[1] Wa Allah hajja leyi wa gaal :
[2] «Ya ibn Adam, inta gaaʼid fi usut chaʼab aasiyiin ! Humman induhum uyuun le l-choof wa laakin ma yichiifu wa induhum udne le l-samaʼ wa laakin ma yasmaʼo achaan humman chaʼab aasiyiin.
[3] Asmaʼ, ya ibn Adam, jahhiz khumaamak wa massil nafsak misil yiwadduuk fi l-khurba wa tabga khariib. Wa sawwi al-masal da be l-nahaar giddaamhum. Wakit gaaʼidiin yichiifuuk, gumm min beetak wa massil nafsak misil khariib fi bakaan aakhar. Wa misil da, mumkin yaʼarfu kadar humman chaʼab aasiyiin.
[4] Amrug khumaamak min beetak wa da misil khumaam al-yiwaddu beyah fi l-khurba. Wa sawwi al-masal da be l-nahaar giddaamhum. Wakit gaaʼidiin yichiifuuk, amrug be makhrib misil tamchi fi l-khurba.
[5] Wa giddaamhum bas, gidd durdur beetak wa amrug khumaamak be l-khurma di.
[6] Wa giddaamhum bas, chiilah fi kitfak wa amrug fi l-dalaam. Wa khatti wijhak le ma tichiif al-balad achaan ana nidoor nisawwiik masal le Bani Israaʼiil.»
[7] Wa khalaas, ana sawweet misil Allah amaraani. Be nahaar, maragt khumaami min beeti wa da misil khumaami al-yiwadduuni beyah fi l-khurba. Wa be makhrib, gaddeet al-durdur be iidi wa maragt khumaami fi l-dalaam wa chiltah fi kitfi. Wa ana sawweet kulla l-masal da giddaamhum.
[8] Wa be fajur, Allah hajja leyi wa gaal :
[9] «Ya ibn Adam, Bani Israaʼiil al-chaʼab al-aasiyiin gaalo leek : ‹Inta gaaʼid tisawwi chunu ?›
[10] Khalaas, guul leehum : ‹Daahu Allah al-Rabb gaal : “Al-muhaakama di jaaye min Allah didd malik Madiinat al-Khudus wa le kulla Bani Israaʼiil al-gaaʼidiin foogha.”›
[11] Wa guul leehum kadar inta bigiit leehum masal wa misil inta massaltah wa sawweetah, yisawwuuh fooghum wa yakurbuuhum wa yiwadduuhum fi l-khurba.
[12] «Al-malik hana Madiinat al-Khudus yichiil khumaamah fi kitfah wa yamrug fi l-dalaam be l-khurma al-yigidduuha fi l-durdur. Wa hu yikhatti wijhah le ma yichiif al-balad.
[13] Wa ana nukujj leyah charaki wa hu yagaʼ foogah wa nakurbah wa niwaddiih fi balad al-Baabiliyiin wa laakin hu ma yichiifha. Wa yumuut foogha.
[14] Wa kulla naasah al-muhawwigiinah wa l-yiʼaawunuuh wa kulla askarah, nichattithum fi kulli jiihe wa natrudhum be l-seef.
[15] Wakit nichattithum been al-umam wa nifarrighum fi ust al-buldaan, khalaas humman yaʼarfu kadar ana bas Allah.
[16] Wa nifaddil waahidiin minhum al-yanjo min al-harib wa l-juuʼ wa l-waba achaan yihajju be kulla muharramaathum le l-umam al-yamchu ambeenaathum. Wa be da, khalaas yaʼarfu kadar ana bas Allah.»
[17] Wa Allah hajja leyi wa gaal :
[18] «Ya ibn Adam, taakul maʼaachak be rajifiin wa tachrab almiik be barjala wa hamm.
[19] Wa tuguul le chaʼab al-balad : ‹Daahu Allah al-Rabb hajja le sukkaan Madiinat al-Khudus al-gaaʼidiin fi balad Israaʼiil wa gaal : “Humman yaakulu maʼaachhum be hamm wa yacharbo almiihum be khoof achaan al-ard takhrab wa tabga faadiye min kulla cheyy al-foogha be sabab al-unuf hana kulla sukkaanha.
[20] Wa l-mudun al-maskuuniin yakhrabo wa l-balad kula tabga kharaab. Wa be da, intu taʼarfu kadar ana bas Allah.”›»
[21] Wa Allah hajja leyi wa gaal :
[22] «Ya ibn Adam, maala tihajju be l-masal da al-bukhuss balad Israaʼiil ? Al-masal buguul : ‹Al-ayyaam yutuulu wa ruʼya waahide kula ma tilhaggag.›
[23] Wa fi chaan da, guul leehum : ‹Daahu Allah al-Rabb gaal : “Ana namnaʼ al-masal da wa battaan ma yihajju beyah fi Israaʼiil.” Wa laakin antiihum masal jadiid al-buguul : “Al-ayyaam yaju ajala wa ayyi ruʼya tilhaggag.
[24] Achaan ma fi battaan ruʼya kidib walla chawwafaan khachch fi lubb Bani Israaʼiil.
[25] Wa ana Allah kan gult chunu kula, yilhaggag bala taʼkhiir. Wa fi wakitku intu, ya l-chaʼab al-aasiyiin, ana nihaggig kalaami al-ana gultah.”›» Wa da kalaam Allah al-Rabb.
[26] Wa Allah hajja leyi wa gaal :
[27] «Ya ibn Adam, daahu Bani Israaʼiil yuguulu : ‹Al-ruʼya al-chaafha al-raajil da ma hana ayyaam gariibiin. Hu yitnabbaʼ le wakit baʼiid.›
[28] Wa fi chaan da, guul leehum : ‹Daahu Allah al-Rabb gaal : “Ma fi kilme waahide kula min kalaami tiʼakhkhir. Kulla kalaami al-gultah yilhaggag.”›» Wa da kalaam Allah al-Rabb.