[1] Wa Allah hajja leyi wa gaal :
[2] «Ya ibn Adam, arrif le Madiinat al-Khudus al-muharramaat al-hi sawwathum.
[3] Wa guul le Madiinat al-Khudus : ‹Daahu Allah al-Rabb gaal : “Gaʼarki wa bakaan wildooki kulla ke fi balad Kanʼaan. Abuuki min gabiilat al-Amuuriyiin wa ammiki min gabiilat al-Hittiyiin.
[4] Wa yoom wildooki, ma gataʼo surritki wa la barradooki be almi le tabge nadiife wa la daʼʼakooki be mileh wa la laffooki be farde.
[5] Wa ma fi naadum rahamki wa la hanna foogki. Laakin fi yoom wildooki, zagalooki fi l-kadaade achaan bigiiti iife.
[6] «‹“Wa laakin ana faayit jambiki wa chiftiki mulmarmikhe fi lubb dammiki. Wa be dammiki kula, ana gult leeki waajib tiʼiichi. Aywa, waajib tiʼiichi.
[7] Wa ana gawwamtiki misil nabaat al-kadaade. Wa inti sabatti wa kibirti wa bigiiti jamiile marra waahid. Wa duyuudki gammo wa suuf jilidki kula gamma wa laakin inti aryaane marra waahid.
[8] Wa baʼad da, ana faayit jambiki battaan wa daahu chift inti tammeeti, aywa, tammeeti le l-akhiide. Wa ana matteet daayir khalagi foogki wa khatteet ireeki. Wa ana halaft leeki wa karabt raaski wa sawweet maʼaaki muʼaahada wa gult inti hinti. Wa da kalaam Allah al-Rabb.
[9] «‹“Wa ana barradtiki wa naddaftiki min dammiki al-foogki wa baʼad da, massahtiki be dihin muʼattar.
[10] Wa ana labbastiki khulgaan mukallafiin wa naʼaal min farwit ijil al-bahar wa laffeetki be gumaach kattaan wa khatteetki be hariir.
[11] Wa jammaltiki be ziina, be suure fi iideeki wa kijeel fi ragabatki
[12] wa chinif fi munkharki wa khuruus fi udneeki wa taaj jamiil fi raaski.
[13] Wa ziinitki min dahab wa fudda wa khulgaanki min gumaach kattaan wa hariir wa gitʼe mukallafa. Wa akalti dagiig wa asal wa dihin. Wa inti bigiiti jamiile marra waahid misil malika.
[14] Wa usumki bigi aali fi ust al-umam achaan jamaalki kaamil be sabab al-ziina al-ana jammaltiki beeha.”›» Wa da kalaam Allah al-Rabb.
[15] «‹“Wa laakin inti atwakkalti ale jamaalki wa ale usumki al-aali wa achcharmatti. Sawweeti charmatatki maʼa ayyi naadum al-faayit wa bigiiti hintah.
[16] Wa chilti min khulgaanki al-mulawwaniin wa jammalti beehum bakaanaat aaliyiin hana ibaada wa achcharmatti fooghum. Wa cheyy misil da abadan ma bigi wa abadan ma yabga battaan !
[17] Wa inti chilti al-ziina hana l-dahab wa l-fudda al-ana anteethum leeki wa sawweeti beehum asnaam dukuura wa achcharmatti maʼaahum.
[18] Wa chilti khulgaanki al-mukallafiin wa labbastiihum le l-asnaam dool wa gaddamti leehum dihni wa bakhuuri.
[19] Wa khubziti al-anteetha leeki wa l-dagiig wa l-dihin wa l-asal al-ana akkaltuhum leeki, inti chiltiihum wa gaddamtiihum hadaaya le asnaamki le yardo be riihithum. Wa da bas al-sawweetiih ! Wa da kalaam Allah al-Rabb.
[20] «‹“Wa chilti awlaadki wa banaatki al-wilidtiihum leyi wa gaddamtiihum dahaaya le l-asnaam dool le yaakuluuhum. Wa min al-charmata, ma chibiʼti walla ?
[21] Inti dabahti iyaali wa harragtiihum wa gaddamtiihum le asnaamki.
[22] Wa fi kulla muharramaatki wa charmatatki, ma fakkarti fi ayyaam chabaabki wakit al-inti aryaane marra waahid wa mulmarmikhe fi dammiki.
[23] «‹“Wa baʼad kulla fasaalitki, al-azaab leeki ! Aywa, al-azaab jaaki ! Wa da kalaam Allah al-Rabb.
[24] Wa inti baneeti ligdaabe wa sawweeti bakaan aali hana ibaada fi ayyi nagaʼa.
[25] Fi dakhuul ayyi derib, baneeti bakaan aali wa astaʼmalti jamaalki fi l-amal al-muharram. Wa gaddamti nafiski le ayyi naadum al-faayit wa kattarti charmatatki.
[26] Wa achcharmatti maʼa l-Masriyiin jiiraanki al-ajsaamhum kubaar wa kattarti charmatatki le tikhaddibiini.
[27] Wa daahu ana rafaʼt iidi diddiki wa gallalt maʼaachki. Wa sallamtiki le udwaanki al-kirhooki wa l-eeb karab banaat al-Filistiyiin kula be sabab fiʼilki al-cheen.
[28] Wa inti ma chibiʼti min al-charmata lahaddi achcharmatti maʼa naas balad Achuur. Aywa, achcharmatti maʼaahum wa be da kula, ma chibiʼti.
[29] Wa kattarti charmatatki min balad Kanʼaan lahaddi balad Baabil wa be da kula, inti ma chibiʼti abadan min al-charmata !
[30] «‹“Akiid ma gidirti fi galibki ! Sawweeti kulla l-achya dool wa humman amal hana charmuuta kabiire. Wa da kalaam Allah al-Rabb.
[31] Wa baneeti ligdaabe fi dakhuul hana kulla l-duruub wa sawweeti bakaan aali hana ibaada fi ayyi nagaʼa. Wa ma chilti taman charmatatki misil al-charaamiit al-aakharaat.
[32] La ! Inti misil mara zaaniye al-tifattich rujaal aakhariin bala raajilha !
[33] Fi l-aade, yantu hadaaya le l-charaamiit. Wa laakin inti anteeti hadaaya le kulla sudgaanki ! Aywa, inti kaffeetiihum le yaju leeki min ayyi bakaan wa yichcharmato maʼaaki.
[34] Fi charmatatki, inti ma sawweeti misil al-awiin al-aakharaat. Ma fattachooki inti laakin inti bas kaffeetiihum ! Sawweeti al-aks !”›»
[35] Wa fi chaan da, asmaʼe kalaam Allah, ya l-charmuuta !
[36] Daahu Allah al-Rabb gaal : «Chahwaatki ziyaada fi ayyi wakit wa kachafti ireeki wakit gaaʼide tichcharmate maʼa sudgaanki wa maʼa kulla asnaamki al-muharramiin. Hatta damm iyaalki kula anteetiih leehum.
[37] Wa fi chaan da, ana nilimm kulla sudgaanki al-ajabtiihum wa kulla l-habbeetiihum wa kulla l-kirihtiihum. Aywa, ana nilimmuhum min ayyi jiihe diddiki. Wa giddaamhum, nakchif ireeki wa humman yichiifuuki aryaane.
[38] Wa nihaakimki hukum al-awiin al-zannaayaat wa kattaalaat al-dimam. Wa min chiddit khadabi wa khiirti, nikhattiiki be damm.
[39] Wa nisallimki le sudgaanki wa humman yidammuru lagaadiibki wa yahdumu bakaanaatki al-aaliyiin hana l-ibaada. Wa yisillu minki khulgaanki wa yanhabo ziinitki al-khaaliye wa yikhalluuki aryaane marra waahid.
[40] Wa yigawwumu al-mujtamaʼ diddiki wa yarjumuuki wa yigattuʼu laham jilidki be l-seef.
[41] Wa yiharrugu buyuutki wa yichaaruʼuuki giddaam awiin katiiraat. Wa ana niwaggif charmatatki wa battaan ma tagdare tikaffi sudgaanki.
[42] «Wa nitimm khadabi foogki. Wa baʼad da, nibaʼʼid minki khiirti wa nabga haadi wa battaan ma nakhdab.
[43] Achaan inti ma fakkarti ayyaam chabaabki wa gammeeti diddi be kulla fiʼilki al-cheen da. Wa khalaas, daahu ana nihammilki natiijat amalki. Inti sawweeti muharramaatki wa zidti fooghum fiʼilki al-cheen !» Wa da kalaam Allah al-Rabb.
[44] «Chiifi ! Yadurbu foogki masal al-buguul : ‹Al-bineeye misil ammaha.›
[45] Inti bineeyit al-mara al-kirhat raajilha wa iyaalha. Wa inti akhut al-akhwaat al-kirhan rujaalhin wa iyaalhin. Aywa, ammiki min gabiilat al-Hittiyiin wa abuuki min gabiilat al-Amuuriyiin.
[46] Wa akhutki al-kabiire hi madiinat al-Saamira al-gaaʼide munchaakh minki maʼa banaatha. Wa tariiditki hillit Saduum al-gaaʼide junuub minki maʼa banaatha.
[47] Inti ma chilti derib akhwaatki bas wa la sawweeti muharramaat misilhin. La, da inti chifti chiyya leeki ! Inti hilikti ziyaada minhin be kulla fiʼilki al-cheen.»
[48] Wa daahu kalaam Allah al-Rabb : «Nahlif be usmi al-Hayy ! Saduum akhutki wa banaatha ma sawwan fiʼil cheen ziyaada min al-inti wa banaatki sawweetannah.
[49] Wa daahu khata akhutki Saduum. Hi mustakbire wa chabʼaane be l-akil wa ma indaha hamm wa gaaʼide fi l-raaha, hi wa banaatha. Wa laakin hinna ma saaʼadan ayyi naadum miskiin wa la daʼiif.
[50] Hinna bigan mustakbiraat wa sawwan al-cheyy al-ana jaʼaltah muharram. Wa ana dammartihin wakit chift al-cheyy da.
[51] Wa l-Saamira ma sawwat nuss zunuubki kula wa inti kattarti muharramaatki ziyaada min hineeha. Wa sawweeti akhwaatki misil awiin saalhaat be kulla muharramaatki al-inti sawweetiihum !
[52] Wa hassaʼ da, alhammale eebki. Wa inti sawweeti akhwaatki misil awiin saalhaat wa da be sabab zunuubki al-muharramiin ziyaada min hineehin. Hinna bigan saalhaat ziyaada minki. Dangiri raaski wa alhammale eebki achaan akhwaatki saalhaat ziyaada minki.
[53] «Yoom waahid, ana nikhayyir leehin haalithin. Aywa, nikhayyir haalit Saduum wa banaatha wa l-Saamira wa banaatha. Wa nikhayyir haalitki inti kula maʼaahin.
[54] Fi l-yoom da, tilhammale eebki wa takhjale fi kulla cheyy al-sawweetiih wa da yisabbirhin.
[55] Wa akhutki Saduum wa banaatha yigabbilan fi haalithin al-zamaan. Wa akhutki al-Saamira wa banaatha yigabbilan fi haalithin al-zamaan. Wa inti wa banaatki kula tigabbilan fi haalitkan al-zamaan.
[56] Wa fi wakit istikbaarki, inti chammatti fi akhutki Saduum.
[57] Wa da gubbaal fasaalitki ma tibiin. Wa hassaʼ da, doorki ja. Banaat al-Araamiyiin wa kulla jaaraathin yiʼayyibanki wa banaat al-Filistiyiin yahgiranki min kulla jiihe.
[58] Wa inti tilhammale natiijat fiʼilki al-cheen wa muharramaatki.» Wa da kalaam Allah.
[59] Wa daahu Allah al-Rabb gaal : «Inti gataʼti haliifitki wa nagadti muʼaahadatki maʼaayi. Wa hassaʼ, ana nisawwi foogki misil inti sawweeti foogi.
[60] Wa ana nifakkir fi muʼaahadati al-sawweetha maʼaaki fi ayyaam chabaabki wa nisabbit maʼaaki muʼaahadati al-daayme.
[61] Wa tifakkiri fi amalki wa l-eeb yakrubki wakit tigaabili akhutki al-kabiire maʼa akhutki al-sakhayre. Wa ana nantiihin leeki misil banaat wa laakin ma yichaarikan fi l-muʼaahada.
[62] Wa nisabbit muʼaahadati maʼaaki. Wa be da, taʼarfi kadar ana bas Allah.
[63] Wa wakit tifakkiri fi l-faat, al-eeb yakrubki wa battaan ma tagdare tufukki khachumki achaan inti waddarti charafki. Wa laakin ana nakhfir leeki kulla cheyy al-sawweetiih.» Wa da kalaam Allah al-Rabb.