[1] Хӧдан жь Коне Щьвине гази Муса кьр у готә wи:
[2] «Т'әви зар'ед Исраел хәбәр дә у бежә wан: ‹Гава йәки жь wә qӧрбанәке Хӧданр'а бьдә, бьра әw qӧрбана wә жь гар'ане бә йан жь кери.
[3] Һәгәр qӧрбана wийә дийарийа т'әвайишәwате жь гар'ане йә, бьра әw йе нер у беqӧсур бинә ль бәр дәре Коне Щьвине, кӧ ль бәр Хӧдан бе qәбулкьрьне.
[4] Бьра әw дәсте хwә дайнә ль сәр сәре дийарийа т'әвайишәwате кӧ бе qәбулкьрьне, бона к'әwандьна гӧнед wи.
[5] Бьра әw щанәга ль бәр Хӧдан сәржекә у кӧр'ед Һаруннә к'аһин хуне һьлдьн бьр'әшиньнә ль сәр һәр алийед горигәһа ль бәр дәре Коне Щьвине.
[6] Бьра дийарийа т'әвайишәwате п'ост кә у чити-чити һур кә.
[7] Һьнге кӧр'ед Һаруне к'аһин агьр дайньнә ль сәр горигәһе у qьрша бьдьнә ль сәр егьр.
[8] Кӧр'ед Һаруннә к'аһин бьра wан читийа, сәри у донва бьдьнә ль сәр wан qьршед агьре ль сәр горигәһе.
[9] Ле навдьл у ньга жи, бьра йе дийардар пе аве бьшо у к'аһин гьшки ль сәр горигәһе бьшәwьтинә, чаwа дийарийа т'әвайишәwате, дийарийа шәwатейә бинхwәш ә бона Хӧдан.
[10] Һәгәр qӧрбана wийә дийарийа т'әвайишәwате жь кери йә, аwа готи жь пез йан бьзьна йә, бьра әw йе нер у беqӧсур бьдә.
[11] Wи ль бәр Хӧдан алийе бакӧра горигәһе сәржекә у кӧр'ед Һаруннә к'аһин хуна wи ль сәр һәр алийед горигәһе бьр'әшиньн.
[12] У чити-чити һур кә, сәри у донва к'аһин дайнә ль сәр qьршед агьре ль сәр горигәһе.
[13] Ле навдьл у ньга жи, бьра йе дийардар пе аве бьшо у к'аһин гьшки бинә ль сәр горигәһе бьшәwьтинә, чаwа дийарийа т'әвайишәwате, дийарийа шәwатейә бинхwәшә бона Хӧдан.
[14] Һәгәр qӧрбана wийә дийарийа т'әвайишәwате бона Хӧдан жь тәйрәда йә, һьнге бьра qӧрбана хwә жь фатьмока йан жи жь щущукед кәwа бьдә.
[15] Бьра к'аһин wе бинә бәр горигәһе, сәри ле һьлqәтинә у башqә ль сәр горигәһе бьшәwьтинә у хун к'еләка горигәһеда һәр'ә.
[16] У qаqар'ушка wе ә'дәбева дәрхә алийе р'оһьлата горигәһева бавежә к'озиданге.
[17] Әwе жь баскада вәжәнә, бейи жь һәв qәтандьн, бьра к'аһин ль сәр горигәһе, ль сәр даре сәр егьр бьшәwьтинә. Әва дийарийа т'әвайишәwате, дийарийа шәwатейә бинхwәш ә бона Хӧдан.