[1] Wa fi yoom 12 hana l-chahar al-aachir fi l-sana al-aachir min waddoona fi l-khurba, Allah hajja leyi wa gaal :
[2] «Ya ibn Adam, wajjih ale Firʼoon malik Masir wa atnabbaʼ diddah wa didd kulla l-Masriyiin.
[3] Wa guul leehum : Daahu Allah al-Rabb gaal : ‹Akiid ana nugumm diddak, ya Firʼoon malik Masir, inta al-misil tumsaah kabiir al-raagid fi ust al-Niil. Wa inta gult : “Al-Niil da hanaayi wa ana bas khalagtah !”
[4] Wa laakin ana nidiss leek jambaat // fi khachmak wa narbut kulla huut Niilak fi girfak. Wa namurgak min usut Niilak maʼa kulla huut Niilak al-marbuut // fi girfak.
[5] Wa nikhalliik fi l-sahara maʼa kulla huut Niilak. Tagaʼ fi l-kadaade wa la tinjaab wa la tinlamma. Tabga akil le haywaanaat al-kadaade wa tuyuur al-sama.
[6] Wa be da, kulla sukkaan Masir yaʼarfu kadar ana bas Allah. «‹Ya balad Masir, inti bigiiti misil ageegaay daʼiife al-yirrakkazo foogha Bani Israaʼiil.
[7] Wa wakit chaalooki fi iideehum, inti alkassarti // wa jarahti kataafeehum. Wa wakit yirrakkazo foogki inti al-mukassara, inti kassarti kulla salabaahum.›»
[8] Wa fi chaan da, daahu Allah al-Rabb gaal : «Akiid ana nigawwim harib didd balad Masir wa naktul al-naas wa l-bahaayim.
[9] Wa Masir takhrab wa tabga koom hana turaab. Wa be da, yaʼarfu kadar ana bas Allah. «Inta gult : ‹Al-Niil da hanaayi wa ana bas khalagtah.›
[10] Wa be sabab da, akiid ana nugumm diddak wa didd Niilak wa nisawwi balad Masir koom hana turaab wa kharaab min Migduul lahaddi Aswaan wa lahaddi huduud al-Habacha.
[11] Wa le muddit 40 sana, wa la rijil insaan wa la rijil bahiime ma tuchugg al-bakaan da.
[12] Wa balad Masir takhrab ziyaada min kharaab al-buldaan al-aakhariin. Wa le muddit 40 sana, mudunha yagoodu kharaab ziyaada min kharaab al-mudun al-aakhariin. Wa ana nichattit al-Masriyiin been al-umam wa nifarrighum fi ust al-buldaan.»
[13] Wa daahu Allah al-Rabb gaal : «Baʼad 40 sana, ana nilimm al-Masriyiin min been al-chuʼuub al-humman muchattatiin fi lubbuhum.
[14] Wa nigabbil al-Masriyiin min balad al-khurba wa nijiibhum fi ard juduudhum fi junuub Masir wa humman yikawwunu mamlaka daʼiife.
[15] Wa l-mamlaka di tabga daʼiife min kulla l-mamaalik wa battaan ma tagdar tisawwi nafisha aaliye fi l-umam. Wa nisawwi naasha chiyya lahaddi ma yagdaro yamulku fi l-umam.
[16] Wa battaan Bani Israaʼiil ma yitwakkalo ale l-Masriyiin. Balad Masir tagood achaan Bani Israaʼiil yizzakkaro khataahum al-sawwooh wakit wajjaho aleeha. Wa yaʼarfu kadar ana bas Allah al-Rabb.»
[17] Wa fi l-yoom al-awwal hana l-chahar al-awwal fi sanit 27 min waddoona fi l-khurba, Allah hajja leyi wa gaal :
[18] «Ya ibn Adam, Nabuukhadnasar malik Baabil kallaf askarah be khidme tagiile didd madiinat Suur lahaddi ruuseehum sallaʼo wa kataafeehum anjaraho. Wa laakin ma ligo faayde al-takfi le l-malik wa la le askarah be kulla l-khidme al-sawwooha didd madiinat Suur.»
[19] Wa fi chaan da, daahu Allah al-Rabb gaal : «Daahu ana nanti balad Masir le Nabuukhadnasar malik Baabil. Wa yichiil khunaaha wa yisawwiiha kasiibe wa yanhabha nahib chadiid. Wa Masir tabga faayde le askarah.
[20] Wa ana nantiih balad Masir misil mukaafa achaan hu wa askarah khadamo leyi. Wa da kalaam Allah al-Rabb.
[21] Wa fi l-yoom da, ana niziid khuwwat Bani Israaʼiil. Wa leek inta, ya ibn Adam, nantiik fursa le tihajji fi usuthum. Wa be da, humman yaʼarfu kadar ana bas Allah.»