[1] Wa baʼad da, al-raajil maragaani be l-derib al-munchaakh ale l-fadaay al-barraaniiye. Wa waddaani ale l-khuraf al-mugaabiliin al-fadaay wa mugaabiliin al-beet al-mukhaddas be nussah al-munchaakhi.
[2] Wa l-khuraf fi l-munchaakh dool, tuulhum 100 duraaʼ wa urduhum 50 duraaʼ.
[3] Wa l-khuraf dool gaaʼidiin ambeen al-derib al-tuulah 20 duraaʼ wa l-hujaar al-mulus al-tallaso beehum al-fadaay al-barraaniiye. Wa l-khuraf dool gaaʼidiin jamb al-gasir al-indah talaata darajaat.
[4] Wa jamb al-khuraf dool, fiyah derib al-tuulah 100 duraaʼ wa urdah 10 duraaʼ wa muwajjih ale daakhal. Wa biibaan al-khuraf dool faathiin munchaakh.
[5] Wa l-khuraf fi l-daraja al-foog daygiin ziyaada min al-khuraf al-fi l-daraja hana l-usut wa l-tihit achaan al-derib chaal minhum.
[6] Wa l-khuraf dool gaaʼidiin fi gasir al-indah talaata darajaat wa laakin ma induhum amad misil al-buyuut al-aakhariin. Wa fi chaan da, l-khuraf fi l-daraja al-foog daygiin ziyaada min al-khuraf al-fi l-daraja hana l-usut wa l-tihit.
[7] Wa fiyah durdur barra min al-khuraf fi lubb al-fadaay al-barraaniiye wa giddaam al-khuraf dool. Wa tuul al-durdur da 50 duraaʼ.
[8] Al-khuraf al-muwajjihiin ale l-fadaay al-barraaniiye, tuulhum 50 duraaʼ. Wa l-khuraf al-muwajjihiin ale l-beet al-mukhaddas kamaan, tuulhum 100 duraaʼ.
[9] Wa fi l-daraja al-awwalaaniiye, fiyah madkhal be nuss al-sabaah wa l-naas al-yaju min al-fadaay al-barraaniiye yindasso beyah.
[10] Wa l-madkhal da gaaʼid fi aakhir al-durdur al-gaaʼid giddaam al-khuraf. Fi jiihat al-wati, khuraf aakhariin gaaʼidiin ambeen al-fadaay al-barraaniiye wa l-beet al-kabiir al-gaaʼid kharib min al-beet al-mukhaddas.
[11] Wa giddaam al-khuraf dool, fiyah derib misil al-derib hana l-khuraf fi l-munchaakh. Al-khuraf fi l-wati wa l-khuraf fi l-munchaakh, tuulhum wa urduhum sawa sawa wa kulla biibaanhum hana l-marigiin wa l-dakhiliin nizaamhum waahid.
[12] Biibaanhum yinfathu ale l-wati wa fiyah derib ambeen al-khuraf wa l-durdur al-giddaamhum. Wa fiyah madkhal al-gaaʼid be sabaah fi aakhir al-durdur wa l-naas yindasso beyah.
[13] Wa l-raajil gaal leyi : «Al-khuraf fi l-munchaakh wa l-khuraf fi l-wati mugaabiliin al-fadaay hana l-beet al-mukhaddas wa be da, humman mukhassasiin. Wa fi l-khuraf dool bas, rujaal al-diin al-yigarrubu le Allah waajib yaakulu al-hadaaya al-mukhassasiin marra waahid. Wa fi l-khuraf dool bas, waajib yudummu al-hadaaya al-mukhassasiin marra waahid wa dool al-hadaaya hana l-dagiig wa l-dahaaya le kaffaarat al-zanib wa l-dahaaya le kaffaarat al-khata achaan al-bakaan da mukhaddas.
[14] Wa wakit rujaal al-diin yamurgu min al-bakaan al-mukhaddas, ma yamurgu tawwaali ale l-fadaay al-barraaniiye. Waajib humman yamchu fi l-khuraf dool wa yisillu khulgaanhum hana l-khidme wa yudummuuhum hinaak achaan al-khulgaan dool mukhassasiin. Wa humman yalbaso khulgaan al-aadiyiin wa baʼad da, yagdaro yigarrubu le l-bakaanaat al-gaaʼidiin fooghum al-chaʼab.»
[15] Wakit al-raajil kammal min magaas al-beet al-mukhaddas daakhal, hu maragaani be beet al-madkhal al-sabhaani barra le yikiil kulla daayir al-hooch.
[16] Wa kaal tuul al-hooch be nussah al-sabhaani be uud al-kiyaal wa ligiih 500 uud hasab uud al-kiyaal.
[17] Wa kaal tuul al-hooch be nussah al-munchaakhi be uud al-kiyaal wa ligiih 500 uud.
[18] Wa kaal tuul al-hooch be nussah al-watiyaani be uud al-kiyaal wa ligiih 500 uud.
[19] Wa hu kammal be l-nuss al-kharbaani. Hu kaal tuul al-nuss da wa ligiih 500 uud hasab uud al-kiyaal.
[20] Wa be da, hu kaal daayirat durdur al-hooch be l-jiihaat al-arbaʼa wa ligiih tuulah wa urdah kula 500 uud. Wa durdur al-hooch da yafsul ambeen al-bakaan al-mukhaddas wa l-bakaan al-ma mukhaddas.