[1] Хӧдан Мусар'а хәбәрда у гот:
[2] «Т'әви зар'ед Исраел хәбәр дә у бежә: ‹Һәгәр кәсәк бе һ'әмде хwә гӧнә бькә у жь wан т'әмийед Хӧданә дайи шаш бә, йәки жь wан нәqәдинә,
[3] йан һәгәр сәрәкк'аһин гӧнә бькә, щьмә'те хwәр'а гӧнәк'ар кә, гәрәке әw бона гӧне хwәйи кьри, жь деwер щанәгаки беqӧсур, чаwа дийарийа паqьжбуне бьдә Хӧдан.
[4] Щанәге бьра бинә ль бәр дәре Коне Щьвине ль бәр Хӧдан, дәсте хwә дайнә ль сәр сәре щанәге у ль бәр Хӧдан щанәге сәржекә.
[5] Сәрәкк'аһин бьра жь хуна щанәге һьлдә бинә Коне Щьвине,
[6] у әw к'аһин т'ьлийа хwә хунеда кә, хуне һ'әфт щара ль бәр Хӧдан бьр'әшинә ль бәр п'әр'да пирозгәһе.
[7] У сәрәкк'аһин бьра жь wе хуне ль стьруйед wе горигәһа бьхурейә бинхwәш хә, йа кӧ Коне Щьвинеда ль бәр Хӧдан ә. Хуна щанәгейә майи жи бьр'ежә жера горигәһа т'әвайишәwатейә ль бәр дәре Коне Щьвине.
[8] У һ'әму бәзе щанәге бона дийарийа паqьжбуне же бе дәрхьстьн: Бәзе сәрзьк, һ'әму бәзе навдьл,
[9] һәр дӧ гӧр'ч'ька бәзе сәр у к'еләкава, бәтане щәгәре гӧр'ч'ькава т'әвайи дәрхә,
[10] чаwа жь щанәге дийарийа һәләqәтийе тенә дәрхьстьне. Сәрәкк'аһин вана ль сәр горигәһа т'әвайишәwате бьшәwьтинә.
[11] Ле ч'әрме щанәге, т'әмамийа гошт, сәр-п'и, навдьл, ә'дәбева,
[12] аwа готи жь щанәге чь мабә, бьбә жь зоме дәр щики паqьж, щийе к'ози кӧ те р'етьне, ль сәр qьрша пе егьр бьшәwьтинә. Щийе к'ози кӧ те р'етьне бьра бе шәwьтандьне.
[13] Ле һәгәр т'әмамийа щьвина Исраел пева бе һ'әмде хwә шаш бә у әв йәк жь щьвине вәшарти бьминә, жь wан һ'әму т'әмийед Хӧданә дайи йәки нәqәдиньн у гӧнәк'ар дәрен,
[14] гава әw гӧне wани кьри дәре, бьра щьвин жь деwер щанәгаки бона дийарийа паqьжбуне бьдьн у биньн ль бәр Коне Щьвине.
[15] Р'успийед щьмә'те бьра ль бәр Хӧдан дәстед хwә дайньнә ль сәр сәре щанәге у ль бәр Хӧдан щанәга бе сәржекьрьне.
[16] У сәрәкк'аһин жь хуна щанәге һьлдә бинә Коне Щьвине.
[17] Әw к'аһин т'ьлийа хwә хунеда кә ль бәр Хӧдан һ'әфт щара бьр'әшинә ль бәр п'әр'де.
[18] У жь wе хуне стьруйед wе горигәһа ль бәр Хӧдан хә, йа кӧ дь Коне Щьвинеда йә у хуна майи жи бьр'ежә жера горигәһа т'әвайишәwатейә ль бәр дәре Коне Щьвине.
[19] У һ'әму бәзе wи жь wи дәрхә у ль сәр горигәһе бьшәwьтинә.
[20] Ви щанәгайи жи ӧса бькә, чаwа кӧ щанәгайе бона дийарийа паqьжбуне кьр, сәрәкк'аһин бона wан бьра к'әwандьне бькә у ль wан wе бе бахшандьне.
[21] Паше щанәге жь зоме дәрхә дәр бьшәwьтинә, чаwа щанәгайе пешьн шәwьтанд. Әва дийарийа паqьжбуне йә бона щьмә'те.
[22] Һәгәр сәрwерәк беһ'әмде хwә гӧнә бькә у жь wан һ'әму т'әмийед Хӧдан Хwәдейе хwә йәки нәqәдинә, әw гӧнәк'ар дәрте,
[23] гава гӧне wи wива бе ә'йанкьрьне, һьнге бона хwә бьра жь бьзьна нерики беqӧсур qӧрбан бинә.
[24] Әw дәсте хwә дайнә ль сәр сәре нери у ль бәр Хӧдан wи щийе кӧ дийарийа т'әвайишәwате те сәржекьрьне сәржекә. Әва дийарийа паqьжбуне йә.
[25] К'аһин бьра т'ьлийа хwә хуна дийарийа паqьжбунеда кә у ль стьруйед горигәһа т'әвайишәwате хә у хуна майи жи бьр'ежә жера горигәһа т'әвайишәwате.
[26] Һ'әму бәзе wи, мина бәзе дийарийа һәләqәтийе ль сәр горигәһе бьра бьшәwьтинә. Бь ви аwайи к'аһин бона гӧне wи к'әwандьне бькә у wе ль wи бе бахшандьне.
[27] Һәгәр йәки жь мьләт беһ'әмде хwә гӧнә бькә, жь wан т'әмийед Хӧдане хwә йәки нәqәдинә, әw гӧнәк'ар дәрте
[28] у гава гӧне wи wива бе ә'йанкьрьне, бьра бона гӧне хwәйи кьри бьзьнәкә беqӧсур qӧрбан бинә.
[29] Әw дәсте хwә дайнә ль сәр сәре дийарийа паqьжбуне у дийарийа паqьжбуне wи щийе дийарийа т'әвайишәwате бе сәржекьрьне.
[30] К'аһин бьра т'ьлийа хwә wе хунеда кә у ль стьруйед горигәһа т'әвайишәwате хә у хуна майи жи бьр'ежә жера горигәһе.
[31] Һ'әму бәзе бьзьне дәрхә, чаwа бәзе дийарийа һәләqәтийе те дәрхьстьне у к'аһин wи бәзи ль бәр Хӧдан ль сәр горигәһе бона бинхwәшийе бьшәwьтинә. Бь ви аwайи к'аһин бона wи к'әwандьне бькә у ль wи wе бе бахшандьне.
[32] Ле һәгәр бәрхе бона дийарийа паqьжбуне бьдә, бьра йәкә мейә бе qӧсур бинә.
[33] Дәсте хwә дайнә ль сәр сәре дийарийа паqьжбуне, дь wи щийе дийарийа т'әвайишәwате те сәржекьрьне, wе дийарийа паqьжбуне сәржекә.
[34] К'аһин т'ьлийа хwә хуна дийарийа паqьжбунеда кә у ль стьруйед горигәһа т'әвайишәwате хә у хуна майи жи бьр'ежә жера горигәһе.
[35] Һ'әму бәзе wе дәрхә, чаwа бәзе бәрха дийарийа һәләqәтийе те дәрхьстьне у к'аһин wи бәзи т'әви дийарийед шәwатейә бона Хӧдан ль сәр горигәһе бьшәwьтинә. Бь ви аwайи к'аһин бона гӧне wийи кьри к'әwандьне бькә у ль wи wе бе бахшандьне.