17] Wa naadooki Sahyuun al-mabkhuuda wa ma fi naadum yihimm beeki. Wa laakin ana kamaan nachfiiki wa nidaawi leeki juruuhki.» Wa da kalaam Allah.
[18] Wa daahu Allah gaal : «Akiid ana Allah nigabbil zurriiyit Yaakhuub min balad al-khurba wa narham buyuuthum. Wa l-madiina tinbani fi bakaanha al-awwal wa gusuurha kula yinbanu fi bakaanhum.
[19] Wa fi usutha yinsamiʼ al-chukur wa l-zakhraat. Wa ana nikattir zurriiyit Yaakhuub wa abadan ma yangusu. Wa ana nicharrifhum wa ma yahguruuhum battaan.
[20] Wa chaʼab al-madiina di yabgo misil zamaan wa naasha yilimmu wa yagiifu giddaami. Akiid ana niʼaakhib kulla udwaanha al-yazulmuuha.
[21] Wa cheekhhum yukuun minhum wa malikhum yamrug min usuthum. Wa ana nichiilah wa nigarribah leyi wa hu yukuun gariib minni. Wa yaatu al-yigarrib leyi bala izin wa yidiss nafsah fi l-khutuura ? Wa da kalaam Allah.
[22] Wa khalaas, intu tabgo chaʼabi wa ana nabga Ilaahku.»
[23] Wa daahu khadab Allah gamma misil amzoobaʼaane. Wa riih chadiide hajjat wa tuduur fi ruuse al-aasiyiin.
[24] Wa khadab Allah al-muhrig ma yagiif lahaddi yihaggig niiytah // al-hu chaalha. Wa fi l-akhiir, tafhamo al-cheyy da adiil.