[1] Wa Allah hajja leyi wa gaal :
[2] «Ya ibn Adam, hajji hijjeeye wa adrub masal le Bani Israaʼiil.
[3] Wa guul leehum : ‹Daahu Allah al-Rabb gaal : “Fiyah sagur waahid kabiir al-janaaheeh kubaar wa riichah tuwaal wa suufah katiir wa mulawwan. Wa l-sagur da, macha jibaal Lubnaan wa chaal raas chadarat al-arz.
[4] Aywa, hu gataʼ firiʼ wa waddaah fi balad Kanʼaan wa khattaah fi madiinat al-tujjaar.
[5] Wa chaal habba waahide // min al-balad kula wa teerabha fi zereʼ le tugumm misil chadarat gana jamb almi al-katiir.
[6] Wa l-habba di gammat wa bigat chadarat inab // al-gaaʼide tasrah. Wa furuuʼha maddathum le l-sagur da wa uruugha gaaʼidiin tihtah. Wa hi bigat chadarat inab wa sawwat furuuʼ wa gawwamat warag.
[7] «‹“Wa laakin fiyah sagur aakhar kabiir al-janaaheeh kubaar wa riichah katiir. Wa daahu chadarat al-inab di wajjahat uruugha ale l-sagur al-aakhar da wa maddat furuuʼha aleyah. Hi dawwarat hu yazgiiha barra min al-bakaan al-magganooha foogah.
[8] Wa da bakaan adiil wa jamb almi katiir. Magganooha le tisawwi furuuʼ wa talda fawaakih wa tabga chadarat inab aziime.”›»
[9] «Wa guul leehum : ‹Daahu Allah al-Rabb gaal : “Hal chadarat al-inab di tanjah walla ? La ! Al-sagur al-awwalaani yamlutha be uruugha wa fawaakihha kula yagtaʼhum. Wa hi tamrad wa taybas wa kulla bizritha tumuut. Wa da ma be iid gawiiye wa la be deech kabiir kadar yamultuuha be uruugha.
[10] Wa kan magganooha battaan, hal hi tanjah walla ? Wa kan riih al-sabaah tihijjaha, hi taybas marra waahid, aywa, taybas fi l-bakaan al-magganooha foogah.”›»
[11] Wa Allah hajja leyi wa gaal :
[12] «Guul le l-chaʼab al-aasiyiin dool : ‹Ma iriftu maʼana al-masal da walla ? Daahu al-tafsiir. Malik Baabil ja fi Madiinat al-Khudus wa karab malikha wa kubaaraatha wa waddaahum maʼaayah fi Baabil.
[13] Wa darraj waahid min zurriiyit al-muluuk fi mamlakat Yahuuza wa sawwa maʼaayah muʼaahada wa hallafah. Wa chaal kubaaraat al-balad wa waddaahum fi l-khurba
[14] achaan al-mamlaka tagood sakhayre wa ma tagdar tittawwar wa tahfad muʼaahadatah le tasbit.
[15] «‹Wa laakin al-malik da atmarrad didd malik Baabil. Hu rassal naasah le Masir achaan yantuuh kheel wa askar katiiriin. Hal malik misil da yanjah walla ? Hal naadum al-sawwa muʼaamara misil di yanja walla ? Hal hu al-nagad al-alaakha di yanja walla ?
[16] Nahlif be usmi al-Hayy, akiid al-malik da yumuut fi Baabil balad al-malik al-darrajah achaan hu gataʼ haliiftah wa nagad alaakhtah. Wa da kalaam Allah al-Rabb.
[17] Wa kan malik Masir yantiih deech kabiir wa askar katiiriin kula, da ma yisaaʼidah fi l-harib wakit askar Baabil yilimmu turaab wa yabnu radmiiye le l-hisaar le yaktulu naas katiiriin.
[18] Al-malik da gataʼ haliiftah wa nagad muʼaahadatah al-hu mada foogha wa sawwa kulla l-cheyy da. Wa be da, hu ma yanja.›»
[19] Wa fi chaan da, daahu Allah al-Rabb gaal : «Nahlif be usmi al-Hayy ! Al-haliife al-hu sawwaaha giddaami, hu gataʼha wa muʼaahadati kula, hu nagadha. Wa ana niʼaakhibah be sabab fiʼilah.
[20] Wa ana nukujj leyah charaki wa nakurbah. Wa niwaddiih Baabil wa hinaak nihaakimah fi chaan al-khiyaana al-hu sawwaaha diddi.
[21] Wa l-muʼarridiin min kulla askarah yumuutu be l-seef wa l-faddalo yichittu fi l-riih. Wa be da, intu taʼarfu kadar da, ana Allah bas gultah.»
[22] Daahu Allah al-Rabb gaal : «Ana zaati nichiil firiʼ min raas chadarat al-arz al-tawiile wa nimagginah. Min furuuʼah foog, nagtaʼ firiʼ latiif wa ana zaati nimagginah fi jabal tawiil wa aali.
[23] Nimagginah fi jabal aali fi balad Israaʼiil wa hu yisawwi furuuʼ wa yalda fawaakih wa yabga chadarat arz aziime. Wa ayyi nafar hana tuyuur yaskunu foogha wa yaskunu fi dull furuuʼha.
[24] Wa be da, kulla chadar al-kadaade yaʼarif kadar ana Allah. Nisakhkhir al-chadara al-aaliye wa niʼalli al-chadara al-sakhayre. Niyabbis al-chadara al-khadra wa nikhaddir al-chadara al-yaabse. Wa da, ana Allah bas gultah wa nihaggigah.»