[1] Хӧдан Мусар'а хәбәрда у гот:
[2] «Qануна йе жь к'отибуне паqьжбуйи әв ә: Wе р'ожа паqьжбуйи гәрәке wи бьбьнә щәм к'аһин.
[3] К'аһин жь зоме дәрк'әвә у к'аһин гава бьбинә кӧ ва йә йе к'оти жь к'отибуна хwә qәнщ буйә,
[4] һьнге к'аһин бьра ә'мьр кә, бона мәрьве кӧ гәрә бе паqьжкьрьне дӧ тәйрәдәйед һ'әлал бь сахи, дара әрзе, р'исе соре гәвәз у зоха һусопе биньн,
[5] к'аһин ә'мьр кә кӧ тәйрәдәки сәр ава жь ч'ә'вканийейә дәрдана ахинда бе сәржекьрьне.
[6] Паше әw wе тәйрәда дӧдайә сах т'әви дара әрзе, р'исе соре гәвәз у зоха һусопе һьлдә. Вана т'әви тәйрәда сах, хуна wе тәйрәдеда кә, йа кӧ ль сәр ава жь ч'ә'вканийеда һатә сәржекьрьне.
[7] Һ'әфт щара бьр'әшинә ль сәр йе кӧ гәрә жь к'отибуне бе паqьжкьрьне, wи паqьж ә'лам кә у тәйрәда сах бәр'дә чоле.
[8] Әw мәрьве кӧ паqьж дьбә бьра к'ьнщед хwә бьшо, пьр'ч'а сәр хwә һьлдә, аве ль хwә кә у wе паqьж бә. Пәй ве йәкер'а бьк'әвә зоме у һ'әфт р'ожа нәк'әвә коне хwә.
[9] Р'ожа һ'әфта диса һ'әму п'ор'е хwә кӧр' кә, п'ор'е сәре хwә, р'удана хwә, бьрийед хwә, аwа готи һ'әму пьр'ч'а сәр хwә һьлдә у к'ьнщед хwә бьшо, аве хwә кә паqьж бә.
[10] У р'ожа һ'әйшта дӧ бәрхед нерә беqӧсур, бәрхәкә мейә йәксалийә беqӧсур у бона дийарийа нани жь дәһә п'ара се п'ар аре хас р'унда стьрайи у логәк жи р'ун бьра һьлдә,
[11] к'аһине кӧ паqьж дькә, мәрьве паqьж дьбә дийарийава ль бәр Хӧдан бәр дәре Коне Щьвине бьдә сәкьнандьне.
[12] У к'аһин бәрхәке һьлдә бона дийарийа бәрвадайине бьдә, wи р'уне дәрданеда жи һьлдә, вана ль бәр Хӧдан чаwа дийарийа һ'әже бьһ'әжинә.
[13] Бәрхе жи ль wи щийи сәржекә, к'идәре дийарийа паqьжбуне у дийарийа т'әвайишәwате тенә сәржекьрьне, дь щийе пирозда, чьмки дийарийа паqьжбуне мина дийарийа бәрвадайине к'аһинр'а дьк'әвә. Әва йа һәрә пироз ә.
[14] К'аһин жь хуна дийарийа бәрвадайине һьлдә у гӧпька гӧһе wи мәрьвийи р'асте хә кӧ паqьж дьбә, ӧса жи т'ьлийа мәзьнә дәсте wийи р'асте у печ'ийа мәзьнә ньге wийи р'асте.
[15] У к'аһин жь wи р'уне дәрданеда һьлдә бькә ль сәр к'әфа дәсте хwәйи ч'әпе.
[16] У к'аһин т'ьлийа хwәйә р'асте, wи р'уне дәсте хwәйи ч'әпеда кә у пе т'ьлийа хwә әwи р'уни һ'әфт щара ль бәр Хӧдан бьр'әшинә.
[17] К'аһин жь wи р'уне дәсте wида майи, гӧпька гӧһе wи мәрьвийи р'асте хә кӧ паqьж дьбә, ӧса жи т'ьлийа мәзьнә дәсте wийи р'асте у печ'ийа мәзьнә ньге wийи р'асте, ль сәр хуна дийарийа бәрвадайине хә.
[18] Паше к'аһин wи р'уне дәсте wида майи бькә сәр сәре мәрьве кӧ паqьж дьбә у бона wи ль бәр Хӧдан к'әwандьне бькә.
[19] К'аһин дийарийа паqьжбуне бьдә у бона мәрьве жь нәпаqьжийа хwә кӧ паqьж дьбә к'әwандьне бькә, паше дийарийа т'әвайишәwате сәржекә.
[20] Һьнге к'аһин дийарийа т'әвайишәwате у дийарийа нани дайнә ль сәр горигәһе. К'аһин бона wи к'әwандьне бькә у әwе бьбә паqьж.
[21] Ле һәгәр әw к'әсиб ә, дәсте wида т'ӧнә һаqас тьшт бьдә, һьнге бьра әw бона гӧнәк'әwандьна хwә бәрхәке чаwа дийарийа бәрвадайине бьдә кӧ бе һ'әжандьне. Ӧса жи бона дийарийа нани жь дәһә п'ара п'арәк аре хаси р'унда стьрайи у логәк р'ун,
[22] дӧ фатьмока, йан жи дӧ щущукед кәwа, жь ван к'ижан кӧ дьк'әвьнә дест, йәк жь ван бона дийарийа бәрвадайине бә, йәк жи бона дийарийа т'әвайишәwате.
[23] У р'ожа һ'әйшта әw бона паqьжбуна хwә вана бинә щәм к'аһин, ль бәр дәре Коне Щьвине бәр Хӧдан.
[24] У к'аһин бәрха дийарийа бәрвадайине у wе дәрдана р'ун һьлдә, вана ль бәр Хӧдан чаwа дийарийа һ'әжандьне бьһ'әжинә.
[25] Паше к'аһин бәрха дийарийа бәрвадайине сәржекә у жь хуна бәрха дийарийа бәрвадайине һьлдә гӧпька гӧһе wи мәрьвийи р'асте хә кӧ паqьж дьбә, ӧса жи т'ьлийа мәзьнә дәсте wийи р'асте у печ'ийа мәзьнә ньге wийи р'асте.
[26] К'аһин жь wи р'уни бькә к'әфа дәсте хwәйи ч'әпе
[27] у пе т'ьлийа хwәйә р'асте к'аһин жь wи р'уне дәсте хwәйи ч'әпеда кә, һ'әфт щара ль бәр Хӧдан бьр'әшинә.
[28] У к'аһин жь wи р'уне дәсте хwәда гӧпька гӧһе wи мәрьвийи р'асте хә кӧ паqьж дьбә, ӧса жи т'ьлийа мәзьнә дәсте wийи р'асте у печ'ийа мәзьнә ньге wийи р'асте, ль сәр хуна дийарийа бәрвадайине хә.
[29] Ле әw р'уне дәсте к'аһинда майи бьра әw ль бәр Хӧдан бькә ль сәр сәре мәрьве кӧ паqьж дьбә у бона wи к'әwандьне бькә.
[30] У жь фатьмока йан щущукед кәwа йәки, к'ижан кӧ бьк'әвә дест,
[31] к'ижан кӧ к'әтә дест, йәке бона дийарийа паqьжбуне йәке жи бона дийарийа т'әвайишәwате т'әви дийарийа нани бьдә. У к'аһин бона мәрьве паqьж дьбә к'әwандьне бькә ль бәр Хӧдан».
[32] Әв ә qануна бона нәхwәшед п'ьзька к'оти у бона паqьжбуна әwед кӧ дәсте wанда т'ӧнә.
[33] Хӧдан Муса у Һарунр'а хәбәрда у гот:
[34] «Гава һун бьк'әвьнә wи wәлате Кәнане, к'ижани кӧ әз чаwа мьлк' дьдьмә wә у әз пе к'әфькийе бәлайе биньмә сәре мала wәлате мьлк'е wәда,
[35] һьнге хwәйе мале гәрәке һәр'ә гӧһе к'аһин пехә у беже: ‹Мала хwәда әз чаwа бежи к'әфькийе к'ьфш дькьм›.
[36] К'аһин ә'мьр кә кӧ мале вала кьн, һе бәри кӧ әw бьк'әвә мале кӧ к'әфькийе бьбинә, wәки һәр тьштед малда тьштәк нәпаqьж һ'әсаб нәбә. Пәй ве йәкер'а к'аһин бьк'әве дина хwә бьдә мале.
[37] Һәгәр әw дина хwә бьдә к'әфьке у бьбинә, wәки к'әфьке р'әнге к'әск йан сорда хwә авитийә диwаред мале к'урда чунә у әw жь р'уйе диwер к'ур к'ьфш дькьн,
[38] һьнге к'аһин жь мале дәрк'әвә ль бәр дәре мале у һ'әфт р'ожа мале к'ьлит кә.
[39] Р'ожа һ'әфта к'аһин диса бе дина хwә бьде, һәгәр к'әфьк ль диwаред wе мале бәла буйә,
[40] һьнге к'аһин ә'мьр кә, кӧ wан кәвьред к'әфьке хwә авитийе дәрхьн у бавежьнә жь бажер дәр щики нә паqьж.
[41] Мале һьндӧр'ва һәр чар алийа бьдә т'әр'ьшандьне у хwәлийа т'әр'ьшанди жи бьр'ежьнә жь бажер дәр щики нә паqьж.
[42] Паше кәвьрнә дьн һьлдьн дайньнә дәwса wан кәвьра у хwәликә дьн һьлдьн диwер сиwах кьн.
[43] Ле һәгәр пәй кәвьрдәрхьстьнер'а, малт'әр'ьшандьн у сиwахкьрьнер'а к'әфьк диса хwә бавежә мале к'ьфш бә,
[44] һьнге к'аһин бьра бе дина хwә бьде, һәгәр к'әфьк ль мале бәла буйә, әва иди к'әфька жь һәвһьлдане йә малда, әw нә паqьж ә.
[45] Гәрәке әw мал бе хьрабкьрьне, кәвьред wе, даред wе у һ'әму хwәлийа wе жь бажер дәр бе дәрхьстьн у авитьне щики нә паqьж.
[46] У к'ижан жи wан р'ожед әw мал к'ьлиткьри бьк'әвә wе мале, һ'әта еваре нә паqьж бә.
[47] У к'ижан wе маледа р'адьзе гәрәке к'ьнщед хwә бьшо, ӧса жи йе wе маледа нан дьхwә гәрәке к'ьнщед хwә бьшо.
[48] Ле гава к'аһин бе дина хwә бьде wәки пәй малсиwахкьрьнер'а к'әфьк ль мале бәла нәбуйә, һьнге к'аһин wе мале паqьж ә'лам кә, чьмки к'әфьк дәрбаз буйә.
[49] У бона паqьжбуна wе мале, к'аһин дӧ тәйрәда, дара әрзе, р'исе соре гәвәз у зоха һусопе һьлдә,
[50] тәйрәдәки сәр ава жь ч'ә'вканийейә дәрдана ахинда сәржекә.
[51] Дара әрзе, зоха һусопе у р'исе соре гәвәз т'әви тәйрәда сах һьлдә, вана хуна wе тәйрәда сәржекьри у ава ч'ә'вканийеда кә у һ'әфт щара ль мале бьр'әшинә.
[52] Мале пе хуна тәйрәда сәржекьри, пе wе ава ч'ә'вканийе у пе тәйрәда сах, т'әви дара әрзе, зоха һусопе у р'исе соре гәвәз паqьж кә.
[53] Ле тәйрәда сах жь бажер дәр дәштеда бәр'дә, бона wе мале к'әwандьне бькә у wе паqьж бә».
[54] Әв ә qануна һәр п'ьзька к'оти у гәwреке,
[55] йан к'әфькийа ль сәр к'ьнща йан ль мале,
[56] ӧса жи йа гьле, гьр' у р'ишийа.
[57] Әв ә һинкьрьна бона qануна жь к'отибун у к'әфькийе паqьжбуне йан нә паqьжбуне.