[1] Хӧдан Муса у Һарунр'а хәбәрда у готә wан:
[2] «Т'әви зар'ед Исраел хәбәрдьн у бежьнә wан: ‹Ванә әw һ'әму һ'әйwанед ль сәр ә'рде жь к'ижана һун дькарьн бьхwьн,
[3] һәр һ'әйwане дӧсьми у сьмвәкьри кӧ дьк'айен бьхwьн.
[4] Ле жь йед дьк'айен йан йед сьмвәкьри, гәрәке вана нәхwьн, дәвә, р'аст ә дьк'айе, ле нә сьмвәкьри йә, әw бона wә нә һ'әлал бә.
[5] Qотьк р'аст ә дьк'айе ле нә сьмвәкьри йә, әw бона wә нә һ'әлал бә.
[6] К'еврушк р'аст ә дьк'айе ле нә сьмвәкьри йә, әw бона wә нә һ'әлал бә.
[7] Бәраз р'аст ә сьмqәльши у сьмвәкьри йә, ле кӧ нак'айе әw бона wә нә һ'әлал бә.
[8] Гоште wан нәхwьн, щәндәкед wан нәк'әвьн, әw бона wә нә һ'әлал бьн.
[9] Жь һ'әму һ'әйwанед нава авада, аwа готи һ'әму һ'әйwанед нава бә'ра у ч'әмада кӧ хwәйимьл у хwәйипач' ьн бьхwьн.
[10] Ле әw һ'әмуйед кӧ бә'ра у ч'әмада йә бе мьл у бе пач'ә жь һәр һ'әйwанед авада дьшулькә әw бона wә һ'әрам бьн.
[11] Әwана бона wә һ'әрам бьн, гоште wан нәхwьн у жь щәндәкед wан зьвер бьн.
[12] Һ'әму һ'әйwанед кӧ аведа нә бе мьл у бе пач' бона wә һ'әрам бьн.
[13] Жь нава тәйрәда жи жь ван зьвер бьн у нәхwьн, әw һ'әрам ьн: Тәйр, тәйре бази, тәйре бә'ре,
[14] qуш у баwике һәр щур'ед wанва,
[15] һәр qар'qар' щур'ед wанва,
[16] дәвәqуш, буме шәве, мә'сигьр у qәрqә һәр щур'ед wанва,
[17] кӧнде кори бьч'ук, qазе мә'сийа, кӧнде кори мәзьн,
[18] кӧнде кори сьпи, пеликан, qьрqе Мьсьре,
[19] ләгләге, qӧльнг щур'ед wанва, пупу, бач'әрмок.
[20] Һәр меш-моред хwәйип'әр'ә кӧ ль сәр чар ньга дьчьн, бона wә һ'әрам бьн.
[21] Ле ван һ'әму меш-моред хwәйи п'әр'ә кӧ ль сәр чар ньга дьчьн бьхwьн, к'ижан кӧ феза чокада һет һәнә бона банздана ль сәр ә'рде.
[22] Жь ван һун дькарьн бьхwьн: Кӧли һәр щур'ед wанва, һәспе гиһе һәр щур'ед wанва, ч'ьр'ик һәр щур'ед wанва, сийаре буке һәр щур'ед wанва.
[23] Ле меш-моред хwәйип'әр'ә майинә чарньги, бона wә һ'әрам бьн.
[24] Пе wан һуне бьһ'әр'ьмьн, һәр кәсе кӧ ль щәндәкед wан к'әвә, һ'әта еваре нә паqьж бә.
[25] Һәр кәсе кӧ жь wан щәндәкәки һьлдә бьра к'ьнще хwә бьшо у һ'әта еваре нә паqьж бә.
[26] Һәр һ'әйwанед сьмвәкьри ле нә сьмqәльшинә у нак'айен әw бона wә һ'әрам бьн, һәр кәсе кӧ ль wан к'әвә нә паqьж бә.
[27] Һәр һ'әйwанед чарньгийә кӧ ль сәр ләпе хwә дьгәр'ьн әw бона wә һ'әрам бьн, һәр кәсе кӧ ль щәндәкед wан к'әвә, һ'әта еваре нәпаqьж бә.
[28] Һәр кәсе кӧ щәндәкед wан һьлдә, бьра к'ьнще хwә бьшо у һ'әта еваре нә паqьж бә. Әw бона wә һ'әрам ьн.
[29] Әв ьн әw һ'әйwанед кӧ ль сәр ә'рде дьшулькьн, к'ижанед кӧ бона wә һ'әрам бьн: Мьшке кор, мьшк, мә'рәгиск һәр щур'ед wанва,
[30] мә'рәгиске ләпьки, тимсаһ, макәмә'р, qумqумок, мә'рәгиске р'әнг-р'әнги.
[31] Әв ьн бона wә һ'әрам, жь wан һ'әму шулькийа, һәр кәсе кӧ щәндәкед wанә кӧшти к'әвә, һ'әта еваре нә паqьж бә.
[32] Кӧштики жь wан ль сәр чь тьштида кӧ бьк'әвә, һәгәр тьштәки дарин бә, йан к'ьнщ бә, йан ч'әрм, йан т'ер', йан тьштәки кӧ бона шьхӧл бьк'ар тиньн дьһ'әр'ьминә, wан бькьнә аве, һ'әта еваре нә паqьж бә, пәй ве йәкер'а паqьж бә.
[33] Һәгәр жь ван р'ә'wьра йәк бьк'әвә нава дәрданәкә ахин, чь тьшт кӧ wеда бә әw һ'әрам дьбә у әwе дәрдане бьшкеньн.
[34] Һәр тьште хwарьнейә кӧ ава жь ве дәрдане бьпәкә wе, әwе бьһ'әр'ьмә у ӧса жи һәр тьштед вәхwарьнейә кӧ пе ве дәрдане вәхwьн дьһ'әр'ьмә.
[35] Һәр тьштед кӧ бәрәт'е ван р'ә'wьра лек'әвьн wе бьһ'әр'ьмьн, һәгәр тәндур бә йан бәхир бә гәрәке бе һьлшандьне, әвана һ'әр'ьминә у бона wә әвана нә паqьж бьн.
[36] Т'әне кани у һ'әwзе аве паqьж дьминьн, ле йе кӧ щәндәке wан к'әвә әw дьһ'әр'ьмә.
[37] Һәгәр бәрәт'е wан бьк'әвә ль сәр т'охьмәки чандьне, әw паqьж ә.
[38] Ле гава ав к'әтьбә ль сәр т'охьм у бәрат'әки жь wан р'ә'wьра сәрда бьк'әвә, әw бона wә һ'әрам бә.
[39] Ле һәгәр һ'әйwанәки кӧ те хwарьне һ'ьшк бә, әwе кӧ ль щәндәке wи к'әвә, һ'әта еваре нә паqьж бә.
[40] Әwе кӧ жь wи щәндәки бьхwә, гәрәке к'ьнщед хwә бьшо у һ'әта еваре нә паqьж бә, ӧса жи әwе кӧ щәндәк һьлдә гәрәке к'ьнщед хwә бьшо, һ'әта еваре нә паqьж бә.
[41] Жь һәр шулькийе кӧ ль сәр ә'рде дьшулькьн зьвер бьн, wан гәрәке нәхwьн.
[42] Һ'әму шулькийед ль сәр ә'рдейә кӧ дьшулькьн, йед ль сәр зьк дьчьн, йан йед сәр чар ньга, йан йед пьр'ньг нәхwьн, чьмки әwә һ'әрам ьн.
[43] Һун жь шулькийед ль сәр ә'рде зьвер бьн, пе wан хwә нәһ'әр'ьминьн кӧ р'уйе wанда һун нәһ'әр'ьмьн.
[44] Чьмки әз Хӧдан Хwәдейе wә мә, аwа нәфса хwә пироз кьн у пироз бьн, чьмки әзи пироз ьм, нәфса хwә пе т'ӧ шулькийе ль сәр ә'рде дьльпьтә нәһ'әр'ьминьн.
[45] Чьмки әз Хӧдан ьм, кӧ мьн һун жь ә'рде Мьсьре һәвраз анин, кӧ әз бьбьмә Хwәдейе wә. Аwа пироз бьн, чьмки әзи пироз ьм.
[46] Әв ә qануна һьндава һ'әйwен, тәйрәда, һ'әму һ'әйwанед аведа дьһ'әжьн у һ'әму һ'әйwанед кӧ ль сәр ә'рде дьшулькьн,
[47] wәки фьрqийе бькьнә нава һ'әлал у нәһ'әлал у нава һ'әйwане кӧ те хwарьне у һ'әйwане кӧ найе хwарьне›».