[1] Wa fi l-chahar al-aachir fi l-sana al-taasʼe hana hukum Sidkhiiya malik Yahuuza, Nabuukhadnasar malik Baabil ja be kulla askarah le Madiinat al-Khudus wa haasarha.
[2] Wa fi l-yoom al-taasiʼ hana l-chahar al-raabiʼ fi sanit 11 hana hukum Sidkhiiya, gaddo khurma fi durdur al-madiina.
[3] Wa khalaas, kulla khuyyaad malik Baabil jo wa gaʼado fi l-baab al-usut. Wa humman Nirgal Charaasar kabiir al-khuyyaad wa Samgar Nabu wa Sar Sakiim kabiir al-masaaʼiil wa kulla masaaʼiil malik Baabil al-aakhariin.
[4] Wa min chaafo al-naas dool, Sidkhiiya malik Yahuuza wa kulla askarah marago wa arrado min al-madiina be l-leel. Wa da be derib jineenit al-malik be l-baab al-gaaʼid ambeen al-daraadir al-itneen hana l-difaaʼ. Wa humman marago be l-derib al-maachi ale waadi al-Urdun.
[5] Wa laakin askar Baabil taradooh le Sidkhiiya wa lihgooh wa karabooh fi kadaadit Ariiha. Wa humman jaabooh fi hillit Ribla fi balad Hamaat giddaam Nabuukhadnasar malik Baabil. Wa fi l-bakaan da, haakamah.
[6] Wa malik Baabil dabah awlaad Sidkhiiya giddaamah fi Ribla wa battaan dabah kulla chuyuukh Yahuuza.
[7] Wa baʼad da, hu gaddad uyuun Sidkhiiya wa janzarah be jinziir hana nahaas matbuug le yiwaddiih fi Baabil.
[8] Wa l-Baabiliyiin gammo harrago gasir al-malik wa buyuut al-chaʼab fi Madiinat al-Khudus wa ramo durdurha.
[9] Wa l-chaʼab al-faddalo fi l-madiina wa l-naas al-andammo le malik Baabil wa l-naas al-aakhariin da, Nabuuzaradaan kabiir al-hurraas hana l-malik karabaahum wa waddaahum fi l-khurba fi Baabil.
[10] Wa laakin chaʼab waahidiin masaakiin al-ma yamulku ard, Nabuuzaradaan antaahum izin achaan yifaddulu fi balad Yahuuza. Wa fi l-yoom da, hu gassam leehum jineenaat inab wa ziraaʼa.
[11] Wa Nabuukhadnasar malik Baabil anta amur le Nabuuzaradaan kabiir hurraasah fi chaan Irmiya wa gaal :
[12] «Chiil Irmiya da maʼaak wa fakkir foogah adiil. Ma tisawwi leyah ayyi cheyy fasil wa sawwi leyah al-yidoorah.»
[13] Wa khalaas, Nabuuzaradaan kabiir al-hurraas wa Nabuuchazbaan kabiir al-masaaʼiil wa Nirgal Charaasar kabiir al-khuyyaad wa kulla khuyyaad malik Baabil
[14] rassalo jaabo Irmiya min fadaayit al-hurraas wa antooh le Gadaalya wileed Akhigaam wileed Chaafaan. Wa misil da, Gadaalya khalla Irmiya macha beetah wa gaʼad fi ust al-chaʼab.
[15] Wa wakit Irmiya lissaaʼ makruub fi fadaayit al-hurraas, Allah hajja leyah wa gaal :
[16] «Gumm wa amchi le Abdalmalik al-Habachi wa guul leyah : ‹Daahu Allah al-Gaadir Ilaah Bani Israaʼiil gaal : “Akiid ana nihaggig al-kalaam al-gultah didd al-madiina di wa da le l-charr ma le l-kheer. Wa l-yoom da, inta kula tichiifah.
[17] Wa laakin fi l-yoom da, ana ninajjiik wa inta ma yisallumuuk le l-naas al-inta takhaaf minhum. Wa da kalaam Allah.
[18] Wa akiid ana ninajjiik. Inta ma tumuut fi l-harib wa tiʼiich wa tabga farhaan achaan ligiit al-haya wa da be sabab inta atwakkalt aleyi.”›» Wa da kalaam Allah.