[1] Wa laakin fi l-chahar al-saabiʼ, Ismaaʼiil wileed Natanya wileed Alichamaʼ ja le Gadaalya fi Misfa. Wa Ismaaʼiil da hu min zurriiyit al-mamlaka wa waahid min kubaaraat al-malik. Hu ja maʼa achara rujaal wa akalo maʼa Gadaalya.
[2] Wa baʼad da, Ismaaʼiil wa l-rujaal al-achara al-maʼaayah gammo darabo Gadaalya be l-seef wa katalooh. Wa misil da, humman katalo al-naadum al-malik Baabil khattaah haakim fi l-balad.
[3] Wa Ismaaʼiil katal battaan kulla l-Yahuud al-gaaʼidiin maʼa Gadaalya fi Misfa wa askar Baabil al-gaaʼidiin hinaak.
[4] Wa lahaddi l-yoom al-taani baʼad moot Gadaalya kula, ma fi naadum simiʼ cheyy.
[5] Wa fi l-wakit da, jo rujaal waahidiin adadhum 80. Wa l-naas dool, duguunhum muzayyaniin wa khulgaanhum mucharratiin wa jisimhum munakhkhach min al-hizin. Wa humman min mudun Chakiim wa Chiilooh wa l-Saamira wa chaayliin fi iideehum hadaaya hana dagiig wa bakhuur le yigaddumuuh fi beet Allah.
[6] Wa Ismaaʼiil marag min Misfa le yilaagiihum, maachi wa gaaʼid yabki. Wakit wassalaahum gaal leehum : «Alfaddalo bakaan Gadaalya wileed Akhigaam.»
[7] Wa wakit dakhalo fi l-madiina, Ismaaʼiil wa l-naas al-maʼaayah gammo karaboohum wa dabahoohum wa zagaloohum fi nugra.
[8] Wa laakin fi ust al-rujaal dool fi achara minhum gaalo le Ismaaʼiil : «Ma taktulna achaan aniina labbadna maʼaach katiir fi l-kadaade, gameh ahmar wa gameh abyad wa dihin wa asal.» Wa khalaas, hu ma katalaahum maʼa akhwaanhum.
[9] Wa l-nugra al-Ismaaʼiil daffag foogah al-jisas hana l-naas al-katalaahum fi bakaan Gadaalya, hi al-nugra al-zamaan nakatha Aasa malik mamlakat Yahuuza wakit hu gaaʼid yidaafiʼ le baladah didd Baʼaacha malik mamlakat Israaʼiil. Wa l-nugra di, Ismaaʼiil malaaha be jisas al-naas al-hu katalaahum.
[10] Wa baʼad da, Ismaaʼiil karab kulla l-chaʼab al-faddalo fi Misfa masaajiin wa humman banaat al-malik wa kulla l-naas al-faddalo fi Misfa. Wa dool al-naas al-Nabuuzaradaan kabiir al-hurraas ammanaahum le Gadaalya. Wa Ismaaʼiil karabaahum masaajiin wa macha beehum ale balad Bani Ammuun.
[11] Wa Yuuhanaan wileed Gaarih wa kulla kubaaraat al-rujaal al-musallahiin al-maʼaayah simʼo be kulla l-fasaala al-sawwaaha Ismaaʼiil wileed Natanya.
[12] Humman chaalo kulla rujaalhum wa macho yahjumu Ismaaʼiil wa lihgooh fi l-machiiche al-kabiire hint Gibʼuun.
[13] Wa wakit kulla l-chaʼab al-karabaahum Ismaaʼiil chaafo Yuuhanaan wileed Gaarih wa kubaaraat al-rujaal al-musallahiin al-maʼaayah, humman firho.
[14] Wa khalaas, kulla l-chaʼab al-Ismaaʼiil karabaahum fi Misfa gabbalo wa jo lammo maʼa Yuuhanaan.
[15] Wa laakin Ismaaʼiil wa l-tamaane naas al-maʼaayah nijo min Yuuhanaan wa macho le Bani Ammuun.
[16] Wa Yuuhanaan wa kulla kubaaraat al-rujaal al-musallahiin al-maʼaayah chaalo al-chaʼab al-faddalo al-Ismaaʼiil karabaahum fi Misfa baʼad katal Gadaalya. Wa l-chaʼab al-gabbaloohum min Gibʼuun, humman askar wa awiin wa iyaal wa masaaʼiil gasir al-malik.
[17] Humman macho lahaddi beet al-diifaan al-fi Kimhaam gariib le Beet Laham. Wa min hinaak, yidooru yamchu le Masir
[18] achaan yakhaafo min al-Baabiliyiin be sabab Ismaaʼiil katal Gadaalya haakim al-balad al-khattaah malik Baabil.