[1] Wa Irmiya kammal min kalaamah le kulla l-chaʼab wa da kulla kalaam Allah Ilaahhum al-kallafah le yuguulah leehum.
[2] Wa Azarya wileed Huchaaʼya wa Yuuhanaan wileed Gaarih wa kulla l-rujaal al-mustakbiriin dool gaalo le Irmiya : «Kalaamak da kidib ! Ma sahiih. Wa Allah Ilaahna kula ma kallafaak le tuguul leena ma namchu Masir le naskunu hinaak.
[3] Wa laakin da Baruuk wileed Nariiya bas gaaʼid yiharrichak le tisawwi leena al-fasaala wa tisallimna le l-Baabiliyiin. Wa humman yaktuluuna aw yiwadduuna fi l-khurba fi Baabil.»
[4] Wa khalaas, Yuuhanaan wileed Gaarih wa kulla kubaaraat al-rujaal al-musallahiin wa kulla l-chaʼab ma simʼo amur Allah al-gaal yaskunu fi balad Yahuuza.
[5] Wa Yuuhanaan wileed Gaarih wa kulla kubaaraat al-rujaal al-musallahiin chaalo kulla l-faddalo min Bani Yahuuza al-gabbalo min al-buldaan al-humman muchattatiin fooghum wa saakniin fi balad Yahuuza.
[6] Wa chaalo battaan al-rujaal wa l-awiin wa l-iyaal wa banaat al-malik wa kulla l-naas al-Nabuuzaradaan kabiir al-hurraas ammanaahum le Gadaalya wileed Akhigaam wileed Chaafaan. Wa chaalo maʼaahum battaan al-nabi Irmiya wa Baruuk wileed Nariiya.
[7] Al-naas dool macho le hillit Tahfaniis fi Masir achaan humman ma simʼo kalaam Allah.
[8] Wa khalaas, Allah hajja le Irmiya fi hillit Tahfaniis wa gaal :
[9] «Amchi chiil hujaar itneen kubaar wa adfinhum fi l-fadaay giddaam madkhal gasir Firʼoon fi Tahfaniis. Wa l-hujaar dool adfinhum giddaam Bani Yahuuza.
[10] Wa guul leehum : ‹Daahu Allah al-Gaadir Ilaah Bani Israaʼiil gaal : “Ana nirassil nijiib abdi Nabuukhadnasar malik Baabil wa nukhutt kursiih hana l-muluk fi l-hujaar al-mulabbadiin dool. Wa hu yukhutt dallaaltah fi l-bakaan da.
[11] Wa hu yaji yihaarib balad Masir. Wa l-waajib leyah al-moot, yaktuluuh wa l-waajib leyah al-ubuudiiye, yiʼabbuduuh wa l-waajib leyah daribiin al-seef, yadurbuuh.
[12] Wa ana nahrig buyuut al-ilaahaat fi Masir be iid Nabuukhadnasar wa hu yahrig al-asnaam aw yiwaddiihum masaajiin. Wa hu yanhab balad Masir wa yilaggit khumaamha misil al-raaʼi yilaggit al-gamul min khalagah. Wa baʼad da, yamrug minha be l-salaam.
[13] Hu yarmi al-amad al-khazzoohum fi beet ibaadat al-harraay fi Masir wa yahrig buyuut ilaahaat Masir.”›»