[1] Kalaam bukhuss Muwaab. Daahu Allah al-Gaadir Ilaah Bani Israaʼiil gaal : «Ya khasaarit hillit Nabu achaan hi addammarat ! Wa hillit Khiryataayim aaybe wa makruuba wa l-hille al-gawiiye kula aaybe wa mubarjala.
[2] Wa Muwaab battaan ma tukuun // balad maʼruufa wa didd madiinat Hachbuun, khattato al-fasaala. Wa gaalo : ‹Yalla namchu ! Nuguchchuuha min ust al-umam.› Wa inti kula, ya hillit Madmiin, yisakkutuuki wa l-seef yajri waraaki.
[3] Wa fi hillit Hurunaayim, hiss yasrakh wa yuguul : ‹Damaar wa kharaab kabiir marra waahid !›
[4] Muwaab tilkassar wa iyaalha korooraakhum yinsamiʼ.
[5] Achaan be baki, al-iyaal yatlaʼo wa fi taluuʼ Luhiit yabku. Wa wakit yanzulu le hillit Hurunaayim, humman yasrakho min al-damaar wa yuguulu :
[6] ‹Arrudu wa najju nufuusku wa abgo misil humaar al-kadaade !›
[7] Ya Muwaab ! Inti atwakkalti fi aʼmaalki wa fi khunaaki wa fi chaan da, inti kula tinkarbi. Wa sanamki Kamuuch yiwadduuh fi l-khurba maʼa rujaal al-diin hineeyah // wa khaddaamiinah.
[8] Al-mudammir yadkhul fi kulli hille, ma fi hille tanja minnah. Al-waadi yiddammar wa l-sahale takhrab achaan ana Allah bas gultah.
[9] Antuuha le Muwaab janaahe le titiir wa tibaʼʼid. Achaan mudunha yakhrabo wa yabgo faadiyiin min sukkaanhum.
[10] Malʼuun al-yisawwi amal Allah // be kasal wa malʼuun al-yamnaʼ seefah // min al-damm.»
[11] «Muwaab gaaʼide fi l-raaha // min subaaha misil al-khamar al-gaaʼid fi rindiih wa ma sabbooh fi maaʼuun aakhar. Hi ma waddooha fi l-khurba. Hi misil al-khamar al-taʼamah // ma waddar wa riihtah ma albaddalat.»
[12] Wa daahu kalaam Allah : «Misil da, yaji yoom waahid al-foogah ana nirassil naas yusubbuuh fi girab aakhariin wa yifaddu girabbah wa yicharrutuuhum.
[13] Wa fi l-wakit daak, Muwaab takhjal min sanamha Kamuuch misil Bani Israaʼiil khijlo min sanamhum al-fi Beet Iil al-awwal humman aamano beyah.»
[14] «Ya naas Muwaab, kikkeef tagdaro tuguulu : ‹Aniina rujaal fahaliin wa furraas hana harib ?›
[15] Muwaab takhrab wa hillaalha yahrago wa chabaabha al-adiiliin yaktuluuhum. Wa da kalaam al-malik wa hu Allah al-Gaadir.
[16] Wa kharaab Muwaab garrab yaji wa fasaalitha jaaye be surʼa.
[17] Wa intu kulluku al-muhawwigiin Muwaab, abku leeha. Intu kulluku al-taʼarfuuha, asʼalo wa guulu : ‹Da kikkeef ! Asaat gudritha anchaggat wa asaat majdaha alkassarat ?›
[18] Ya sukkaan hillit Diibuun al-misil bineeye ! Anzulu min charafku wa duukhu al-atach. Achaan mudammir Muwaab yahjimku intu kula wa yidammir bakaanaatku al-gawiyiin.
[19] Wa ya sukkaan hillit Aruuʼir ! Agiifu fi l-tariig wa raakhubu. Wa asʼalo al-jaariyiin wa l-muʼarridiin wa guulu : ‹Chunu al-hasal ?›
[20] Wa yuruddu wa yuguulu : ‹Muwaab addammarat // wa ligat al-eeb.› Asrakho wa kooruku wa khabburu waadi Arnuun kadar Muwaab khalaas addammarat.»
[21] Al-muhaakama jaat fi balad al-sahale wa jaat fi hillaal Huluun wa Yahaas wa Mifaʼat
[22] wa fi Diibuun wa Nabu wa Beet Diblataayim
[23] wa fi Khiryataayim wa Beet Gamuul wa Beet Maaʼoon
[24] wa fi Kharyuut wa Busra wa fi kulla hillaal balad Muwaab al-gariibiin wa l-baʼiidiin.
[25] «Wa garin Muwaab wagaʼ wa gudritha waddarat. Wa duraaʼha ankasar wa kalaamha kammal.» Wa da kalaam Allah.
[26] Sakkuru Muwaab lahaddi tilmarmakh fi gadiifha wa tabga madhaka achaan hi sawwat nafisha aaliye min Allah.
[27] Wa inti, ya Muwaab, ma dihikti le Bani Israaʼiil walla ? Hal ligiiti Bani Israaʼiil maʼa l-saraariig walla ? Wa kan la ! Maala kulla wakit tihajji beehum wa tihizzi raaski ?
[28] Ya sukkaan Muwaab ! Amurgu min al-mudun wa askunu fi l-jibaal. Abgo misil al-hamaama al-tisawwi uchchaha // fi khachum al-karkuur.
[29] Aniina simiʼna be istikbaar Muwaab, balad mustakbire misilha ke ma fi. Wa simiʼna battaan hi titkabbar wa tistakbar wa hi tikoolif wa tifaachir.
[30] Wa daahu kalaam Allah : «Ana naʼarif kadar hi tarfaʼ raasha wa laakin hi tifaachir saakit fi l-riih wa kuluufiiyitha kula bala faayde.»
[31] Wa fi chaan da, ana nabki wa nunuuh le Muwaab kullaha wa nagnit fi chaan naas Khiir Haaras.
[32] Ya jineenit al-inab hana Sibma, nabki leeki ziyaada min bakiiyi le Yaʼziir. Wa furuuʼki faato al-bahar wa lihgo bahar Yaʼziir. Wa laakin al-mukharrib gamma yagtaʼ inabki wa yilaggit kichcheebki.
[33] Wa l-farah wa l-suruur bigo ma fiihum fi balad Muwaab al-khadra. Ana waggaft al-khamar, ma yamrug min al-assaara. Battaan ma yaʼasuru al-inab wa yifajjukhuuh be ragraag wa zakhraat al-farah ma yinsamiʼ battaan.
[34] Wa korooraak al-fazaʼ min madiinat Hachbuun yinsamiʼ lahaddi fi Aliʼaala wa lahaddi fi Yahaas. Wa yinsamiʼ min Suukhar lahaddi Hurunaayim wa lahaddi Aglat Chaliicha. Hatta uyuun almi hana Nimriim kula yaybaso.
[35] «Ana nidammir fi Muwaab al-naas al-yigaddumu dahaaya fi l-bakaan al-aali wa yiharrugu bakhuur le ilaahaathum.» Wa da kalaam Allah.
[36] Wa battaan galbi yahzan wa yunuuh misil al-suffaara le Muwaab wa le naas Khiir Haaras achaan al-khuna al-lammooha waddarat.
[37] Wa be da, hizno wa zayyano ruuseehum wa gattaʼo duguunhum wa jarraho iideehum wa libso khulgaan al-hizin.
[38] Wa fi ruuse kulla buyuut Muwaab wa fi kulla chawaariʼha ma fi cheyy aakhar illa l-nuwaah. «Ana kassart Muwaab misil jarr al-ma yanfaʼ.» Wa da kalaam Allah.
[39] Da kikkeef Muwaab addammarat ! Iitu wa guulu : «Chiifu ! Muwaab dangarat raasha min al-eeb. Wa hi bigat madhaka wa mukhiife le kulla l-jiiraanha al-muhawwigiinha.»
[40] Achaan daahu Allah gaal : «Aywa ! Al-adu yinrakhi fi Muwaab misil sagur al-jahhaz janaahe le yadrubha.
[41] Hillit Kharyuut yichiiluuha wa bakaanaatha al-gawiyiin yakurbuuhum. Wa fi l-yoom da, galib askar Muwaab yabga misil galib al-mara al-gaaʼide titaalig.
[42] Wa Muwaab takhrab, ma tabga chaʼab achaan hi sawwat nafisha aaliye min Allah.
[43] Ya sukkaan Muwaab ! Al-khoof wa l-nugra wa l-charak yukuunu fi lubbuku. Wa da kalaam Allah.
[44] Wa l-yiʼarrid min al-khoof yagaʼ fi l-nugra wa l-yidoor yamrug min al-nugra, al-charak yakurbah. Achaan da kulla ana bas jibtah fi Muwaab, fi sanit ikhaabha. Wa da kalaam Allah.
[45] Wa l-yiʼarrudu ma induhum gudra wa yidooru yinjammo fi dull madiinat Hachbuun. Laakin min Hachbuun tamrug naar wa min balad Siihuun, ambalbaala. Wa tahrig Muwaab balad al-unuf min tarafha lahaddi usutha.
[46] Al-azaab leeku, ya naas Muwaab ! Ya intu chaʼab sanam Kamuuch, tiwadduru. Achaan subyaanku wa banaatku yakurbuuhum wa yiwadduuhum fi l-khurba.
[47] Wa laakin fi l-akhiir, nigabbil naas Muwaab al-waddoohum fi l-khurba.» Wa da kalaam Allah. Wa khalaas, hini bas kammalat muhaakamat Allah le Muwaab.