[1] Wa Allah hajja leyi ana Hizgiyaal wa gaal :
[2] «Ya ibn Adam, hajji le chaʼabak wa guul leehum : ‹Wakit nijiib al-harib fi ayyi balad, al-chaʼab yichiilu minhum naadum wa yukhuttuuh haras.
[3] Kan al-naadum da yichiif al-adu jaayi, khalaas hu yadrub al-buug le yikhabbir al-chaʼab.
[4] Wa kan naadum yasmaʼ hiss al-buug wa laakin ma yichiil al-hazar, wakit al-harib yugumm hu yumuut wa hu bas yukuun masʼuul min mootah.
[5] Aywa, kan naadum yasmaʼ hiss al-buug wa ma yichiil al-hazar, hu bas yukuun masʼuul min mootah. Wa l-yichiil al-hazar kamaan, hu yinajji nafsah.
[6] Wa laakin kan al-haras yichiif al-adu jaayi wa ma yadrub al-buug, khalaas al-chaʼab ma induhum al-hazar. Wa kan al-harib yugumm wa waahid minhum yumuut, al-khata hana l-moot da yagaʼ fi raas al-haras. Wa ana natlub dimmit al-mayyit da min al-haras.›
[7] «Wa inta, ya ibn Adam, ana khatteetak haras fi Bani Israaʼiil. Inta tasmaʼ kalaami wa tihazzirhum.
[8] Akuun nuguul le l-aasi akiid yumuut. Kan inta ma tihajji le l-aasi wa tihazzirah le yikhalli derbah al-fasil wa hu yumuut fi khataayah, khalaas minnak inta bas ana natlub dimmitah.
[9] Wa laakin kan inta hazzart al-aasi le yikhalli derbah al-fasil wa hu aba ma yikhalliih, khalaas hu yumuut fi khataayah wa inta najjeet nafsak.
[10] «Asmaʼ, ya ibn Adam. Guul le Bani Israaʼiil : ‹Daahu intu gultu : “Isyaanna wa zunuubna gaaʼidiin foogna wa be sababhum, aniina diʼifna. Wa be da, kikkeef nagdaro nahyo ?”›
[11] Wa guul leehum : ‹Daahu kalaam Allah al-Rabb : “Nahlif be usmi al-Hayy, ana ma nafrah be moot al-aasi. Laakin khalli yigabbil min derbah al-fasil wa yahya. Gabbulu ! Gabbulu min duruubku al-fasliin. Maala tidooru al-moot, ya Bani Israaʼiil ?”›
[12] «Wa inta, ya ibn Adam, guul le chaʼabak : ‹Adaalit al-aadil ma tinajjiih kan yugumm be l-isyaan. Wa isyaan al-aasi ma yitartiʼah kan hu yigabbil min isyaanah. Aywa, al-aadil ma yagdar yiʼiich fi adaaltah kan hu yaznib.
[13] Wakit nuguul le l-aadil akiid yahya, hu yahya. Wa laakin akuun hu yitwakkal ale adaaltah wa yugumm be l-zulum. Wa be da, al-naas ma yizzakkaro kulla amalah al-saalih wa hu yumuut fi zulmah al-hu sawwaah.
[14] Wa kan nuguul le l-aasi akiid yumuut, hu yumuut. Wa laakin kan hu yikhalli zanbah wa yugumm be l-hagg wa l-adaala
[15] wa kan hu yigabbil al-damaana wa yigabbil ayyi cheyy al-sirgah wa yamchi hasab gawaaniin al-haya wa ma yisawwi al-zulum, khalaas be da, akiid hu yahya wa ma yumuut.
[16] Ma fi zanib min zunuubah al-yizzakkarooh beyah achaan hu sawwa al-hagg wa l-adaala wa be da, akiid hu yiʼiich.›
[17] «Wa chaʼabak buguulu : ‹Al-cheyy al-sawwaah al-Rabb da ma adiil.› Al-cheyy al-humman gaaʼidiin yisawwuuh da bas ma adiil.
[18] Wakit al-aadil yigabbil min adaaltah wa yugumm be l-zulum, hu yumuut be sababah.
[19] Wa wakit al-aasi yigabbil min isyaanah wa yugumm be l-hagg wa l-adaala, hu yahya be sababhum.
[20] Wa be da kula, intu tuguulu : ‹Al-cheyy al-sawwaah al-Rabb da ma adiil !› Ana nihaakimku hasab deribku al-chiltuuh, ya Bani Israaʼiil.»
[21] Wa fi l-yoom al-khaamis hana l-chahar al-aachir fi sanit 12 min waddoona fi l-khurba, ja leyi naadum waahid muʼarrid min Madiinat al-Khudus wa gaal leyi : «Al-madiina chaalooha !»
[22] Fi l-achiiye gubbaal al-naadum da ma yaji leyi, gudrat Allah nazzalat foogi wa khachmi anfatah. Wa be fajur wakit hu ja leyi, khachmi faatih wa ana ma abkam.
[23] Wa Allah hajja leyi wa gaal :
[24] «Ya ibn Adam, al-sukkaan hana l-hillaal al-muhaddamiin al-fi balad Israaʼiil yuguulu : ‹Ibraahiim wiheedah bas chaal al-balad di. Wa aniina katiiriin wa antooha leena warasa.›
[25] Wa fi chaan da, guul leehum : ‹Daahu Allah al-Rabb gaal : “Intu taakulu laham fatiis wa taʼabudu al-asnaam wa taktulu al-dimam. Wa be da, tawrusu al-balad di walla ?
[26] Wa taakulu be gudrat suyuufku wa awiinku yisawwan al-haraam. Wa ayyi raajil minku yargud maʼa marit jaarah wa yinajjisha. Wa be da, tawrusu al-balad di walla ?”›
[27] «Wa daahu al-cheyy al-tuguulah leehum : ‹Daahu Allah al-Rabb gaal : “Nahlif be usmi al-Hayy, humman al-gaaʼidiin fi l-hillaal al-muhaddamiin yumuutu fi l-harib wa l-gaaʼidiin fi l-kadaade, haywaanaat al-kadaade yaakuluuhum wa l-gaaʼidiin fi l-jibaal wa l-karaakiir yumuutu be l-waba.
[28] Wa nisawwi al-balad kharbaane wa yaabse wa gudrat istikbaarha tagiif. Wa jibaal Israaʼiil yabgo kharaab wa naadum waahid kula ma yufuut beehum battaan.
[29] Wa wakit nisawwi al-balad kharbaane wa yaabse be sabab kulla l-haraam al-sawwooh, khalaas humman yaʼarfu kadar ana bas Allah.”›
[30] «Wa asmaʼ, ya ibn Adam ! Chaʼabak yihajju beek fi tihit al-daraadir wa fi khuchuum al-biibaan. Al-waahid yihajji le l-aakhar wa ayyi waahid yihajji le akhuuh wa yuguul : ‹Taʼaalu asmaʼo al-kalaam al-jaayi min Allah !›
[31] Wa chaʼabi yaju leek be katara wa yagoodu giddaamak. Wa yasmaʼo kalaamak wa laakin ma yitabbuguuh. Yukhuchchu be kalaamhum wa yamchu wara maal al-haraam.
[32] Wa daahu inta bigiit leehum misil khinneeye hana hubb al-yikhannuuha be hiss halu wa be aala hana musiikha. Humman yasmaʼo kalaamak wa laakin ma yitabbuguuh.
[33] Wa wakit al-cheyy al-tihajji beyah yaji wa kan ja khalaas, yaʼarfu tamaam kadar fi nabi gaaʼid fi usuthum.»