[1] Allah gaal leyi nikhanni nuwaah al-hizin le muluuk Bani Israaʼiil.
[2] Wa nuguul : «Ammak ma duudaay walla ? Hi raagde fi ust al-diidaan. Wa fi lubb furuukh al-diidaan, hi tirabbi iyaalha.
[3] Hi rabbat waahid min iyaalha wa hu kibir wa bigi malik al-diidaan. Wa hu allam kikkeef yicharrit seedtah wa yaakul al-naas.
[4] Wa l-umam simʼo beyah wa ramooh fi nugrithum. Aywa, karabooh wa waddooh be zumaam // fi balad Masir.
[5] «Wakit al-duudaay chaafatah, achamha angataʼ. Wa hi chaalat aakhar min iyaalha wa sawwatah malik al-diidaan.
[6] Wa hu macha fi ust al-diidaan wa bigi malikhum. Wa allam kikkeef yicharrit seedtah wa akal al-naas.
[7] Hu dammar gusuurhum al-gawiyiin wa kharab mudunhum. Wa l-balad gaʼadat kharaab // min sukkaanha be sabab hiss gargaraanah.
[8] Wa l-umam al-hawaaleeyah jo min wulaayaathum. Wa gammo diddah wa kajjo leyah charak wa hu wagaʼ fi nugrithum wa karabooh.
[9] Wa be zumaam, khattooh fi lubb gafas wa waddooh le malik Baabil. Wa dassooh fi lubb sijin achaan hissah battaan ma yinsamiʼ fi jibaal Bani Israaʼiil.»
[10] «Ammak misil chadarat al-inab al-magganooha fi khachum al-almi. Hi wildat fawaakih wa indaha warag achaan al-almi katiir.
[11] Wa furuuʼha induhum gudra le yabgo isay le l-muluuk. Hi kibrat wa bigat tawiile min kulla l-chadar al-aakhar. Wa tinchaaf fi chaan tuulha wa katarat waragha.
[12] Laakin hi mallatooha be khadab wa ramooha fi l-ard. Wa riih al-sabaah yabbasat fawaakihha wa humman daffago. Wa furuuʼha al-induhum gudra yibso wa l-naar akalathum.
[13] Wa hassaʼ, magganooha fi l-sahara, fi ard jafaaf wa atach.
[14] Maragat naar min dumburha wa akalat al-furuuʼ wa l-fawaakih. Wa battaan ma fi furuuʼ al-induhum gudra le yabgo isay // le l-muluuk.» Wa da khine yikhannuuh misil nuwaah al-hizin.