[1] Wa Irmiya anlaga mujanzar be janaaziir fi ust al-masaajiin hana Madiinat al-Khudus wa Yahuuza al-yidooru yiwadduuhum fi l-khurba fi Baabil. Wa laakin Nabuuzaradaan kabiir al-hurraas maragah min ust al-masaajiin wa khallaah yamchi min al-Raama. Wa baʼad da, Allah hajja le Irmiya.
[2] Wa gabul ma yufuut min al-Raama, Nabuuzaradaan gaal leyah : «Allah Ilaahak bas kharrar al-fasaala di didd al-bakaan da.
[3] Wa hassaʼ, Allah haggag kalaamah al-gaalah achaan intu Bani Israaʼiil aznabtu wa gammeetu didd Allah wa ma simiʼtu kalaamah. Wa fi chaan da bas, kulla l-cheyy da bigi.
[4] Wa hassaʼ, daahu ana fakkeet minnak al-janaaziir wa khalleetak. Kan inta tidoor tamchi maʼaayi fi Baabil, taʼaal ana nichiil masʼuuliiytak. Wa kan ma tidoor tamchi maʼaayi fi Baabil, khalaas amchi fi ayyi bakaan al-tidoorah wa l-yaʼajibak fi l-balad di.»
[5] Wa gabul Irmiya ma yurudd le Nabuuzaradaan, gaal leyah battaan : «Gabbil amchi le Gadaalya wileed Akhigaam wileed Chaafaan hu al-haakim al-khattaah malik Baabil fi hillaal balad Yahuuza. Agood fi ust al-chaʼab aw amchi fi ayyi bakaan al-yaʼajibak.» Wa Nabuuzaradaan antaah zaad wa hadiiye wa khallaah macha.
[6] Wa be misil da, Irmiya macha le Gadaalya fi Misfa wa gaʼad hinaak fi ust al-chaʼab al-faddalo fi l-balad.
[7] Wa fiyah rujaal waahidiin musallahiin min Bani Yahuuza gaaʼidiin fi l-kadaade. Wa l-rujaal dool wa kubaaraathum simʼo kadar malik Baabil khatta Gadaalya wileed Akhigaam haakim fi balad Yahuuza. Wa l-malik ammanah al-rujaal wa l-awiin wa l-iyaal wa l-masaakiin al-ma karaboohum wa waddoohum fi l-khurba fi Baabil.
[8] Wa l-rujaal al-musallahiin wa kubaaraathum dool jo le Gadaalya fi Misfa. Wa kubaaraathum humman Ismaaʼiil wileed Natanya wa Yuuhanaan wa Yuunataan // awlaad Gaarih wa Saraaya wileed Tanhuumat wa iyaal Ifaay min hillit Natuufa wa Yazanya min hillit Maʼaaka.
[9] Wa Gadaalya wileed Akhigaam wileed Chaafaan hajja le l-kubaaraat dool wa naashum wa gaal : «Ma takhaafo min sultit al-Baabiliyiin. Agoodu fi l-balad wa akhdumu tihit sultit malik Baabil wa akiid da yabga leeku adiil.
[10] Wa ana nagood hini fi Misfa wa nimassilku giddaam al-Baabiliyiin al-yaju leena. Wa intu kamaan takhdumu wa tagtaʼo al-inab wa l-fawaakih wa tiʼassuru dihin al-zaytuun wa tudummuuh fi l-makhaazin. Wa taskunu fi l-hillaal al-intu chiltuuhum fi wakt al-harib.»
[11] Wa kulla Bani Yahuuza al-arrado wa macho fi Muwaab wa fi usut Bani Ammuun wa fi Adoom wa fi buldaan aakhariin simʼo kadar malik Baabil khalla waahidiin min Bani Yahuuza faddalo fi l-balad. Wa khatta fooghum Gadaalya wileed Akhigaam wileed Chaafaan haakim.
[12] Wa be da, khalaas al-naas al-arrado gabbalo min al-bakaanaat al-muchattatiin fooghum. Wa jo fi balad Yahuuza fi Misfa le Gadaalya. Wa humman gataʼo al-inab wa l-fawaakih be katara.
[13] Wa yoom waahid, jo le Gadaalya fi Misfa Yuuhanaan wileed Gaarih wa kulla kubaaraat al-rujaal al-musallahiin al-gaaʼidiin fi l-kadaade.
[14] Wa gaalo leyah : «Inta ma indak khabar kadar Baʼaliis malik Bani Ammuun kallaf Ismaaʼiil wileed Natanya le yaktulak walla ?» Wa laakin Gadaalya aba ma saddag kalaamhum.
[15] Wa baʼad da, Yuuhanaan wileed Gaarih macha battaan be achiir le Gadaalya fi Misfa. Wa gaal leyah : «Antiini izin namchi naktul Ismaaʼiil wileed Natanya wa naadum yasmaʼ beyah ke ma fiih. Walla inta tidoor hu yaktulak ? Wa kan katalak, kulla Bani Yahuuza al-taabʼiinak yichittu wa l-faddalo minhum yabgo ma fiihum.»
[16] Wa Gadaalya wileed Akhigaam radda le Yuuhanaan wileed Gaarih wa gaal : «Ma tisawwi misil da ! Al-inta gaaʼid tuguulah fi Ismaaʼiil, da kidib ma sahiih.»