[1] Wa daahu kalaam Allah : «Ya Bani Israaʼiil ! Kan tigabbulu, gabbulu leyi ana. Wa kan tibaʼʼudu al-muharramaat min giddaami, battaan ma tiʼiiru.
[2] Wa kan tahalfu beyi ana Allah al-Hayy, be sahiih wa hagg wa adaala, khalaas al-umam yifattuchu minni al-baraka wa leyi ana, yimajjuduuni.»
[3] Wa daahu Allah hajja le naas Yahuuza wa sukkaan Madiinat al-Khudus wa gaal : «Intu misil zereʼ jadiid. Gabul ma yiteerubuuh, waajib yiʼadduluuh achaan ma yiteerubu fi l-chook.
[4] Tahhuru nufuusku leyi ana Allah, tahhuru guluubku, ya naas balad Yahuuza wa ya sukkaan Madiinat al-Khudus ! Wa be sabab amalku al-fasil, khadabi yugumm didduku // misil naar, yaakulku wa ma fi naadum al-yaktulha.»
[5] Yalla gummu khabburu fi balad Yahuuza wa Madiinat al-Khudus wa adurbu al-buug // fi kulla l-balad. Wa iitu be hiss aali wa guulu : «Limmu wa adkhulu fi l-mudun al-gawiyiin.»
[6] Arfaʼo raaye fi Sahyuun wa aljaʼo leeha wa ma tiʼakhkhuru fi l-tariig. Wa di l-fasaala al-nijiibha // min munchaakh wa hi damaar kabiir.
[7] Mudammir al-umam chaal al-derib, al-adu marag min bakaanah misil duud marag min nugurtah. Hu yaji wa yakhrib baladku wa mudunku yabgo faadiyiin // min sukkaanhum.
[8] Wa be sabab da, albaso khulgaan al-hizin wa abku wa nuuhu. Achaan khadab Allah al-muhrig ma yigabbil minku.
[9] Wa daahu kalaam Allah : «Fi l-yoom da, al-malik wa kubaaraatah yiwadduru chajaaʼithum wa rujaal al-diin yarjufu wa l-anbiya yinbahtu.»
[10] Khalaas, ana gult : «Ya Allah al-Rabb ! Akiid inta khachcheet al-chaʼab da wa Madiinat al-Khudus achaan gult leena nalgo al-salaam. Wa daahu al-seef gaaʼid yaktulna.»
[11] Wa fi l-wakit daak, al-Rabb yuguul le chaʼab Madiinat al-Khudus : «Fiyah riih haamiye jaaye min ruuse al-jibaal al-mulus hana l-sahara wa jaaye le ummati al-misil bitt ammi wa l-riih di jaaye wa la tidarri wa la tikharbil.
[12] Hi riih chadiide bilheen wa jaaye min hinaak be amri. Wa hassaʼ, ana kula nugumm nihaakimhum.»
[13] Wa l-chaʼab gaalo : «Daahu al-adu jaayi misil al-sahaab al-chaayil wa arabaathum hana l-harib misil riih amzoobaʼaane wa kheelhum sariiʼiin ziyaada min al-suguura. Ya khasaaritna ! Aniina addammarna !»
[14] Wa Allah gaal : «Ya Madiinat al-Khudus, naddifi galibki min kulla l-fasaala wa be da, talge al-naja. Le mata tahfade fi galibki afkaarki al-fasliin dool ?
[15] Asmaʼo ! Min Daan fi l-munchaakh, yikhabburu be l-fasaala al-jaaye wa min jibaal Afraayim, yanchuruuha.
[16] Fukku adaan al-umam wa khabburu Madiinat al-Khudus wa guulu : ‹Fi naas muhaasiriin jaayiin // min balad baʼiide wa yikooruku le l-harib // didd hillaal balad Yahuuza.
[17] Wa misil hurraas al-zereʼ, humman hawwago Madiinat al-Khudus min kulli jiihe achaan hi isatni ana.› Wa da kalaam Allah.
[18] Wa da taman haalki wa amalki wa di natiijat fasaalitki. Sahiih, da murr ziyaada lahaddi galibki yingatiʼ.»
[19] Wa Irmiya gaal : «Butuuni ! Butuuni hirgo ! Ana nittanna min al-wajaʼ wa galbi yadrub. Wa nafsi mubarjala wa ma nagdar naskut. Achaan ana simiʼt hiss al-buug wa korooraak al-harib.
[20] Wa yiʼiitu wa yuguulu : ‹Damaar fi damaar !› Aywa, kulla l-balad khirbat. Be khafla, khiyamna addammaro wa buyuutna alhaddamo // fi wakit galiil.
[21] Lahaddi mata nichiif raayit al-harib wa nasmaʼ hiss al-buug ?»
[22] Wa Allah gaal : «Aywa, chaʼabi munaafikhiin, humman ma yaʼarfuuni. Humman misil iyaal fikirhum mahduud, ma yagdaro yafhamo cheyy. Humman nachiitiin le sawwiyiin al-fasil laakin le sawwiyiin al-kheer, // ma yaʼarfuuh.»
[23] Ana chift. Daahu al-ard bigat kharaab wa sahara wa l-sama nuurha bigi ma fiih.
[24] Ana chift. Daahu al-jibaal gaaʼidiin yarjufu wa kulla l-hujaar yinhazzo.
[25] Ana chift. Daahu ma fi naadum wa kulla l-tuyuur arrado.
[26] Ana chift. Daahu al-balad al-khadra bigat sahara wa kulla l-mudun alhaddamo wa da min khadab Allah al-muhrig.
[27] Wa daahu Allah gaal : «Kulla l-ard takhrab wa laakin be da kula, ana ma nidammirha marra waahid.
[28] Wa be sabab da, al-ard taybas wa l-sama foog tidallim. Achaan al-kharaab da, ana bas kharrartah, ma nikhalliih wa ma nigabbil minnah.»
[29] Min harakat siyaad al-kheel wa l-yizarrugu al-nuchchaab, kulla naas al-hillaal yiʼarrudu. Waahidiin yadkhulu fi l-khaaba wa waahidiin yatlaʼo fi l-jibaal. Wa kulla hillaal Yahuuza yabgo faadiyiin wa sukkaanhum yabgo ma fiihum.
[30] Wa laakin inti, ya Madiinat al-Khudus, baʼad takhrabe, tisawwi chunu ? Maala talbase lubaas jamiil ahmar tchu wa tidissi ziinitki hint al-dahab wa tikahhili uyuunki ? Inti tijammili nafiski saakit bas ! Achaan sudgaanki al-jaro waraaki kula, yakrahooki wa yidooru mootki.
[31] Ana nasmaʼ baki misil chakwa hana mara al-titaalig, misil siraakh ambikeeriiye al-talda. Wa di Sahyuun al-misil bineeye, tasrakh wa tinaahij wa timidd iideenha le l-fazaʼ. Wa tuguul : «Ya khasaarti ! Ana wagaʼt mayte // giddaam al-kattaaliin.»