[1] Wa Allah hajja leyi wa gaal :
[2] «Ya ibn Adam, guul le malik Suur : Daahu Allah al-Rabb gaal : ‹Inta astakbart wa gult : “Ana ilaah ! Wa ana gaaʼid fi kursi al-ilaahaat fi ust al-bahar !” Laakin inta insaan bas, ma ilaah wa sawweet nafsak misil ilaah.
[3] Tahsib nafsak hakiim ziyaada // min Danyaal wa ma fi sirr al-mulabbad leek.
[4] Wa be hikmatak wa fihimak, inta bigiit khani wa maleet makhaaznak be dahab wa fudda.
[5] Wa be khibirtak al-kabiire fi l-tijaara, inta zidt khunaak. Wa be sabab khunaak, inta astakbart.›»
[6] Wa fi chaan da, daahu Allah al-Rabb gaal : «Achaan inta sawweet nafsak misil ilaah,
[7] ana nigawwim diddak ajaanib mujrimiin min al-umam. Wa yisillu suyuufhum didd hikmatak al-aziime wa ma yihtarumu darajatak.
[8] Humman yidissuuk fi l-khabur wa tumuut maktuul fi ust al-bahar.
[9] Hal giddaam al-yaktuluuk, tagdar tilfachchar wa tuguul : ‹Ana ilaah› walla ? Laakin inta insaan bas, ma ilaah wa gaaʼid tihit iide al-yaktuluuk.
[10] Wa be iid al-ajaanib, tumuut moot hana eeb misil al-naas al-ma mutahhariin. Wa da, ana bas gultah.» Wa da kalaam Allah al-Rabb.
[11] Wa Allah hajja leyi wa gaal :
[12] «Ya ibn Adam, khanni nuwaah al-hizin le malik Suur ! Wa guul : ‹Daahu Allah al-Rabb gaal : “Zamaan, inta masal kaamil achaan inta malaan be l-hikma wa jamaalak kaamil.
[13] Wa inta gaaʼid fi Adin jineenit Allah. Wa lubaasak mujammal be kulla nafar hana l-hujaar al-khaaliyiin misil al-agiig al-ahmar wa l-yaakhuut al-asfar wa l-maass wa l-zabarjad wa l-agiig al-abyad wa l-kharaz wa l-yaakhuut al-akhdar wa l-marajaan wa l-zumurrud. Wa be dahab, daggo leek khawaatim wa suwaar al-jahhazoohum min yoom khalagook.
[14] Wa inta makhluug samaawi chadiid wa khatteetak haaris fi jabali al-mukhaddas hanaayi ana al-Rabb wa turuukh been al-hujaar al-fi ust al-naar.
[15] «‹“Wa inta maachi tamaam fi derbak min yoom khalagook lahaddi yoom ligo foogak al-fasaala.
[16] Wa be sabab katarat budaaʼtak, anmaleet be l-unuf wa aznabt. Fi chaan da, ma jaʼaltak mukhassas wa baʼʼadtak min jabali ana al-Rabb. Ya inta al-makhluug al-samaawi al-haaris, ana taradtak min been al-hujaar al-fi ust al-naar.
[17] Achaan inta astakbart be sabab jamaalak wa be sabab darajatak, tallaft hikmatak. Ana rameetak fi l-turaab wa khalleet al-muluuk yilfarrajo foogak.
[18] Wa be katarat khataak wa zulmak fi tijaartak, inta ma ahtaramt al-bakaanaat al-mukhaddasiin. Wa ana maragt min ustak // naar al-taakulak wa sawweetak rumaad fi l-ard giddaam kulla l-yichiifuuk.
[19] Wa kulla l-chuʼuub al-yaʼarfuuk yinbahtu fi chaanak. Inta bigiit masal mukhiif wa waddart ila l-abad.”›»
[20] Wa Allah hajja leyi wa gaal :
[21] «Ya ibn Adam, wajjih ale madiinat Seeda wa atnabbaʼ diddaha.
[22] Wa guul : ‹Daahu Allah al-Rabb gaal : “Akiid ana gammeet diddiki, ya madiinat Seeda ! Yimajjuduuni fi usutki. Wakit niʼaakhibki, niwassif khadaasti le l-naas al-fi lubbiki wa yaʼarfu kadar ana bas Allah.
[23] Ana ninazzil waba foogki wa l-damm yidaffig fi chawaariʼki wa l-naas yumuutu fi lubbiki be sabab al-harib al-yaji leeki min kulli jiihe. Wa be da, yaʼarfu kadar ana bas Allah.”›
[24] «Wa battaan ma fi chook wa la andireesa al-yatʼano Bani Israaʼiil min kulla l-naas al-yahguruuhum al-gaaʼidiin hawaaleehum. Wa yaʼarfu kadar ana bas Allah al-Rabb.
[25] Wa daahu Allah al-Rabb gaal : ‹Wakit nilimm Bani Israaʼiil min ust al-chuʼuub al-humman muchattatiin fi lubbuhum, beehum ana niwassif khadaasti giddaam al-umam. Wa Bani Israaʼiil yaskunu battaan fi arduhum al-ana anteetha le jidduhum Yaakhuub.
[26] Wa humman yaskunu be amaan wa yabnu buyuut wa yimaggunu jineenaat al-inab. Wa yaskunu be amaan wakit ninazzil ikhaabi didd kulla l-naas al-hagaroohum wa gaaʼidiin hawaaleehum. Wa be da, yaʼarfu kadar ana bas Allah Ilaahhum.›»