[1] Wa Allah hajja leyi wa gaal :
[2] «Ya ibn Adam, wajjih ale Madiinat al-Khudus wa kallim didd al-bakaanaat al-mukhaddasiin wa atnabbaʼ didd balad Israaʼiil.
[3] Wa guul le balad Israaʼiil : ‹Daahu Allah gaal : “Akiid nugumm diddiki wa nisill seefi min beetah wa naktul al-saalih wa l-aasi kula.
[4] Aywa, naktul al-saalih wa l-aasi. Wa be sabab da bas, nisill seefi min beetah wa naktul kulla l-naas min al-wati lahaddi l-munchaakh.
[5] Wa be da, ayyi naadum yaʼarif kadar ana Allah bas salleet seefi min beetah wa battaan ma nigabbilah.”›
[6] «Wa inta, ya ibn Adam, agnit wa dangir. Aywa, be hizin agnit giddaamhum.
[7] Akuun yuguulu leek : ‹Maalak tagnit ?› Wa inta tuguul leehum : ‹Be sabab al-khabar al-jaayi, kulla l-guluub yingatʼu wa kulla l-iide yinrakhu wa kulla l-uguul yibarjulu wa kulla l-rikab yumuuʼu misil almi. Wa l-khabar da jaayi wa yilhaggag.›» Wa da kalaam Allah al-Rabb.
[8] Wa Allah hajja leyi wa gaal :
[9] «Ya ibn Adam, atnabbaʼ wa guul : ‹Daahu Allah al-Rabb gaal : “Al-seef ! Al-seef ! Hu mutarrag wa majli.
[10] Mutarrag le l-katil wa majli le yiraari misil al-barraaga. Ma tafrah, ya wileedi. Ikhaab al-seef jaayi achaan inta abeet ikhaab al-asa.
[11] Anto al-seef le l-yajliih wa le l-yakurbuuh be l-iid. Tarragooh wa jalooh wa antooh le l-yaktul.
[12] «‹“Ya ibn Adam, koorik wa abki be hizin achaan al-seef da marag didd chaʼabi wa didd kulla muluuk Bani Israaʼiil. Ramoohum fi l-seef maʼa chaʼabi wa fi chaan da, hizz raasak.
[13] Aywa, Allah gaaʼid yijarrib chaʼabah. Wa kan asaat al-muluk al-hagarooha bigat ma fiiha, chunu yukuun ? Wa da kalaam Allah al-Rabb.
[14] «‹“Ya ibn Adam, atnabbaʼ wa adrub iideenak achaan al-seef yadrub marrateen aw talaata. Wa da l-seef al-yaktul. Aywa, da l-seef al-yaktul katiir wa yaktul al-naas fi kulla bakaan.
[15] Fi chaan al-seef da, guluubhum yingatʼu wa rijleehum yittartaʼo. Fi kulla biibaanhum, ana khatteet al-seef al-yakhrib. Wa hu yiraari misil al-barraaga wa majli le l-harib.
[16] Ya l-seef al-tariin, adrub ale l-zeene wa adrub ale l-isra wa fi ayyi bakaan al-tiwajjih.
[17] Ana kula nadrub iideeni wa nakhdab aakhir khadab wa da, ana Allah bas gultah.”›»
[18] Wa Allah hajja leyi wa gaal :
[19] «Asmaʼ, ya ibn Adam, arsim duruub itneen le seef malik Baabil wakit yamrug min baladah. Wa fi ayyi derib, khutt alaama al-tiwassif al-hille al-yamchi leeha al-derib.
[20] Wa l-derib al-waahid yiwaddi al-seef le Rabba madiinat Bani Ammuun. Wa l-derib al-aakhar yiwaddiih le Madiinat al-Khudus hi al-madiina al-gawiiye fi balad Yahuuza.
[21] Achaan malik Baabil gaaʼid fi machbak al-duruub al-itneen dool le yichawwif. Wa yihizz al-nachaachiib wa yasʼal al-asnaam wa yakchif al-kibde.
[22] Wa fi iidah al-zeene, fi uud al-yiwassif kadar amʼiyeedaat wagaʼat fi Madiinat al-Khudus. Wa fi chaan da, yijiibu murdaas kabiir wa yikooruku le l-katil wa yarfaʼo hissuhum le l-harba. Wa yuduggu biibaan al-madiina be l-murdaas al-kabiir da wa yilimmu turaab wa yabnu radmiiye.
[23] Sukkaan Madiinat al-Khudus yahsubu kadar amʼiyeedaat di khachch achaan halafo leehum be l-amaan. Wa laakin malik Baabil yizakkirhum khataahum wa yaji yakrubhum.»
[24] Wa fi chaan da, daahu Allah al-Rabb gaal : «Intu zakkartuuni khataaku. Wakit isyaanku anchaaf, intu wassaftu zunuubku wa kulla amalku. Wa fi chaan da, yakurbuuku be gu.
[25] Ya inta malik Bani Israaʼiil ! Ya inta kattaal al-dimam wa kaafir ! Yoomak garrab wa wakit ikhaabak ja.
[26] Daahu Allah al-Rabb gaal : ‹Khalli yamurgu minnah al-kadmuul wa yisillu minnah al-taaj. Kulla cheyy yikhayyir, al-miskiin yarfaʼooh wa l-gawi yinazzuluuh.
[27] Kharaab, kharaab ! Nisawwi kharaab al-abadan ma bigi mislah ! Wa da, lahaddi yaji siid al-chariiʼa al-ana nantiiha leyah.›
[28] «Wa inta ya ibn Adam, atnabbaʼ wa guul : ‹Daahu Allah al-Rabb hajja kalaam yukhuss Bani Ammuun wa eebhum. Hu gaal : “Al-seef ! Al-seef ! Hu masluul le l-dabih wa majli le l-harib wa yiraari misil al-barraaga.
[29] Wa wakit gaaʼidiin yichiifu leeku ruʼya saakit wa yichawwufu leeku be kidib, al-seef yagtaʼ rigaab al-fasliin humman al-yoomhum garrab wa wakit ikhaabhum ja.
[30] Gabbulu al-seef fi beetah ! Ana niʼaakhibku fi l-bakaan al-khalagooku foogah, fi l-balad al-foogha gaʼarku.
[31] Wa ninazzil khadabi foogku wa nanfukh foogku naar khadabi wa nisallimku fi iid al-naas al-haarriin al-yaʼarfu yisawwu al-kharaab.
[32] Wa intu tabgo hagg al-naar wa dammuku yidaffig fi ust al-balad wa battaan ma yizzakkarooku.”› Wa da, ana Allah bas gultah.»