[1] Хӧдан Мусар'а хәбәрда у готе:
[2] «Т'әви зар'ед Исраел хәбәр дә у бежә wан: ‹Һәгәр йәк бьхwазә бь ад-qьрар кәсәки Хӧданр'а к'ьфш кә, әw гәрәке анәгори qимәте тә бе к'ьфшкьрьне .
[3] Qимәткьрьна тәйә бона меред жь бистсалийе гьрти һ'әта шестсалийе, гәрәке пенщи шекьл зив бә, анәгори шекьле пирозгәһе.
[4] Ле һәгәр әw жьн бә, qимәткьрьна тә гәрәке си шекьл бә.
[5] Һәгәр тӧ мәрьва жь пенщсалийе һ'әта бистсалийе qимәт ки, гәрәке тӧ qьсьме мер бист шекьли qимәт ки, ле qьсьме жьне дәһә шекьли.
[6] Ле жь йәкмәһе һ'әта пенщсалийе, гәрәке qьсьме мер пенщ шекьл зив qимәте ки, qьсьме жьне се шекьл зив qимәт ки.
[7] Ле һәгәр әw жь шестсалийе жортьр бьн, һьнге qьсьме мер панздәһ шекьли гәрәке һ'әсаб ки, ле qьсьме жьне дәһә шекьли.
[8] Һәгәр әw к'әсиб ә у qәwата wи нагьһижә wе qимәткьрьна тә, һьнге бьра әw ль бәр к'аһин бьсәкьнә, к'аһин wи qимәт кә. К'аһин wәкә qәwата йе ад-qьраркьри qимәте wи к'ьфш кә.
[9] Ле һәгәр әw ад-qьрара Хӧданр'а кьри жь һ'әйwен бә у qӧрбандайинер'а qәбул ә, жь ван чь кӧ Хӧданр'а бе дайине wе пироз бә.
[10] Гәрәке гӧһар'тьн т'ӧнәбә, нә qәнщ хьрабр'а, нә жи хьраб qәнщр'а бьгӧһер'ә, ле һәгәр йәк һ'әйwан һ'әйwенр'а бьгӧһер'ә, һьнге гәрәке һ'әйwане ад-qьраркьри у йе т'әв гӧһар'ти һәр дӧ жи пироз һ'әсаб бьн.
[11] Ле һәгәр әw һ'әйwане кӧ Хӧданр'а ад-qьрар кьрийә, жь һ'әйwане нәһ'әлал ә, кӧ жь wана Хӧданр'а qӧрбан найенә дайине, һьнге гәрәке wи һ'әйwани ль бәр к'аһин бьдьнә сәкьнандьне.
[12] К'аһин бьра дина хwә бьдә qәнщ у хьрабийа һ'әйwан у qимәт к'ьфш кә, к'аһин чь qимәт да сәр гәрәке һаqас бә.
[13] Ле һәгәр әw кәсе ад-qьрар кьрийә бьхwазә пашда бьк'ьр'ә, һьнге бьра п'арәкә жь пенща бькә ль сәр qимәте к'ьфшкьри.
[14] Һәгәр йәк бьхwазә мала хwә Хӧданр'а к'ьфш кә, һьнге к'аһин бьра дина хwә бьдә һ'але мале, qәнщи у хьрабийе у qимәт к'ьфш кә, к'аһин чь qимәт да сәр гәрәке һаqас бә.
[15] Ле һәгәр әw кәсе к'ьфшкьри бьхwазә мала хwә пашда бьк'ьр'ә, һьнге бьра п'арәкә жь пенщ п'ара ль сәр qимәте тәйи к'ьфшкьрида зедә кә, һьнге мале wир'а бә.
[16] Һәгәр йәк ә'рде мьлк'е хwә Хӧданр'а к'ьфш кә, һьнге гәрәке qимәткьрьна тә wәкә qимәте т'охьме ль сәр те р'әшандьне бә, бона һомерәк т'охьме щә пенщи шекьл зив бә.
[17] Һәгәр йәк ә'рде хwә сала р'аwастийеда бьдә, бьра wәкә qимәткьрьна тә бьминә.
[18] Ле һәгәр йәк ль пәй сала р'аwастийер'а ә'рде хwә бьдә, һьнге к'аһин гәрәке бавежә ль сәр wан сала, к'ижан кӧ һ'әта сала р'аwастийе манә, т'әви йе дайи һ'әсаб кә у жь qимәте тәйи к'ьфшкьри ньмьзтьр бә.
[19] У һәгәр әw бьхwазә ә'рде хwә пашда бьк'ьр'ә, һьнге бьра п'арәке жь пенща п'әрә бькә ль сәр qимәте тәйи к'ьфшкьри у әw ә'рд wир'а бьминә.
[20] Ле һәгәр әw ә'рд пашда нәк'ьр'ә, йан йәки дьнр'а фьроти бә, әwе иди нькарьбә пашда бьк'ьр'ә.
[21] Әw ә'рд кӧ сала р'аwастийе аза дьбә, мина ә'рде п'ешк'ешкьри Хӧданр'а пироз бә. Әw бьбә мьлк'е к'аһина.
[22] Ле һәгәр йәк ә'рде к'ьр'ийи нә мьлк'е хwә Хӧданр'а к'ьфш кә,
[23] һьнге к'аһин т'әви wи пе һ'әсабе qимәте тә һ'әсаб бькә һ'әта сала р'аwастийе у wе р'оже qимәте тәйи һ'әсабкьри мина чаwа тьштәки пироз бьдә Хӧдан.
[24] Сала р'аwастийе әw ә'рд ль wи те вәгәр'андьне, жь к'е һатьбу к'ьр'ине, к'ижан кӧ хwәйе wи мьлк'и буйә.
[25] Бьра һ'әму qимәткьрьнед тә wәкә к'аше шекьлед Пирозгәһе бьн, бист гера шекьләк бә.
[26] Т'әне ньхӧрийе һ'әйwен, чаwа кӧ йе пешийе буйи п'ара Хӧдан ә, кәсәк нькарә к'ьфш кә, һәгәр щанәга бә йан пәз әw иди п'ара Хӧдан ьн.
[27] Һәгәр әw жь һ'әйwанед нәһ'әлал ә, гәрәке пе wе qимәткьрьна тә бьк'ьр'ә у п'арәкә жь пенща жи ль сәрда зедә кә. Ле һәгәр әw пашда нәк'ьр'ә, бьра wәкә qимәткьрьна тә бе фьротане.
[28] Ле әw п'ешкешед, к'ижан кӧ мәрьв жь һәбука хwә п'ешкеши Хӧдан дькә, һәгәр инсан бә, һ'әйwан бә йан ә'рде мьлк'е wи бә, әw гәрәке нәйенә фьротане у нәйенә пашда к'ьр'ине, һәр п'ешкеш һәрә пироз ьн, әw п'ара Хӧдан ьн.
[29] Һәр инсане кӧ Хӧданр'а һатийә п'ешкешкьрьне, әw пашда найе к'ьр'ине, әw ә'сә гәрәке бе кӧштьне.
[30] Һ'әму дәһәкед дәрәмәта ә'рде, бәред дара п'ара Хӧдан ьн, әвана Хӧданр'а пироз ьн.
[31] Ле һәгәр йәк бьхwазә жь дәһәкед хwә тьштәки пашда бьк'ьр'ә, бьра п'арекә жь пенща жи бькә ль сәр qимәте тьште дайи у пашда бьк'ьр'ә.
[32] Һ'әму дәһәкед жь деwер йан пез, жь ван һ'әму һ'әйwана к'ижан бьн шьвдарер'а дәрбаз бә бе жьмаре у бьк'әвә бьн һ'әсабе дәһа, әw Хӧданр'а пироз ьн.
[33] Гәрәке дина хwә нәдьнә qәнщ у хьраб у жь бәр һәвва нәйенә гӧһар'тьне. Ле һәгәр йәк бьгӧһер'ә, һьнге әw жи у йа т'әв гӧһар'ти һәр дӧ жи пироз ьн, әw пашда найенә к'ьр'ине›».
[34] Әв ьн әw т'әмийед кӧ Хӧдан ль сәре ч'ийайе Синайе, бона зар'ед Исраел т'әми ль Муса кьр.