[1] Хӧдан ль сәр ч'ийайе Синайе Мусар'а хәбәрда у готе:
[2] «Т'әви зар'ед Исраел хәбәр дә у бежә wан: ‹Гава һун бьк'әвьнә wи ә'рде кӧ әзе бьдьмә wә, әw ә'рд гәрәке шәмийа Хӧдан хwәй кә, р'ьһ'әт бә.
[3] Шәш сала ә'рде хwә бьр'әшинә у шәш сала тьрийед хwә бьбьр'ә у дәрәмәта wан һьлдә,
[4] ле сала һ'әфта бона ә'рде мина шәмийа р'ьһ'әтийе бә, шәмийа Хӧдан бә. Ә'рде хwә нәр'әшини у тьрийед хwә нәбьр'и.
[5] Wе зәвийа кӧ ә'рде тәда хwәха дәрк'әвә нәдьруйи у wан тьрийед р'әзе тәда кӧ тә нәбьр'ибьн ә'мбар нәки. Әw сал бона ә'рде сала р'ьһ'әтийе бә.
[6] Дәрәмәта сала р'ьһ'әтийейә хwәха дәрк'әти бьра һ'әму т'әне бьбә хӧре wә, хӧре тә, хӧламе тә, щарийа тә, п'аләйед тә у хәрибе кӧ нава тәда дьминә,
[7] ӧса жи һ'әму дәрәмәте ә'рде бьбә хӧре һ'әйwане тә у wан р'ә'wьред wәлате тәда.
[8] Тӧ хwәр'а һ'әфт салед шәмийе һ'әсаб кә, аwа готи һ'әфт щара һ'әфт сал у wәхте һ'әфт салед шәмийе wе бьбә чьлнәһә сал.
[9] У дәһе мәһа һ'әфта бор'ийе бьди лехьстьне, әw р'ожа к'әwандьне йә т'әмамийа wәлате хwәда бор'ийе бьдьнә ледане.
[10] Сала пенщи һун пироз кьн у ль сәр ә'рде бона һ'әму бьнәлийед сәр ә'рде азадийе ә'лам кьн. Әва wәр'а бьбә сала р'аwастийе. Һәр кәс бьра вәгәр'ә һәр'ә ль сәр мьлк'е хwә, һәр кәс бьра вәгәр'ә һәр'ә нава малбәта хwә.
[11] Әв сала пенщи бьра wәр'а бьбә сала р'аwастийе. Нә гәрәке бьр'ашиньн нә жи чь кӧ хwәха дәрк'әтийә бьдьрун у тьрийе ль сәр к'олед нәбьр'и жи ә'мбар нәки.
[12] Чьмки сала р'аwастийе йә, әw бона wә пироз бә. Ә'рдеда дәрәмәте хwәха дәрк'әти бьра т'әне бьбә хӧре wә.
[13] Ве сала р'аwастийе һәр кәс бьра вәгәр'ә һәр'ә ль сәр мьлк'е хwә.
[14] Һәгәр тьштәки бьфьроши мәрьвәки, йан тьштәки жь мәрьвәки бьк'ьр'и, һәвдӧ нәхапиньн.
[15] Тӧ жь мәрьвәки пе wи qимәте салед майи бьк'ьр'ә, чьqас сал мабьн һ'әта сала р'аwастийе, әw жи пе һ'әсабе wан салед дьруне гәрәке бьфьрошә тә.
[16] Чьqаси зә'ф бьн әw салед һ'әтани сала р'аwастийе, һаqаси тӧ гәрәке бьһа бьк'ьр'и, чьqаси сал һьндьк бьн һаqаси жи гәрәке qимәт кем ки, чьмки әw давежә ль сәр һ'әсабе салед нандьруне дьфьрошә тә.
[17] Һәвдӧ нәхапиньн, ле жь Хwәдейе хwә бьтьрсьн, чьмки әз Хӧдан Хwәдейе wә мә.
[18] Аwа qьраред мьн бьqәдиньн, qанунед мьн хwәй кьн у бьqәдиньн, һьнге һуне ль сәр wи ә'рди р'ьһ'әт бьжин.
[19] Ә'рде дәрәмәта хwә бьдә һ'әта кӧ һун т'ер бьхwьн у ль сәр жи р'ьһ'әт бьжин.
[20] Һәгәр һун бежьн: ‹Сала һ'әфта әме чь бьхwьн, wәки әм нәр'әшиньн у әк'ьне хwә т'оп нәкьн?›
[21] Сала шәша әзе хер-бәрәк'әта хwә ль сәр wәда бьшиньм, әwе р'ьсqе се сала бьдә wә.
[22] Сала һ'әйшта һун кӧ бьр'әшиньн, һуне жь дайина дьрунед кәвьн бьхwьн һ'әта сала нәһа. Һуне жь wе дайина кәвьн бьхwьн һ'әта кӧ зәви бьгьһижьн.
[23] Ә'рд гәрәке һ'әта-һ'әтайе нәйе фьротане, чьмки ә'рд ә'рде мьн ә у һун жи щәм мьн хәриб у меван ьн.
[24] Бона т'әмамийа wи ә'рде мьлк'е хwә, гәрәке һун изьне бьдьн кӧ ә'рд пашда бе к'ьр'ине.
[25] Һәгәр бьрайе тә бьк'әвә дәсттәнг бә у п'арәке жь мьлк'е хwә бьфьрошә, пьсмамәки wийи незик дькарә бе, чь кӧ бьре тә фьротьбә пашда бьк'ьр'ә.
[26] Ле һәгәр кәсәки wи т'ӧнәбә кӧ бьк'ьр'ә, ле әw хwәха р'е тер'а бьбинә, кӧ дәсте wида һәйә әw бькарьбә пашда бьк'ьр'ә.
[27] Һьнге бьра әw р'ожа фьротида һ'әсаб кә у бавежә ль сәр qимәте салед дәрбазбуйи, чьqас мабә ль йе к'ьр'и вәгәр'инә у мьлк'е хwә диса бьбә хwәйи.
[28] Ле һәгәр дәсте wида һаqас т'ӧнә бә кӧ ль wи вәгәр'инә, һьнге чь кӧ wи фьротийә дәсте йе к'ьр'ида бьминә һ'әта сала р'аwастийе, сала р'аwастийе йе к'ьр'и дур к'әвә у йе фьроти диса бьбә хwәйе мьлк'е хwә.
[29] Һәгәр йәк бажаре суркьрида маләке бьфьрошә, пәй фьротанер'а мӧхдаре саләкеда әw дькарә диса пашда бьк'ьр'ә, саләкеда изьна wи һәйә пашда һьлдә.
[30] Һәгәр һ'әта хьлазийа сале әw пашда нәк'ьр'ә, һьнге әw мала бажаре суркьрида һ'әта-һ'әтайе кӧр'е-кӧр'ар'а бьминә, сала р'аwастийе ль wи нәйе вәгәр'андьне.
[31] Ле малед гӧндайә кӧ бе сур ьн, әw мина к'әwшәне чоле бьн, әw пашда бенә к'ьр'ине, сала р'аwастийе әw бенә вәгәр'андьне.
[32] Ле бәле бажаред леwийада, әw малед мьлк'е wанә бажарада, леwи т'ьме дькарьн пашда бьк'ьр'ьн.
[33] Һәгәр кәсәки мал жь леwийа к'ьр'ибә, әw мала мьлк'е wийи бажерда фьроти, сала р'аwастийе гәрәке ле бе вәгәр'андьне, чьмки нава зар'ед Исраелда малед бажаред леwийада мьлк'е wан ьн.
[34] У әw к'әwшәне ә'рде дора бажаред леwийа гәрәке нәйе фьротане, чьмки әw мьлк'е wани һ'әта-һ'әтайе йә.
[35] Һәгәр исраелик дәсттәнг бә у щәм тә бьк'әвә нькарьбә сәре хwә хwәй кә, алик'арийе бьде чаwа хәрибәки йан р'еwики, кӧ ль щәм тә бьжи.
[36] Жь wи маш йан к'аре нәстини, жь Хwәдейе хwә бьтьрсә, кӧ әwе исраели ль щәм тә бьжи.
[37] П'әре хwә пе сәләфа нәдейи у нане хwә жи нәдейи кӧ к'аре же һьлди.
[38] Әз Хӧдан Хwәдейе wә мә, кӧ һун жь wәлате Мьсьре дәрхьстьн, wәки wәлате Кәнане бьдьмә wә у бьбьмә Хwәдейе wә.
[39] Гава йәки исраели щәм тә бьк'әвә к'әсиб бә у хwә бьфьрошә тә, тӧ wи мина хӧламтийа хӧламәки нәди хәбате.
[40] Әw гәрәке щәм тә мина п'аләки йан хәрибәки бә, һ'әта сала р'аwастийе щәм тә бьхәбьтә.
[41] Паше бьра әw жь щәм тә дәре, әw нәфәред хwәва вәгәр'ә бьгьһижә малбәта хwә, диса һәр'ә ль сәр мьлк'е кал-бавед хwә.
[42] Чьмки әw хӧламед мьн ьн, йед кӧ мьн жь wәлате Мьсьре дәрхьстьн, әw гәрәке ӧса нәйенә фьротане, чаwа кӧ хӧлам тенә фьротане.
[43] Һ'ьшк ль сәр wи һ'ӧкӧм нәки, ле жь Хwәдейе хwә бьтьрси.
[44] Хӧлам у хӧламокед тә кӧ һәбьн, әw гәрәке жь мьләтед дор-бәред wә бьн, жь wан хӧлам у хӧламока бьк'ьр'ьн.
[45] Ӧса жи зар'ед хәрибайә кӧ ль щәм wә дьминьн, жь wан дькарьн бьк'ьр'ьн у жь нәфәред wанә кӧ wәлате wәда бунә, әw бьбьнә мал у мьлк'е wә.
[46] Пәй хwәр'а жи wан чаwа мьлк'е wартийе зар'ед хwәр'а бьһельн, кӧ т'ьме әw хӧламе wә бьн. Ле ль сәр бьрайед хwә, зар'ед Исраел, йәк ль сәр йәки һ'ьшк һ'ӧкӧм нәкә.
[47] Һәгәр хәрибәк йан р'еwики щәм тә дәwләти бә, ле йәки исраели щәм wи бьк'әвә к'әсиб бә у хwә бьфьрошә wи хәрибе кӧ щәм тә дьминә, йан пьсмамәки wи хәриби,
[48] паше пәй хwә фьротанер'а, изьна wи һәйә кӧ әw пашда бе к'ьр'ине, жь бьратийа wи йәк дькарә wи пашда бьк'ьр'ә.
[49] Апе wи, йан кӧр'е апе wи, дькарьн wи бьк'ьр'ьн, йан жь пьсмамтийа wи, йан жь р'ьк'ьнйата wи дькарә wи бьк'ьр'ьн, йан һәгәр жь дәсте wива те бьра хwәха ха бьк'ьр'ә.
[50] Т'әви йе әw к'ьр'ийә һәq-һ'әсабе хwә р'аст кә, wе сала хwә фьротида һ'әта сала р'аwастийе, wан п'әре кӧ жь бәр хwәва стандийә бавежә ль сәр сала, бьдә wи, хwә хьлаз кә. Wәхте wи гәрәке мина wәхте п'аләки бе һ'әсабе.
[51] Һәгәр һе гәләк сал мабьн, wәкә wан салед майи п'әре жь бәр хwәва дайи бьдә хwә хьлаз кә.
[52] Ле һәгәр һьндьк сал мабьн һ'әта сала р'аwастийе, бьра һәq-һ'әсабе хwә т'әви wи бькә у wәкә wан салед майи qимәт жь бәр хwәва бьдә хwә хьлаз кә.
[53] Гәрәке әwе исраели мина п'аләки йәксали гьрти щәм wи бе һ'әсабе, әw дәwләтийе хәриб ль бәр ч'ә'ве тә һ'ьшк һ'ӧкӧми ль сәр wи нәкә.
[54] Һәгәр бь ви аwайи әw нькарьбә бе к'ьр'ине, сала р'аwастийе әw нәфәред хwәва дәре хьлаз бә.
[55] Чьмки зар'ед Исраел хӧламед мьн ьн. Әw хӧламед мьнә жь wәлате Мьсьре дәрхьсти нә. Әз Хӧдан Хwәдейе wә мә.