[1] Fi l-yoom al-awwal hana chahri 12 fi sanit 12 min waddoona fi l-khurba, Allah hajja leyi wa gaal :
[2] «Ya ibn Adam, khanni nuwaah al-hizin le Firʼoon malik Masir wa guul leyah : ‹Inta chabbaht duud fi ust al-umam wa inta misil tumsaah fi l-bahar. Wa inta gammeet fi lubb al-bahar // be chidde wa tiharrik al-almi be rijileenak wa tiwassikh al-bahar.›»
[3] Daahu Allah al-Rabb gaal : «Nukujj leek charaki fi wakit chuʼuub katiiriin yilimmu wa humman yarmuuk // fi amkajjaamti.
[4] Ana narmiik fi l-ard wa nazgulak fi l-kadaade. Ninazzil foogak kulla tuyuur al-sama wa haywaanaat al-kadaade yaakulu // wa yachbaʼo minnak.
[5] Ana nukhutt laham jildak fi ruuse al-jibaal wa namla al-wudyaan be l-faddal min rimmitak.
[6] Nazgi al-ard be dammak al-yidaffig minnak wa l-jibaal wa l-rujuul yinmalu.
[7] Wa wakit nuurak yumuut, ana nikhatti al-sama wa nidallim al-nujuum. Nikhatti al-harraay be sahaab wa l-gamar ma yidawwi battaan.
[8] Be sababak inta, nidallim kulla anwaar al-sama wa nijiib al-dalaam fi baladak.» Wa da kalaam Allah al-Rabb.
[9] «Wakit nikhabbir al-umam be damaarak, chuʼuub katiiriin yibarjulu lahaddi fi buldaan al-awwal inta ma taʼarifhum.
[10] Wa be sababak inta, chuʼuub katiiriin yabgo haznaaniin wa muluukhum yarjufu min al-khoof wakit nisill seefi giddaamhum. Fi yoom inta wagaʼt, yarjufu kulla wakit wa ayyi waahid minhum yakhaaf le nafsah.»
[11] Wa fi chaan da, daahu Allah al-Rabb gaal : «Seef malik Baabil yajiik.
[12] Nijiib suyuuf al-fahaliin al-humman mujrimiin min al-umam wa yaktulu kulla askarak. Aywa, humman yiwadduru istikbaar Masir wa kulla askarha yiddammaro.
[13] Wa ana nidammir kulla bahaayimha min jamb al-almi al-katiir. Wa la rijil insaan wa la duluf bahiime ma yibarjil al-almi battaan.
[14] Khalaas almi Masir yukuun haadi wa rujuulha yajru misil al-dihin. Wa da kalaam Allah al-Rabb.
[15] Wakit nakhrib balad Masir wa nuguchch kulla cheyy // al-fi lubbaha wa nidammir kulla l-naas al-saakniin foogha, khalaas yaʼarfu kadar ana bas Allah.
[16] «Da nuwaah al-hizin al-yikhannuuh. Khalli banaat al-umam yikhannan beyah. Hinna yikhannan al-nuwaah da le Masir wa le kulla askarha.» Wa da kalaam Allah al-Rabb.
[17] Wa fi yoom 15 hana chahri 12 fi sanit 12 min waddoona fi l-khurba, Allah hajja leyi wa gaal :
[18] «Ya ibn Adam, khanni nuwaah al-hizin le chaʼab Masir, leehum humman wa umam aakhariin aziimiin. Khalli nuwaahak yinazzilhum tihit al-ard maʼa l-nazalo fi l-khubuur.
[19] Wa guul leehum : ‹Ya askar Masir, intu samhiin ziyaada min yaatu ? Anzulu fi l-khubuur wa arugdu maʼa l-ma mutahhariin.›
[20] «Aywa, al-Masriyiin yumuutu fi l-harib. Wa hassaʼ, al-seef jaahiz le l-katil. Khalli yigaddumu leyah Masir wa chaʼabha !
[21] Wa fi bakaan al-maytiin, kubaaraat al-furraas wa muʼaawiniinhum yihajju leehum wa yuguulu : ‹Hassaʼ, al-ma mutahhariin al-maato fi l-harib nazalo wa ragado fi l-khubuur !›
[22] «Malik Achuur gaaʼid fi l-bakaan da maʼa kulla askarah. Wa hu muhawwag be khubuur askarah al-maato fi l-harib
[23] wa khubuurhum gaaʼidiin tihit fi aakhir al-ard. Wa daahu askarah wa khubuurhum muhawwigiinah. Kulluhum maato fi l-harib, humman al-awwal jaabo al-ruʼub fi ard al-hayyiin.
[24] «Wa malik Ilaam gaaʼid fi l-bakaan da maʼa kulla askarah. Wa hu muhawwag be khubuur askarah al-maato fi l-harib. Humman al-ma mutahhariin al-awwal jaabo al-ruʼub fi ard al-hayyiin. Wa hassaʼ be ihaana, nazalo tihit al-ard maʼa kulla l-nazalo fi l-khubuur.
[25] Aywa, malik Ilaam ragad fi usut askarah al-maato fi l-harib wa hu muhawwag be khubuurhum. Wa kulla l-ma mutahhariin dool maato fi l-harib, humman al-awwal jaabo al-ruʼub fi ard al-hayyiin. Wa hassaʼ, aabo maʼa kulla l-nazalo fi l-khubuur. Chaalo bakaanhum ambeen al-maato fi l-harib.
[26] «Wa malik Maachak wa malik Tuubal gaaʼidiin fi l-bakaan da maʼa kulla askarhum. Wa humman muhawwagiin be khubuur askarhum. Wa kulla l-ma mutahhariin dool maato fi l-harib, humman al-awwal jaabo al-ruʼub fi ard al-hayyiin.
[27] Ma ragado maʼa l-furraas al-fahaliin al-maato zamaan, humman al-awwal jaabo al-ruʼub fi ard al-hayyiin. Wa humman dool nazalo fi bakaan al-maytiin be silaahhum hana l-harib. Khatto suyuufhum tihit ruuseehum wa daraghum min foog leehum.
[28] Wa inta kula, ya Firʼoon, tumuut maʼa l-ma mutahhariin wa targud maʼa l-maato fi l-harib.
[29] «Wa l-Adoomiyiin wa muluukhum wa kulla chuyuukhhum gaaʼidiin fi l-bakaan da. Be fahaaliiyithum kula, khattoohum maʼa l-aakhariin al-maato fi l-harib. Yarugdu maʼa l-ma mutahhariin wa maʼa l-nazalo fi l-khubuur.
[30] «Wa kulla kubaaraat al-munchaakh gaaʼidiin fi l-bakaan da maʼa kulla naas balad Seeda al-nazalo maʼa l-maytiin. Humman induhum eeb achaan jaabo al-ruʼub be faraasiiyithum. Wa hassaʼ, al-ma mutahhariin dool yarugdu maʼa l-maato fi l-harib wa chaayliin eebhum maʼa l-nazalo fi l-khubuur.
[31] «Wakit Firʼoon yichiif al-maytiin dool, yisabbir nafsah be moot askarah al-katiiriin. Aywa Firʼoon wa kulla askarah maato fi l-harib. Wa da kalaam Allah al-Rabb.
[32] Aywa, ana bas khalleetah yijiib al-ruʼub fi ard al-hayyiin wa laakin hassaʼ, Firʼoon wa kulla askarah yarugdu fi ust al-ma mutahhariin al-maato fi l-harib.» Wa da kalaam Allah al-Rabb.