[1] Daahu Allah gaal le Irmiya : «Gumm amchi fi gasir malik Yahuuza wa hinaak inta tuguul leehum al-kalaam da.
[2] Inta guul : ‹Asmaʼ kalaam Allah, ya malik Yahuuza, inta al-gaaʼid fi kursi al-muluk hana Dawuud, inta wa khaddaamiinak wa chaʼabak al-yufuutu be l-biibaan dool.
[3] Daahu Allah gaal : “Sawwu al-hagg wa l-adaala wa najju al-mazluum min iideen al-zaalim. Ma tazulmu wa la titaʼʼubu al-ajnabi wa l-atiim wa l-armala wa ma tidaffugu damm al-bari fi l-bakaan da.
[4] Wa kan tisawwu misil da, khalaas yadkhulu be biibaan al-gasir da muluuk al-yagoodu fi kursi al-muluk hana Dawuud al-raakbiin fi arabaat harib wa kheel. Wa yadkhulu humman wa khaddaamiinhum wa chaʼabhum kula.
[5] Wa laakin kan ma tasmaʼo al-kalaam da, ana Allah nahlif be nafsi kadar al-gasir da yabga koom hana turaab.”›» Wa da kalaam Allah.
[6] Daahu Allah gaal kalaam al-bukhuss gasir muluuk Yahuuza : «Ya l-gasir ! Kan tukuun jamiil misil khaabat Gilʼaad wa aali misil jibaal Lubnaan kula, ana nisawwiik sahara wa madiina bala sukkaan.
[7] Ana jahhazt naas mukharribiin le yakharbuuk wa ayyi waahid indah fi iidah aalaat hana gatiʼ. Wa yagtaʼo hatabak hana l-arz al-jamiil wa yazguluuh fi l-naar.
[8] «Wa wakit naas min kulla l-umam yiʼaddu jamb al-madiina di, humman yissaaʼalo ambeenaathum wa yuguulu : ‹Maala Allah sawwa al-madiina al-kabiire di misil da ?›
[9] Wa yuruddu leehum wa yuguulu : ‹Achaan humman nagado muʼaahadat Allah Ilaahhum wa sajado giddaam ilaahaat aakhariin wa abadoohum.›»
[10] Ya naas Yahuuza, ma tabku le l-malik Yuuchiiya al-maat wa ma tahzano leyah kula. Wa laakin abku, abku ziyaada le l-malik Yahaaz wileed Yuuchiiya achaan hu battaan ma yigabbil fi l-ard al-wildooh foogha.
[11] Aywa, Yahaaz wileed Yuuchiiya malik Yahuuza rikib fi badal abuuh. Wa baʼad da, karabooh wa waddooh min al-bakaan da. Wa daahu Allah gaal : «Abadan hu ma yigabbil.
[12] Hu yumuut hinaak fi l-khurba wa ma yigabbil le l-balad di battaan.»
[13] Wa Allah gaal : «Al-azaab leek inta, ya l-malik Yahuuyakhim ! Inta tabni beetak bala hagg wa gasrak bala adaala. Wa tikhaddim al-naas bala tukfa wa ma tantiihum ujrithum.
[14] Wa inta tuguul : ‹Nabni le nafsi beet wasiiʼ wa gasir aali. Wa nisawwi leyah chabaabiik wa nijammilah be hatab al-arz wa nadurbah buhya hamra tchu.›
[15] Ya l-malik, be misil da, tiwassif mulkak walla ? Wa be hatab al-arz da tisawwi beetak sameh min hana l-naas walla ? Abuuk akal wa chirib misil al-naas al-aakhariin. Wa be da kula, hu daafaʼ le l-hagg wa l-adaala wa aach iiche haluuwe.
[16] Wa hu hama huguug al-masaakiin wa l-fagraaniin wa da bigi adiil. Wa misil da bas, al-naas yiwassufu kadar yakhaafo minni ana Allah. Wa da kalaam Allah.
[17] Wa laakin inta nazarak wa fikrak kulla fi l-faayde bas. Wa tidoor tidaffig damm al-bari wa tugumm be unuf wa zulum.»
[18] Wa fi chaan da, daahu Allah hajja kalaam al-bukhuss Yahuuyakhim wileed Yuuchiiya malik Yahuuza. Hu gaal : «Wakit yumuut, ma yunuuhu leyah wa yuguulu : ‹Kalawa, ya akhuuyi, kalawa, ya akhti.› Wa battaan, ma yunuuhu leyah wa yuguulu : ‹Ya khasaarit siidi, ya khasaarit al-malik al-aziim.›
[19] Wa yiwaddu janaaztah misil rimmit al-humaar al-mayyit. Yukurruuha wa yazguluuha barra min biibaan Madiinat al-Khudus.»
[20] Wa Allah gaal : «Ya Madiinat al-Khudus, atlaʼe fi jibaal Lubnaan wa kooriki ! Wa min hujaar Baachaan, khalli yinsamiʼ siraakhki. Wa min aʼaali Abaariim, kooriki achaan sudgaanki addammaro.
[21] Ana hajjeet leeki fi wakit raahitki wa inti raddeeti wa gulti ma tidoori tasmaʼeeni. Wa da bas deribki min inti sakhayre, abadan inti ma simiʼti kalaami.
[22] Wa hassaʼ khalaas, kulla ruʼyaanki yuruuhu fi l-riih wa dool kubaaraatki al-yichittu fi ayyi bakaan. Wa sudgaanki yakurbuuhum wa yiwadduuhum masaajiin. Wa inti tagoodi fi l-eeb wa l-ihaana wa da be sabab fasaalitki.
[23] Ya l-malik, inta al-saakin fi gasir Lubnaan wa fi beetak al-misil uchch al-mabni be hatab al-arz. Fi wakt al-taʼab, inta tagnit misil ganiit al-mara al-gaaʼide titaalig.»
[24] «Ya Yuyakiin wileed Yahuuyakhim malik Yahuuza, ana nahlif be usmi al-Hayy ! Hatta kan inta bigiit khaatim fi iidi al-zeene kula, ana namurgak. Wa da kalaam Allah.
[25] Ana nisallimak le l-yidooru mootak, aywa fi iideen al-naas al-inta tarjif giddaamhum. Wa da fi iideen Nabuukhadnasar malik Baabil wa askarah.
[26] Inta wa ammak al-wildatak niwaddiiku wa nazgulku fi ard al-ma wildooku foogha. Wa hinaak tagoodu lahaddi tumuutu.
[27] Wa arduku al-tagramo leeha, abadan ma tigabbulu leeha.»
[28] Maala al-malik da bigi misil jarr mukassar ma yanfaʼ ? Wa maala Yuyakiin bigi misil maaʼuun al-ma yidooruuh ? Wa maala hu wa iyaalah waddoohum baʼiid wa zagaloohum fi balad al-awwal ma yaʼarfuuha ?
[29] Ya baladi, baladi ! Ya baladi, asmaʼe kalaam Allah !
[30] Wa daahu Allah gaal : «Sajjulu al-raajil da misil naadum ma wilid wa ma najah fi hayaatah. Wa min iyaalah kula, ma fi waahid yanjah le yagood fi kursi al-muluk hana Dawuud wa yahkim fi Yahuuza.»