[1] Хӧдан Мусар'а хәбәрда у готе:
[2] «Т'әви зар'ед Исраел хәбәр дә у бежә wан: ‹Һәгәр к'ӧлфәт пе бьминә кӧр'әки бинә, һьнге әw һ'әфт р'ожа нәпаqьж бә, wәкә wан р'ожед кӧ әw ә'дәте нәхwәшийа к'ӧлфәтеда йә, әw нәпаqьж бә.
[3] У р'ожа һ'әйшта кӧр'ьк бе сьнәткьрьне.
[4] К'ӧлфәт жи гәрәке си у се р'ожа хwә хwәйи кә, һ'әта жь хуна хwә паqьж бә, т'ӧ щар тьштәки пироз нәк'әвә, нә жи бьк'әвә пирозгәһе, һ'әта р'ожед паqьжбуна wе хьтьм бьн.
[5] Ле һәгәр qизәке бинә, дӧ һ'әфтийа нәпаqьж бә wәкә ә'дәте нәхwәшийа хwә, шест шәш р'ожа хwә хwәйи кә һ'әта жь хуна хwә паqьж бә.
[6] У гава әw р'ожед паqьжбуна бона кӧр' йан qиз анине хьтьм бьн, һьнге бьра әw бәрхәкә йәксали бона дийарийа т'әвайишәwате бинә у щущукәкә кәwе йан фатьмокәке жи бона дийарийа паqьжбуне бинә ль бәр дәре Коне Щьвине щәм к'аһин.
[7] У к'аһин ван бинә ль бәр Хӧдан, к'әwандьне бона wе бькә у әw жь канийа хуне паqьж бә. Әв ә qануна бона к'ӧлфәта кӧр' йан qиз анине.
[8] Ле һәгәр дәсте wеда т'ӧнә кӧ бәрхе бинә, һьнге бьра дӧ фатьмока йан жи дӧ щущукед кәwа бинә, йәке бона дийарийа т'әвайишәwате, йәке жи бона дийарийа паqьжбуне у к'аһин бона wе к'әwандьне бькә у әw паqьж бә›».