[1] Wa l-ruuh rafaʼaani foog wa waddaani fi l-baab al-sabhaani hana beet Allah al-mugaabil taluuʼ al-harraay. Wa fi khachum al-baab da, ana chift 25 raajil wa fi usuthum, chiif kubaaraat itneen hana l-chaʼab wa humman Yaazanya wileed Azzuur wa Falatya wileed Banaaya.
[2] Wa Allah gaal leyi : «Ya ibn Adam, dool al-rujaal al-yikhattutu al-zulum wa yiwassu be l-fasaala fi l-madiina di.
[3] Wa humman yuguulu : ‹Yoom al-ikhaab lissaaʼ baʼiid ! Khalli nabnu buyuutna. Achaan al-madiina di aamine misil burma wa aniina misil al-laham al-fi lubbaha.›
[4] Ya ibn Adam ! Fi chaan kalaamhum da, atnabbaʼ didduhum ! Aywa, atnabbaʼ».
[5] Wa Ruuh Allah nazal foogi wa Allah gaal leyi : «Hajji wa guul : ‹Daahu Allah gaal : “Ya Bani Israaʼiil, intu hajjeetu misil da. Wa l-gaaʼid fi fikirku kula, ana naʼarfah.
[6] Intu kattartu al-katil fi l-madiina di wa maleetu chawaariʼha be l-janaazaat.”›»
[7] Wa fi chaan da, daahu Allah al-Rabb gaal : «Sahiih, al-madiina di, hi misil burma wa laakin al-janaazaat al-daffagtuuhum fi lubbaha, humman bas al-laham. Wa laakin leeku intu kamaan, ana namrugku minha.
[8] Intu khaayfiin min al-harib wa be da, ana nijiib leeku al-harib. Wa da kalaam Allah al-Rabb.
[9] Ana namrugku min al-madiina wa nisallimku le l-ajaanib wa niʼaakhibku.
[10] Wa yaktuluuku be l-seef lahaddi huduud balad Israaʼiil ! Niʼaakhibku wa be da, taʼarfu kadar ana bas Allah.
[11] La, al-madiina ma tabga leeku misil burma aamine wa intu ma tabgo misil laham fi lubbaha ! Ana niʼaakhibku lahaddi huduud balad Israaʼiil.
[12] Wa be da, taʼarfu kadar ana bas Allah. Intu ma taabaʼtu churuuti wa la tabbagtu gawaaniini wa laakin tabbagtu aadaat al-umam al-muhawwigiinku !»
[13] Wa wakit gaaʼid nitnabbaʼ, tawwaali Falatya wileed Banaaya maat. Wa ana wagaʼt be wijhi fi l-ard wa sarakht be hiss aali wa gult : «Ya Allah Rabbi, tidoor tikammil al-faddalo min Bani Israaʼiil walla ?»
[14] Wa Allah hajja leyi wa gaal :
[15] «Ya ibn Adam, sukkaan Madiinat al-Khudus gaaʼidiin yihajju le akhwaanak wa ahalak wa kulla Bani Israaʼiil al-fi l-khurba wa yuguulu : ‹Agoodu hinaak baʼiid min Allah. Achaan hassaʼ, al-balad di antooha leena aniina warasa.›
[16] «Wa fi chaan da, guul le l-naas al-fi l-khurba : ‹Daahu Allah al-Rabb gaal : “Hatta kan ana baʼʼadtuku fi l-umam wa chattattuku fi l-buldaan kula, hadarati bigat leeku misil beet mukhaddas fi ayyi balad al-intu macheetu foogha.”›
[17] Wa fi chaan da, guul leehum : ‹Daahu Allah al-Rabb gaal : “Ana nilimmuku min ust al-chuʼuub wa najmaʼku min al-buldaan al-intu muchattatiin fooghum wa nantiiku battaan balad Israaʼiil.
[18] Wa intu taju foogha wa tibaʼʼudu minha kulla muharramaatha wa ayyi cheyy makruuh.
[19] Wa nantiiku galib waahid wa nukhutt foogku ruuh jadiide. Wa namrug minku galibku al-gawi misil al-hajar wa nidiss leeku galib layyin hana insaan
[20] achaan titaabuʼu churuuti wa tahfado gawaaniini wa titabbuguuhum. Wa be da, intu tabgo chaʼabi wa ana nabga Ilaahku.
[21] Wa laakin al-galibhum marbuut be l-muharramaat wa ayyi cheyy makruuh, ana nihammilhum natiijat amalhum.”›» Wa da kalaam Allah al-Rabb.
[22] Wa baʼad da, al-makhluugiin al-samaawiyiin mattato janaaheehum wa l-ajalaat kula macho maʼaahum wa majd Allah Ilaah Bani Israaʼiil gaaʼid min foog leehum.
[23] Wa majd Allah gamma min ust al-madiina wa macha gaʼad foog fi l-jabal sabaah le l-madiina.
[24] Wa fi l-ruʼya di, Ruuh Allah rafaʼaani wa gabbalaani fi Baabil bakaan al-naas al-waddoohum fi l-khurba. Wa baʼad da, al-ruʼya al-ana chiftaha anrafaʼat minni.
[25] Wa ana kallamt le l-naas al-waddoohum fi l-khurba be kulla cheyy al-Allah wassafah leyi.