[1] Хӧдан Муса у Һарунр'а хәбәрда у гот:
[2] «Т'әви зар'ед Исраел хәбәрдьн у бежьнә wан: ‹Һәгәр бәдәна йәки сәр гәмаре вәбә, әв гәмаржечуйина wи нәпаqьж ә.
[3] Нәпаqьжийа wи дәма гәмаржечуйина wида әва бә: Гава жь бәдәна wи гәмар же һәр'ә йан жи бәдәна wи жь гәмаре бе бьр'ине, әва нәпаqьжайа wи йә.
[4] Әw ньвина кӧ гәмаржечуйи бьк'әве, әw нәпаqьж ә, ль сәр чь тьшти жи кӧ р'уни әw нәпаqьж ә.
[5] Әw кәсе кӧ ньвина wи к'әвә, гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[6] Әw кәсе кӧ ль сәр wи тьшти р'уни, ль сәр к'ижани гәмаржечуйи р'уньштьбә, әw гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[7] Әw кәсе кӧ бәдәна гәмаржечуйи к'әвә, әw гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[8] Һәгәр гәмаржечуйи т'уйи ль сәр кәсәки паqьж кә, әw гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[9] Әw зине кӧ йе гәмаржечуйи ль сәр р'уни, әw нәпаqьж бә.
[10] Әw кәсе кӧ тьштәки бьн wи к'әвә, һ'әта еваре нәпаqьж бә у әw кәсе wан тьшта һьлдә, әw гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[11] У әw кәсе кӧ гәмаржечуйи дәстнәшушти лек'әвә, әw гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[12] Әw дәрдана ахин, к'ижан кӧ гәмаржечуйи лек'әвә гәрәке бе шкенандьне, ле дәрдана дарин гәрәке пе аве бе шуштьне.
[13] Ле гава гәмаржечуйи жь гәмаре хьлаз бә, әw гәрәке бона паqьжбуна хwә һ'әфт р'ожа хwәр'а бьжмьрә, к'ьнщед хwә бьшо у бәдәна хwә жи пе ава ч'ә'вканийе бьшо у wе бьбә паqьж.
[14] У р'ожа һ'әйшта әw гәрәке бона хwә дӧ фатьмока йан жи дӧ щущукед кәwа һьлдә ль бәр Хӧдан бәр дәре Коне Щьвине бьсәкьнә у вана бьдә к'аһин.
[15] К'аһин жь ван йәке бькә дийарийа паqьжбуне, йәке жи бькә дийарийа т'әвайишәwате у к'аһин бона гәмаржечуйина wи к'әwандьне бькә ль бәр Хӧдан.
[16] Һәгәр т'охьме мерәки же һәр'ә, әw гәрәке бәдәна хwә пева пе аве бьшо у һ'әта еваре әw нәпаqьж бә.
[17] У әw т'охьме жечуйи чь к'ьнщи йан чь ч'әрми к'әвә, әw гәрәке пе аве бе шуштьне у һ'әта еваре нәпаqьж бә.
[18] Һәгәр мер сәре хwә к'ӧлфәтер'а дайнә у т'охьм же һәр'ә, әwана гәрәке пе аве хwә бьшон у һ'әта еваре нә паqьж бьн.
[19] Һәгәр к'ӧлфәтәк пьшта wе вәбә у хун же һәр'ә, гәрәке һ'әфт р'ожа әwа нава кьрасада хwә хwәйи кә у һәр кәсе кӧ wе к'әвә, һ'әта еваре нә паqьж бә.
[20] Һ'әму wәхте нава кьрасада әwа ль сәр чь п'алдә әw тьшт нә паqьж бә у ль сәр чь тьшти жи кӧ р'уни, әw тьшт нә паqьж бә.
[21] Һәр кәсе кӧ ньвина wе к'әвә, гәрәке к'ьнще хwә бьшо, хwә жи пе аве бьшо у һ'әта еваре нәпаqьж бә.
[22] У әw кәсе кӧ ль wи тьшти к'әвә ль сәр чь әwа р'уньшти йә, гәрәке к'ьнще хwә бьшо, хwә жи пе аве бьшо у һ'әта еваре нәпаqьж бә.
[23] Әw кәсе кӧ тьштәки ньвина wе йан жи wи тьшти к'әвә ль сәр чь әwа р'удьне, һ'әта еваре нәпаqьж бә.
[24] Һәгәр мер сәре хwә wер'а дайнә, әw хwә дьләwьт'инә, һ'әфт р'ожа әw нәпаqьж бә у ль сәр чь ньвине әw п'алдә әw нәпаqьж бә.
[25] Һәгәр к'ӧлфәтәк нә wәхте хwәда гәләк р'ожа хуне бьбинә, йан жи жь чапе дәр кьраса бьбинә, әw һ'әму р'ожед нәпаqьжайа wе гәрәке мина wан р'ожед пьштвәбуна wе бьн, әwа нәпаqьж ә.
[26] Ль сәр чь ньвине әw п'алдә, дь нава wан р'ожед кӧ әw хуне дьбинә, мина ньвина пьштвәбуна wе нәпаqьж бә у ль сәр чь тьшти кӧ әw р'уне, мина нәпаqьжийа пьштвәбуна wе нәпаqьж бә.
[27] У һәр кәсе кӧ ль wан тьшта к'әвә, wе нәпаqьж бә, әw гәрәке к'ьнще хwә бьшо у хwә жи пе аве бьшо, һ'әта еваре нәпаqьж бә.
[28] Ле гава әw жь гәмаре бе бьр'ине, һьнге гәрәке әwа һ'әфт р'ожа хwәр'а һ'әсаб кә у паше паqьж бе һ'әсабе.
[29] Р'ожа һ'әйшта әва дӧ фатьмока йан жи дӧ щущукед кәwа хwәр'а һьлдә у вана бинә щәм к'аһин ль бәр дәре Коне Щьвине.
[30] К'аһин йәке бькә дийарийа паqьжбуне у йәке жи бькә дийарийа т'әвайишәwате, к'аһин к'әwандьне ль бәр Хӧдан бькә бона паqьжбуна жь гәмара wе.
[31] Бь ви аwайи зар'ед Исраел жь нәпаqьжайа wан хwәй кьн, wәки Коне мьни Шә'дәтийейи нава хwәда нәһ'әр'ьминьн, нава нәпаqьжайа хwәда нәмьрьн›».
[32] Әв ә qануна бона йе гәмар же дьчә, ӧса жи бона нәпаqьже кӧ т'охьм же дәрте
[33] у нәхwәша кӧ сәр кьраса вәдьбә, мер йан к'ӧлфәта гәмар жь wан дьчә у мере кӧ сәре хwә т'әви к'ӧлфәта нәпаqьж датинә.