[1] Wa fi awwal chahar fi sanit 11 min waddoona fi l-khurba, Allah hajja leyi wa gaal :
[2] «Ya ibn Adam, sukkaan madiinat Suur achchammato wa gaalo le Madiinat al-Khudus : ‹Biibaan al-madiina al-yadkhulu beehum al-chuʼuub kassaroohum ! Wa tujjaarha yiwajjuhu aleena. Aywa, nabgo khaniyiin achaan Madiinat al-Khudus khirbat khalaas.›»
[3] Wa fi chaan da, daahu Allah al-Rabb gaal : «Ya madiinat Suur ! Daahu ana nugumm diddiki wa nigawwim diddiki umam katiiriin misil al-bahar wakit yigawwim moojah.
[4] Wa humman yikassuru daraadir Suur wa yihaddumu buyuutha al-tuwaal hana l-muraakhaba. Wa ana nuguchch ajaaj damaarha wa nikhalliiha misil hajar amlas.
[5] Suur tifaddil fi ust al-bahar malsa misil bakaan al-yuchurru foogah al-churukka. Wa da, ana bas gultah. Wa da kalaam Allah al-Rabb. Hi tabga khaniime le l-umam.
[6] Wa l-hillaal al-taabʼiin leeha al-gaaʼidiin barra min al-bahar yaktulu sukkaanhum be l-seef. Wa be da, yaʼarfu kadar ana bas Allah.»
[7] Wa fi chaan da, daahu Allah al-Rabb gaal : «Ya madiinat Suur ! Min al-munchaakh, nigawwim diddiki Nabuukhadnasar malik Baabil hu malik al-muluuk. Yaji be kheel wa arabaat harib wa siyaad kheel wa deech kabiir wa askarah ma yinhasbu.
[8] Hu yaktul be l-seef sukkaan hillaal al-barra min al-bahar al-taabʼiin leeki. Wa baʼad da, yihawwuguuki be khanaadig wa radmiiye wa deech kabiir be daraghum.
[9] Wa be murdaas kabiir, yikassuru daraadirki wa be silaahhum, yihaddumu buyuutki al-tuwaal hana l-muraakhaba.
[10] Wa min katarat al-kheel, al-ajaaj yikhattiiki wa min harakat siyaad al-kheel wa rijle al-arabaat, daraadirki yinhazzo. Wa yadkhulu biibaanki misil yadkhulu fi madiina al-sawwo leeha khurma.
[11] Humman yifajjukhu kulla chawaariʼki be dalaafe kheelhum wa yaktulu chaʼabki be l-seef. Wa l-amad al-yiwassufu gudritki, yarmuuhum fi l-turaab.
[12] Wa yaksabo khunaaki wa yanhabo budaaʼitki. Wa yikassuru daraadirki wa yihaddumu buyuutki al-samhiin. Wa baʼad da, yichiilu hujaarki wa hatabki wa turaabki wa yusubbuuhum fi lubb al-bahar.
[13] Wa ana niwaggif harakat khineeki wa hiss jigindiiyaatki kula ma yinsamiʼ battaan.
[14] Wa nisawwiiki hajar amlas wa tabge bakaan al-yuchurru foogah al-churukka. Wa inti battaan ma tinbani achaan da, ana Allah bas gultah.» Wa da kalaam Allah al-Rabb.
[15] Wa daahu Allah al-Rabb gaal le madiinat Suur : «Wakit simʼo harakat wagaʼaanki wa ganitiin al-majruuhiin wa min al-katil fi lubbiki, sukkaan al-jazaayir yarjufu.
[16] Kulla muluuk hana khachum al-bahar yanzulu min karaasiihum wa yisillu lubaashum hana l-muluuk wa khulgaanhum al-mukallafiin. Al-khoof yakrubhum wa yagoodu fi l-turaab wa yarjufu fi kulla wakit wa yinbahtu be sababki.
[17] Wa yunuuhu fi chaanki wa yuguulu : ‹Ya l-salaam ! Al-madiina addammarat hi al-sukkaanha jo min khachum al-bahar aywa, hi al-chakarooha. Hi madiina aziime fi khachum al-bahar, wa sukkaanha kula aziimiin wa khawwafo kulla l-naas al-hawaaleehum.
[18] Wa hassaʼ, sukkaan al-jazaayir yibarjulu fi yoom wagaʼaanha. Aywa, sukkaan al-jazaayir yinbahtu achaan hi waddarat.›»
[19] Wa daahu Allah al-Rabb gaal : «Nisawwiiki madiina kharaab misil al-mudun al-ma induhum sukkaan. Wa nigawwim diddiki al-bahar al-khariig wa almi katiir yaakulki.
[20] Wa ninazzilki fi l-haawiye maʼa l-naas al-nazalo fi l-khubuur min zamaan. Wa nisakkinki hinaak tihit al-ard wa tabge kharaab ila l-abad fi l-haawiye wa battaan ma yaskunuuki. Wa nanti jamaalki le ard al-hayyiin.
[21] Wa nisawwiiki masal mukhiif achaan damaarki. Wa l-yifattuchuuki abadan ma yalgooki.» Wa da kalaam Allah al-Rabb.